Conserbacion Versus Extincion

E COMBATE entre conserbacion i extincion ta persistí. Hopi organisacion caritativo ta pone presion riba gobiernunan pa adoptá leynan mas estricto pa asina protehá especienan den peliger di extincion.

Por ehempel, recientemente vários grupo a reuní cu oficialnan chines i a haña nan cooperacion den esfuersonan pa eliminá cogementu di oso pretu di Asia den trampa. Nan tabata coge e osonan aki pa nan gal i galblas, locual ta ser usá den remedi tradicional oriental.

Yudansa Internacional

E proteccion di un animal den un pais pero yagmentu di dje te na extincion den otro no ta resultá den éxito di su conserbacion. P’esei, combenionan internacional a resultá di ta oportuno—i tin hopi. E Combenio riba Diversidad Biológico, e Tratado di Rio, a yega na vigor n’e fin di 1993, siguí pegá p’e Acuerdo Riba Conserbacion di Raton Djanochi na Europa. E Comision Internacional di Yag Bayena a agregá e santuario pa bayena di Laman Antártica, n’e santuario di bayena di Laman Indio den un esfuerso pa protehá bayena grandi i bayena minke. Pero, kisas e acuerdo di mas fuerte ta e Combenio Riba Negoshi Internacional di Especienan den Peliger di Extincion.—Mira cuadro.

Hende tin hopi cos pa siña ainda tocante e relacion di bestia, un cu otro. Piscadónan di Oost Africa cu a introducí mero di Riu Nilo, den Lago Victoria pa aumentá e fuente di cuminda, a principiá loke zoólogo Colin Tudge a yama “e desaster ecológico di mas grandi dje siglo aki.” Rond di 200 dje 300 sorto di piscá natural dje lago a wordu exterminá. Aunke evidencia recien ta tira culpa riba lodo cu yobida a hiba den e lago p’e destruccion dje balansa di piscá, e gobiernunan dje tres paisnan rond dje lago a establecé awor un organisacion pa determiná cua sorto di piscá por ta introducí den e lago sin pone na peliger piscá natural.

Intervencion Humano

Un sector cu ta informá di éxito ta e programa di criamentu di bestia den dierentuin. “Si tur dierentuin di mundu berdaderamente ta usa nan influencia i forsa pa promové criamentu di bestia den dierentuin, i si e público realmente ta apoyá e dierentuinnan, anto en conhunto nan por salba for di extincion tur vertebrado (bestia cu tin wesu di lomba) cu probablemente lo tin mester di proteccion den e futuro previsibel.”—Last Animals at the Zoo.

E dierentuin riba e isla chikitu ingles di Jersey ta cria bestianan raro afin di reintroducí nan den mondi despues. Na 1975, solamente 100 lora dje isla St. Lucia a resta den nan habitacion den Caribe. Shete lora a ser mandá n’e isla di Jersey. Na 1989 caba, e dierentuin a cria 14 mas i a debolbé algun di nan na St. Lucia. Segun informe, mas cu 300 lora ta existí awor na St. Lucia.

Proyectonan similar na otro parti tabatin éxito. National Geographic ta informá di cu e 17 lobo corá cu a resta na Nort América a cria asina bon den dierentuin cu mas cu 60 a ser debolbé na mondi caba.

Muchu Exito?

Bestianan den peliger no ta necesariamente den peliger di extincion. Segun e buki Endangered Species—Elephants, entre 1979 i 1989, e cantidad di olefante africano a mengua for di 1.300.000 te na 609.000—algun di esei como resultado di contrabandista di ivor. E ora ei presion público pa prohibí e negoshi di ivor a aumentá. Sin embargo, oposicion na prohibicion di ivor a bira ruidoso. Pakico?

Tantu na Zimbabwe como Zuid Africa, e política di conserbacion tabatin tantu éxito cu nan parkenan nacional i tereno reservá pa bestia di mondi a contené muchu olefante. Segun New Scientist, Zimbabwe tabatin cu kita 5.000 olefante for dje Parke Nacional di Hwange. Gruponan di conserbacionista a recomendá fuertemente relocalisacion. Oficialnan dje parke a ofrecé pa bende e sobrá olefantenan i a sugerí pa agencianan occidental cu ta oponé matamentu di olefante swak of sobrá, “en bes di papia so, duna yudansa financiero pa relocalisacion di olefante.”

Perspectivanan Dudoso

No obstante, tin fracaso. Hopi hende ta expresá preocupacion tocante estado di bestia mandá bek na mondi. E tiger di Siberia ta biba bon den dierentuin, pero den mondi e tin mester di 260 kilometer cuadrá, liber di contrabandista. Ademas, The Independent on Sunday a bisa “manda un tiger criá den dierentuin stret bek den mondi i casi siguramente lo e muri di hamber.” Un prospecto scur en berdad!

En realidad, tur sorto di especie no tin un grupo di specialista pa yuda nan. I loke ta complicá e problema no ta simplemente un falta di trahador. Apesar di ki dedicá conserbacionistanan ta, ora nan tin cu trata cu corupcion, cudishi, i indiferencia di parti di oficialnan di gobiernu, i tambe guera i asta e menasa di morto, ki speransa nan tin di logramentu? Ki solucion tin, anto, p’e problema di especienan den peliger di extincion? I con esei ta tocá bo?

[Plachi na página 7]

Un Arma Internacional

E Combenio Riba Negoshi Internacional di Especienan den Peliger di Extincion ta un arma fuerte den e combate contra tráfico ilegal di especienan den peliger di extincion. Cueru di leopardo, ivor di olefante, wesu di tiger, cachu di rinócero, i tortuganan ta entre mercancia cu ta prohibí actualmente. E combenio ta extendé pa incluí palu i piscá cu ta den peliger di extincion.

Sin embargo, Time a spierta: “Aménos cu nacionnan miembro ta percurá pa cumplimentu di regla, . . . nan por haña cu bestianan cu nan ta purba di protehá no ta existí mas.”

[Plachi na página 8]

Algun dje esfuersonan pa conserbacion ta muchu exitoso?

[Rekonosementu]

Courtesy of Clive Kihn