Sea Interesa den e Dunador di Cuido—Con Otronan por Yuda

“AMI cu Lawrie ta casá pa 55 aña—hopi tempu—i esta añanan felis eseinan tabata! Si tabatin un manera cu mi por a ten’é na cas, lo mi a hacié. Pero mi salú a cuminsá bai atras. Finalmente, mi mester a haci areglo pa e bai un cas di cuido. E dolor emocional di conta esaki ta casi demasiado pa mi. Mi ta stim’é i ta respet’é profundamente i ta bishit’é mas tantu cu mi por. Físicamente, mi no por haci mas.”—Anna, un señora di 78 aña cu pa mas cu 10 aña a cuida su esposo cu tin e malesa di Alzheimer i cu pa e último 40 añanan a cuida tambe nan yu muher cu tin e síndrome di Down.a

E caso di Anna di ningun manera ta excepcional. Un encuesta den e Islanan Británico a revelá cu “den algun categoria di edad (di 40 pa 49 i 50 pa 59) te cu mitar dje muhernan ta un dunador di cuido.” Manera a bisa anteriormente, e confusion emocional i problemanan cu dunadornan di cuido ta enfrentá avéces por parce insoportabel.

“Ami ta kere cu por lo ménos 50% dje dunadornan di cuido ta bira deprimí den e promé aña dje cuido,” Dr. Fredrick Sherman ta bisa, dje Sociedad Mericano di Geriatria. Pa hendenan di edad manera Anna, e echo cu nan mes ta perdiendo forsa i nan salú ta bayendo atras por haci e situacion hopi mas difícil pa manehá.

Pa yuda dunadornan di cuido enfrentá nan responsabilidadnan cu éxito, nos tin cu ta conciente di nan necesidadnan. Ki necesidadnan eseinan ta, i con nos por reaccioná na nan?

Dunadornan di Cuido Mester Papia

“Mi tabatin cu deshogá mi mes,” un señora a bisa kende a yuda cuida su amiga cu tabata muriendo. Manera a ser mustrá den e artículo anterior, hopi bes problemanan ta mas fácil pa enfrentá i trata cuné ora por papia di nan cu un amigu comprensivo. Hopi dunador di cuido cu ta sinti nan atrapá dor di nan circunstancia ta haña cu papia tocante nan situacion ta yuda nan clarificá nan sintimentunan i ta aliviá e presion cu a montoná.

“Mi tabata apreciá ora amigunan a realisá cu nos tur dos tabatin mester di apoyo moral,” Jeanny ta corda, ora e pensa riba e tempu cu e tabata cuidando su casá. E ta splica cu esnan cu ta duna cuido tin mester di animacion, i tin biaha, un scouder pa yora ariba. Hjalmar, kende a yuda cuida su sua enfermo, ta eens: “Mi tabatin mester di un hende cu kier a scucha di mi temornan i problemanan i comprendé con mi a sinti.” Tocante un amigu íntimo, Hjalmar ta agregá: “Tabata masha dushi pa bishit’é, asta si tabata pa djis un mei ora. E tabata scuchá mi. E tabata berdaderamente interesá. Mi tabata sintí mi refrescá despues di esei.”

Dunadornan di cuido por derivá tremendo animacion for di un scuchador comprensivo. Sea “lihé pa tende, slow pa papia,” Bijbel ta consehá sabiamente. (Santiago 1:19) Un informe den The Journals of Gerontology a revelá cu “djis di sa cu apoyo ta disponibel hopi bes ta suficiente pa duna gran alivio.”

Sin embargo, ademas di un orea pa scucha nan i apoyo moral, kico mas e dunadornan di cuido tin mester?

Duna Yudansa Práctico

“Pashent i famia ta beneficiá di cualkier medio via cua por expresá amor i animacion,” Dr. Ernest Rosenbaum ta remarcá. Pa cuminsá, tal “amor i animacion” por ser expresá durante un bishita personal, durante un yamada di telefon of den un nota corticu (kisas compañá cu flor of un otro regalo).

“Tabata un animacion ora nos amigunan a haci bishitanan corticu,” Sue ta corda tocante e apoyo cu su famia a ricibí ora su tata tabata muriendo dje malesa di Hodgkin. “Un di mi amiganan,” e ta sigui bisa, “tabata contestá telefon i tabata yuda cu laba paña i strika pa nos tur.”

Apoyo pa dunadornan di cuido por, i mester, encerá yudansa specífico i palpabel. Elsa ta corda: “Mi a haña útil ora amigunan a ofrec’é yudansa práctico. Nan no a djis bisa: ‘Si un dia mi por haci algu, lagá mi sa.’ Mas bien, nan tabata bisa: ‘Mi ta bai haci compra. Kico mi por trece pa bo?’ ‘Mi por limpia e curá?’ ‘Mi ta disponibel pa sinta cu e pashent i lesa p’e.’ Un otro cos mas cu nos a haña ta práctico tabata pa haci areglo pa bishitantenan laga un mensahe skirbí den un buki di nota ora mi amiga malu tabata cansá of drumí. Esei a duna nos tur hopi contentamentu.”

Ofrecé specíficamente pa yuda cu algu por encerá cualkier un dje cantidad di trabounan di cas. Rose ta splica: “Mi a apreciá yudansa den drecha cama, skirbi carta pa e pashent, ricibí bishitantenan pa e pashent, bai busca remedi, laba i set cabei, laba tayó.” Famia i amigunan tambe por yuda e dunador di cuido dor di tuma turno pa cushiná.

Caminda ta apropiado, por ta práctico tambe pa yuda cu aspectonan básico dje cuido dje pashent. Por ehempel, e dunador di cuido lo por tin mester di yudansa pa alimentá of baña e pashent.

Miembronan di famia i amigunan preocupá kisas ta ofrecé yudansa práctico na cuminsamentu dje malesa, pero kico si e malesa dura largu? Dor di laga nos mes programa ocupá tuma tur nos tempu, fácilmente nos lo por pasa por haltu dje presion constante—i posiblemente aumentante—cu dunadornan di cuido ta enfrentá. Ki tristu lo ta si e apoyo tan necesario mester cuminsá mengua!

Si esei sosodé, kisas ta consehabel pa e dunador di cuido organisá un reunion di famia pa papia tocante e cuido dje pashent. Hopi bes ta posibel pa reclutá e yudansa di amigu i parientenan cu a mustra cu nan ta dispuesto pa yuda. Esaki ta loke Sue i su famia a haci. “Ora tin mester,” e ta conta, “nos tabata corda riba esnan cu a ofrecé pa yuda i a yama nan. Nos a sinti cu nos por a pidi nan pa yuda.”

Duna Nan un ‘Break’

“Ta absolutamente esencial,” e buki The 36-Hour Day (E Dia di 36 Ora) ta declará, “tantu pa abo [e dunador di cuido] como pa [bo pashent]—pa bo tin oranan regular pa ‘kita for’ dje cuido di binticuater-ora-pa-dia dje persona crónicamente malu. . . . Tuma un tempu liber, leu for dje cuido dje [pashent], ta un dje cosnan mas importante cu bo por haci pa hacié posibel pa bo sigui cuida un hende.” Dunadornan di cuido ta di acuerdo?

“Definitivamente cu sí,” Maria ta contestá, kende a yuda cuida un amiga íntimo cu tabata muriendo di cancer. “Tempu-tempu mi tabatin mester di un break i laga un otro hende tuma e cuido over pa un tempu.” Joan, kende ta cuida su casá cu tin malesa di Alzheimer, ta dje mésun opinion. “Un di nos necesidadnan di mas grandi,” e ta remarcá, “ta pa haña tempu liber de bes en cuando.”

Sin embargo, con nan por tuma tempu liber for dje presion di nan responsabilidadnan? Jennifer, kende a yuda cuida su mayornan di edad avansá, ta indicá con el a haña alivio: “Tin biaha un amiga di cas tabata cuida mama pa un dia pa duna nos un break.”

Lo bo por duna e dunador di cuido un break dor di ofrecé pa sali cu e pashent pa un ratu, si ta práctico pa haci esei. Joan ta bisa: “Mi ta hañ’é refrescante ora un hende sali cu mi casá di manera cu mi por ta mi so de bes en cuando.” Di otro banda, kisas bo por pasa tempu cu e pashent na su cas. Sea cual sea e caso, haci posibel pa esun cu ta dunando cuido haña e relahamentu tan necesario.

Pero tene na mente cu no ta semper fácil pa dunadornan di cuido tuma un break. Nan por sinti nan culpabel di no ta huntu cu nan ser kerí. “No ta fácil pa kita di un situacion i enbolbé bo mes den recreo of descanso,” Hjalmar ta admití. “Mi a sinti cu mi tabata kier ta ei henter ora.” Pero el a haña mas pas mental dor di tuma un break ora su sua a rekerí ménos atencion. Otronan a haci areglo pa laga un centro di cuido pa adulto cuida nan ser kerí pa algun ora den dia.

E Fin di Tur Malesa

Un cos ta sigur, cuida un ser kerí cu ta gravemente malu ta un tremendo responsabilidad. No obstante, cuida un ser kerí por ta masha satisfaciente. Investigadornan i tambe dunadornan di cuido ta mencioná cu nan relacion cu famia i amigunan a bira mas fuerte. Den tur caso, sin excepcion, dunadornan di cuido ta siña cualidadnan i abilidadnan nobo. Hopi di nan ta experenciá beneficionan spiritual tambe.

Mas importante, Bijbel ta indicá cu Jehova i su Yu, Jesucristo, ta e dunadornan di cuido di mas compasivo. Profecia bíblico ta sigurá nos cu pronto tur malesa, sufrimentu i morto lo yega na un fin. Djis aki, e amoroso Creador di humanidad lo recompensá habitantenan hustu dje tera cu bida eterno den un mundu nobo perfectamente saludabel—unu den cua “ningun residente lo bisa: ‘Mi ta malu.’”—Isaías 33:24; Revelacion 21:4.

[Nota]

[Komentario na página 11]

E bienestar di esun malu ta dependé directamente dje bienestar di abo como cuidador

[Komentario na página 12]

E apoyo di bon amigunan lo haci hopi pa yudá bo sigui padilanti durante e tempu mas difícil

[Kuadro na página 12]

Dunamentu di Cuido Por Ta Recompensador

‘RECOMPENSADOR?’ algun hende kisas ta puntra nan mes. ‘Con esei por ta?’ Por fabor, tuma nota di loke e siguiente dunadornan di cuido a conta Spierta!:

“Renunciá bo propio meta i deseonan no ta nificá ménos felicidad. ‘Tin mas felicidad den duna cu tin den ricibí.’ (Echonan 20:35) Por ta masha satisfaciente pa cuida un hende cu bo stima.”​—⁠Joan.

“Mi tabata gradicidu cu mi por a yuda mi ruman muher i mi sua ora di berdadero necesidad​—⁠sin cu nan por pagá mi bek. Esei a hala nos mas cerca di otro. Mi ta spera cu un dia mi por usa e experencia cu mi a haña pa yuda un otro hende den un situacion similar.”​—⁠Hjalmar.

“Manera mi a bisa Betty, mi amiga malu, mas cu un biaha, mi a ricibí hopi mas cu mi a duna. Mi a siña mustra empatia i pacenshi. Mi a siña cu ta posibel pa mantené un actitud positivo bou dje circunstancianan di mas difícil.”​—Elsa.

“Mi a bira un persona spiritualmente mas fuerte. Mi a siña mas mihó con ta pa dependé riba Jehova Dios tur dia i lagu’é satisfacé mi necesidadnan.”​—Jeanny.

[Kuadro na página 13]

Ora Bishitá un Dunador di Cuido

• Scucha cu empatia

• Duna encomendacion sincero

• Ofrecé yudansa specífico

[Plachinan na página 10]

Apoyá dunadornan di cuido dor di haci compra i cushiná pa nan of dor di yuda nan cuida e pashent