Pobresa—E ‘Emergencia Silencioso’
“NOS ta tende hopi di emergencianan alarmante tocante e aumento di temperatura mundial i capa di ozon i contaminacion di océano,” Dr. Mahbub Ul-Haq, consehero di Nacionnan Uní, a bisa, pero el a agregá: “Aumento di temperatura mundial i hopi otro emergencianan alarmante ainda no a mata ningun hende [miéntras] cu emergencianan silencioso ta causando hopi morto den e paisnan den desaroyo tur dia.” Dr. Ul-Haq a comentá riba un dje emergencianan silencioso ei. “Pobresa,” el a bisa, “ta realmente e asesino di mas grandi.” Con asina?
Pa hopi dje 1,3 mil miyon hende rond mundu cu ta sobrebibí cu un dollar of ménos pa dia, pobresa en berdad ta bira un desaster mortífero. Te cu 18 miyon hende, e revista UN Chronicle ta informá, ta muri di “causanan relacioná cu pobresa” tur aña. E cantidad aki ta asombroso! Imaginá bo e “gritunan” den e titularnan di noticia si, por ehempel, e poblacion completo di Australia, rond di 18 miyon hende, muri di hamber den un aña! Sin embargo, “no ta papia mashá” tocante e morto dje miyones di pobernan aki, un transmision dje Radio di Nacionnan Uní a comentá. Esaki ta, de echo, un ‘desaster silencioso.’
Pa kibra e silencio, representantenan di 117 pais presente na e promé-promé Cumbre Mundial pa Desaroyo Social a papia tocante maneranan pa cuminsá resolvé e problema di pobresa na mundu. “Shenticincuenta aña pasá e mundu a lansa un crusada contra sclabitud,” James Gustave Speth, e administrador dje Programa di Desaroyo di Nacionnan Uní, a recordá e presentenan. “Awe nos tin cu lansa un crusada mundial contra pobresa masal.” Pakico e preocupacion? El a advertí cu pobresa ta “fomentando desesperacion i instabilidad i [ta] poniendo nos mundu na peliger.”
Sin embargo, asta miéntras cu e delegadonan tabata papiando tocante maneranan pa caba cu pobresa, un ‘oloshi di pobresa,’ marcando e cantidad di babynan cu tabata nace den famianan pober tur dia, tabata mustra cu e situacion di pobresa na mundu tabata birando pió. E oloshi, exhibí na e sitio dje congreso, a indicá cu durante e cumbre di un siman largu, casi 600.000 baby recien nací a ser agregá na e cantidad semper aumentante di hende pober. Na fin dje último dia dje cumbre, a paga e ‘screen’ dje oloshi; pero den realidad, manera Speth a remarcá, “e oloshi ta sigui tik ketu bai.” E pregunta ta awor, Hende lo tend’é?