Awor Mi Ta Contentu di Ta na Bida!

“Bo ta conciente cu bo ta bai muri, no?” e dokter a puntra. E ironia ta cu dos biaha promé, morto lo tabata un alivio pa mi. Pero e biaha aki no. Lagá mi splica.

MI A lanta den un suburbio di Long Island, New York, caminda mi tata tabata un coredó di auto popular. E tabata un perfeccionista cu tabata encantá pa competí. Tambe e tabata temperamental i hopi difícil di agradá. Di otro un banda, Mama tabata un persona mas ketu i trankil, kende tabatin asina un miedu di Tata su pustamentu di auto cu e no tabatin e curashi di bai wak e pusta.

Ami cu mi ruman homber a siña for di chikitu pa na cas no ta den Tata su caminda i pa no haci nada cu por a hacié rabia, algu cu Mama tabata custumbrá di haci caba. Pero esei no tabata fácil. Nos tur tabata biba den miedu di Tata. Esei a afectá mi te n’e grado cu mi nunca a sinti cu mi por a haci algu bon. Mi respet propio a sink bai mas ainda ora, na cuminsamentu di mi añanan di tiener, un “amigu” di famia a abusá di mi sexualmente. Sin por trata cu mi sintimentunan, mi a intentá suicidio. Esei tabata e promé biaha cu mi a pensa cu morto lo tabata un alivio pa mi.

Mi a sinti cu mi no tabatin balor i cu ningun hende a stimá mi, i mi a desaroyá un trastorno den comementu cu ta comun entre muhernan hóben cu poco respet propio. Mi a cuminsá hiba un bida di busca excitacion, abusu di alcohol i droga, fornicacion i aborto—“lookin’ for love in all the wrong places” (en busca di amor dje manera robes), manera e letra di un cantica ta bisa. Mi tabata den corementu di motosaikel, pustamentu di auto i scuba diving, i cada tantu tempu mi tabata biaha bai Las Vegas pa hunga placa. Tambe mi tabata busca e conseho di un miradó di destino i tabata usa e borchi di Ouija pa pret, sin tabata conciente dje peligernan di spiritismo.—Deuteronomio 18:10-12.

Ademas, buscamentu di excitacion a hibá mi den actividadnan ilegal manera bende droga i horta den pacus. Mi búskeda pa amor i aprobacion a resultá tambe den un rij largu di mucha homber i prometido. Tur e factornan aki huntu a crea un estilo di bida cu tabata hopi mas peligroso cu mi a realisá e tempu ei.

Un anochi, despues di a tuma un combinacion di alcohol cu droga den e pitstop dje pista di pusta auto, imprudentemente mi a laga mi mucha homber stuur hibá mi cas. Despues cu mi a bai for di mi, sintá den e stul dilanti, evidentemente e tambe a bai for di dje. E impacto di un choke a sagudí mi for di mi soño. Mi a ser hospitalisá cu hopi herida, pero cu tempu mi a recuperá. E rudia drechi so a keda malu.

E Deseo pa Algu Mihó

Maske mi a duna poco balor na mi mes bida, mi tabata masha preocupá cu e siguridad i derechonan di mucha i animalnan i cu e proteccion dje medio ambiente. Mi a anhelá di mira un mihó mundu i, den un esfuerso pa yuda crea unu, mi tabata activo den hopi organisacion. E deseo aki pa un mihó mundu ta loke inicialmente a atraé mi n’e cosnan cu un colega di trabou cu tabata un Testigo di Jehova, tabata bisa. Tur ora e tabata referí na “e sistema aki” den un manera frustrá ki ora cos a bai malu na trabou. Ora mi a puntr’é kico e tabata kier men, el a splica cu pronto un dia bida lo ta liber di tur ansiedad. Ya cu mi tabata respet’é masha hopi, mi tabata scuch’é cu atencion.

Desafortunadamente, nos a perde contacto cu otro, pero nunca mi a lubidá loke el a bisa. Mi tabata conciente cu un dia lo mi mester haci cambionan drástico den mi estilo di bida pa por agradá Dios. Pero mi no tabata cla pa esei. Sin embargo, mi tabata bisa prospectivo casánan cu un dia lo mi bira un Testigo i cu si nan no tabata gusta esei, awor tabata e tempu pa kibra e relacion.

Como resultado, mi último mucha homber tabata kier a sa mas, bisando cu si ami tabata interesá, anto e ora ei e tambe lo por tabata. Di manera cu nos a cuminsá busca e Testigonan. En bes di esei, nan a haña nos ora nan a bati na mi porta dilanti. Nos a cuminsá un studio di Bijbel, pero cu tempu, mi mucha homber a scoge pa stop di studia i bolbe bek cu su esposa.

Hopi bes mi studio di Bijbel tabata iregular. A tuma tempu pa mi comprendé Jehova su punto di bista riba santidad di bida. Pero una bes cu mi a ahustá mi pensamentu, mi a mira e necesidad pa stop cu skydiving i cu humamentu. Siendo cu bida a bira mas precioso pa mi, mi tabata cla pa cera cabes i stop di risca mi bida. Dia 18 di october, 1985, mi a simbolisá mi dedicacion na Jehova mediante bautismo bou di awa. Mi no tabata sa cu pronto lo mi bai ta entre bida i morto.

Deseando pa Muri Atrobe

Algun luna despues—riba e anochi di 22 di mart, 1986—mi tabata dilanti di mi cas, sacando pañanan labá for di mi auto, ora un auto, coriendo na un velocidad muchu haltu, a dal mi i a lastrá mi mas cu 30 meter! Mi tabata víctima di un accidente di hit-and-run. Aunke mi a haña sla na mi cabes, mi tabata na tinu tur e tempu.

Drumí boca abou, meimei di un caminda scur, mi por a pensa solamente di e horor cu un otro auto lo dal mi atrobe. E dolor tabata extremadamente fuerte, mas di loke mi por a soportá. Pues mi a sigui pidi Jehova pa lagá mi muri. (Job 14:13) Un señora a aparecé cu a resultá di ta un verpleegster. Mi a pidié pa ahustá e posicion di mi pianan, ya cu nan tabata tur destrosá. Esei el a haci, i tambe el a traha un tornikete cu un pida di su shimis, pa stop e sangramentu for di un pia cu tabata fracturá na vários caminda. Mi boetsnan a ser hañá un blok mas leu, yen di sanger!

Personanan cu tabata pasa ei banda, sin sa cu mi tabata un peaton, tabata sigui puntrá mi unda mi auto tabata. Sin sa con leu mi a ser lastrá, mi tabata kere cu ainda mi tabata cerca di dje! Ora e paramédiconan a yega, nan a kere cu mi tabata bai muri. Di manera cu nan a yama detectivenan policial, ya cu homicidio cu vehículo por ta un delitu grave. Cu tempu nan a arestá e shofer. Nan a marca e área como esena di crímen i a tuma mi auto den beslag como evidencia. Tur dos e portanan na un banda a ser kitá afó.

Enfrentando un Crísis

Miéntras tantu, ora mi a yega n’e trauma center local, mi a sigui ripití, asta atrabes dje máscara di oxígeno: “Sanger no, sanger no. Mi ta un Testigo di Jehova!” E último cos cu mi ta corda ta sinti un skèr inmenso corta mi paña bai ariba den mi lomba i tende un tim di trauma gritando ordunan frenéticamente.

Ora mi a spierta, mi tabata asombrá di ta na bida. Constantemente mi tabata bai for di tinu i bin bek. Cada bes cu mi spierta, mi tabata pidi mi famia pa tuma contacto cu e pareha cu a studia Bijbel cu mi. Mi famia no tabata contentu cu mi a bira un Testigo, di manera cu a cumbiní nan pa “lubidá” di informá e Testigonan. Pero mi a persistí—esei tabata e promé cos cu mi tabata pidi p’e cada bes cu mi a habri mi wowo. Finalmente, mi persistencia a duna resultado, i un dia ora mi a spierta, ata nan ei. Ki un alivio! Jehova su pueblo tabata sa unda mi tabata.

Sin embargo, mi goso tabata di poco duracion, pasobra mi hemoglobina a cuminsá baha i mi tabatin keintura haltu. A saca e wesunan di cua a ser sospechá cu tabata causando e infeccion, i a pone cuater bara di metal den mi pia. Pero pronto e keintura a bolbe bek, i mi pia a bira pretu. Esei tabata gangrena, i sobrebibencia a dependé riba amputá e pia.

Bou di Preshon pa Tuma Sanger

Ya cu mi hemoglobina a baha drásticamente, nan a haña cu tabata imposibel pa operá sin un transfusion di sanger. A pidi dokter, verpleegster, miembronan di famia i amigunan di ántes pa pone preshon riba mi. Despues, fluistermentu a cuminsá na mi porta. Mi por a tende e dokternan planea algu, pero mi no por a saca afó ta kico. Bon mes cu un Testigo cu tabata di bishita n’e momento ei a tende e dokternan papia dje plan pa purba forsa duná mi un transfusion. Inmediatamente el a tuma contacto cu e ancianonan cristian local, kendenan a bin yudá mi.

Un sikiatra a ser pagá pa evaluá mi estado mental. Tabata bisto cu e intencion tabata pa declará mi incompetente i asina anulá mi deseonan. E plan aki a faya. Despues un miembro di clero, kende a aceptá un transfusion di sanger e mes, a ser trecé paden pa convencé mi cu tabata OK pa tuma sanger. Finalmente, mi famia a busca un ordu di corte pa forsa duná mi sanger.

Rond di dos’or di mardugá, un tim di dokter, un stenograf di corte, un sirbidor di corte, abogadonan representando e hospital i un hues a cana drenta mi kamber di hospital. E corte tabata den sesion. Mi no tabatin previo notificacion, ningun Bijbel ni ningun hende pa representá mi, i mi tabata bou dje influencia di hopi remedi pa calma dolor. E resultado dje sesion? E hues a nenga di duna e ordu di corte, bisando cu e tabata asta mas impresioná cu e integridad di Testigonan di Jehova cu nunca promé.

Un hospital den Camden, New Jersey, a bai di acuerdo pa trata mi caso. Ya cu e cuerpo administrativo dje hospital na New York tabata furioso, nan a nenga di duná mi cualkier tratamentu, incluyendo remedi pa calma dolor. Tambe nan a nenga di permití e helicopter cu mester a hibá mi n’e hospital na New Jersey baha einan. Mi ta gradicidu cu mi a sobrebibí e biahe cu ambulans pa einan. Ora mi a yega, mi a tende e palabranan mencioná na cuminsamentu dje relato aki: “Bo ta conciente cu bo ta bai muri, no?”

Operacion—Un Exito

Mi tabata asina swak cu un verpleegster mester a yudá mi pone un X riba e formulario di consentimentu pa duna permiso pa e operacion. Nan mester a amputá mi pia drechi riba e rudia. Despues di esei, mi hemoglobina a baha bou di 2, i e dokternan a sospechá cu tabatin daño celebral severo. Esaki tabata dor cu nan no tabata haña contesta ora nan yama den mi orea, “Virginia, Virginia”—e nomber riba mi papelnan pa drenta hospital. Pero ora mi a tende un hende fluister poco-poco, “Ginger, Ginger,” algun tempu despues, mi a habri mi wowo i a mira un cabayero ei cu nunca mi a topa promé.

Bill Turpin tabata di un dje congregacionnan local di Testigonan di Jehova den New Jersey. For di Testigonan na New York el a haña sa cu mi nomber di cariño tabata Ginger—cu cua mi tabata conocí henter mi bida. El a formulá preguntanan cu mi por a contestá dor di kinipí mi wowonan, ya cu mi tabata na un aparato di hala rosea i no por a papia mes. “Bo kier pa mi sigui bishitá bo,” el a puntra, “i pa mi bisa e Testigonan na New York di bo?” Mi no por a caba di kinipí cu mi wowonan! Ruman Turpin a tuma e rísico di drenta mi kamber na scondí, ya cu mi famia a duna ordu pa mi no haña bishitantenan Testigo.

Despues di seis luna den hospital, ainda mi no por a haci mas cu actividadnan básico di tur dia, manera come mi so i skeiru mi djente. Cu tempu mi a haña un pia falsu i por a cana rond un tiki cu un looprek chikitu. Ora mi a sali for di hospital na september 1986 i a bolbe bek na mi apartamento, un wijkverpleegster a keda cu mi na cas pa rond di seis luna mas pa yudá mi.

Yudansa for di Nos Hermandad

Asta promé cu mi a bolbe cas bek, berdaderamente mi a cuminsá apreciá loke ta nificá ser parti dje hermandad cristian. (Marco 10:29, 30) Amorosamente e rumannan a atendé, no solamente na mi necesidadnan físico, sino tambe na esnan spiritual. Cu nan yudansa amoroso, mi tabata por a cuminsá bai reunionnan cristian atrobe i, cu tempu asta participá den loke ta ser yamá e ministerio di pionero auxiliar.

E caso civil contra e shofer dje auto, locual generalmente ta tuma un mínimo di cincu aña djis pa aparecé riba e agenda di corte, a ser resolvé dentro di algun luna—p’e sorpresa di mi abogado. Cu e cen di daño i perhuicio, mi tabata por a muda pa un cas mas fácilmente accesibel. Ademas, mi a cumpra un van ekipá cu un lift pa rolstoel i pedalnan pa man. Asina, na 1988, mi a drenta e fila di pionero regular, dedicando por lo ménos 1.000 ora den e trabou di predicá tur aña. Atrabes di añanan, mi tabatin e placer di traha teritorionan den e estadonan di Nort Dakota, Alabama i Kentucky. Mi a core mas cu 150.000 kilometer cu mi van, mayoria di esei den e ministerio cristian.

Mi tabatin hopi experencia pret cu e uso di mi scooter eléctrico di tres wiel. Dos biaha mi a boltu cuné miéntras mi tabata trahando cu e esposa di superintendentenan biahero. Un biaha, na Alabama, mi a cometé e ekibocacion di kere cu mi por a bula over di un rooi i a terminá riba suela, bañá cu lodo. Sin embargo, manteniendo un bon sentido di humor i no tumando mi mes demasiado na serio a yudá mi mantené un actitud positivo.

Sostené dor di un Speransa Sigur

Tin biaha problemanan di salú a parce di ta casi abrumador. Mi mester a stop di traha pionero na dos ocasion algun aña pasá pa motibu cu a parce cu mi otro pia lo mester a ser amputá. E menasa di perde mi pia ta constante awor, i pa e último cincu añanan, mi tabata completamente limitá na usa rolstoel. Na 1994, mi a kibra mi brasa. Mi tabatin mester di yudansa pa baña, bisti, cushiná i limpia cas i tabatin mester di transport pa bai tur caminda. Sin embargo, pa motibu dje yudansa dje rumannan, mi tabata por a sigui traha pionero apesar dje obstáculo aki.

Durante henter mi bida mi a yega di busca loke a parce di ta excitante, pero awor mi sa cu e tempu mas excitante ta den futuro. Mi conviccion cu Dios lo cura tur enfermedad actual den su mundu nobo cu ta acercando lihé ta loke ta hací mi contentu di ta na bida awor. (Isaías 35:4-6) Den e mundu nobo ei, mi ta anhelá pa landa cu bayena i dolfijn, explorá e cerunan cu un leon i su yunan i haci algu simpel manera cana cant’i laman. Ta un deleite pa mi visualisá mi mes ta haciendo tur e cosnan cu Dios a crea pa nos disfrutá di dje riba e tera paradísico ei.—Manera Ginger Klauss a relat’é.

[Plachi na página 21]

Tempu cu wega di placa tabata parti di mi bida

[Plachi na página 23]

Dios su promesanan ta sostené mi