Kaba—Un Trahe Africano Elegante

DJE CORESPONSAL DI SPIERTA! NA GHANA

KABA—bo por mir’é prácticamente tur caminda aki na Ghana i den paisnan bisiña di West Africa. Ta bistié na vários ocasion—desde entiero, te na reunionnan cristian gososo. I kaba ta bini den diferente estilo i color.

Kico kaba ta precis? E ta un bistí femenino popular. E nomber ta referí na un paña exterior cu ta cuminsá n’e garganta bai abou te n’e cintura. Sin embargo, no ta bistié su so. Ta compañ’é cu un pida tela di dos yarda, mihó conocí aki como estampado javanes of estampado trahá cu was, dependiendo dje calidad. E tela aki ta ser lorá rond di cintura i ta yega te na enkel, i yama asetam. E combinacion no ta completo te ora mara un otro pida tela mas di dos yarda cu yama e nguso. E nguso ta un tela cu por ser usá na diferente manera i por us’é tambe como paña pa cabes cu ta pas of pa mara un baby riba lomba.

Aunke kaba ta característico pa Africa, e tin diferente nomber den e vários paisnan dje continente. Liberianonan ta yam’é un trahe lappa. Na Benin e ta genwu. Hendenan di Sierra Leone ta yam’é docket i lappa. Sin embargo, no muchu tempu pasá, kaba no tabata conocí den paisnan africano. Por ehempel, aki na Ghana, e estilo dansenkran tabata popular entre hende muher di abla akan. Esaki a consistí di dos pida apart di tela, tin biaha dje mésun dibuho. Tabata lora un pida na cintura i tabata want’é cu un faha. E di dos pida, cu generalmente ta mas grandi, tabata pasa over dje scouder robes, i tabata cai over di pechu i lomba. Por lo general tabata usa un estilo special di cabei, cu tambe yama dansenkran, huntu cu e trahe aki.

Sin embargo, ora a introducí e mashin di cose, algun muher africano a cuminsá cose paña cu a parce e blusa di occidente. E idea tabata pa tapa e scoudernan mescos cu e muhernan occidental. Segun un relato, algun hende tabatin dificultad pa pronunciá e expresion “cover the shoulders [tapa e scoudernan].” Asina e palabra “cover” a bira kaba.

Kaba Ta Bini na Moda

Hende muher, desde oficinista te na cunukero, ta sigui bisti kaba. Sí, asta el a bira un producto di exportacion! Sin embargo, e popularidad ei ta relativamente recien.

Pa cuminsá, no tur hende muher tabata gusta e estilonan di kaba cu tabata riba mercado un 40 aña pasá. Agnes, un trahadó social penshoná di 62 aña, a conta Spierta! cu algun dje estilonan di ántes tabata “ridículo.” Otro hende muher a haña cu a rekerí demasiado pacenshi i arte pa bisti e kaba manera mester ta cu su asetam i nguso. Elizabeth, doño di un fábrica di paña, ta corda: “Tabata difícil pa nos como damitanan dominá e técnica di bisti e asetam i nguso.” E ta admití: “Nunca mi a siña dominá e arte ei.”

Distincion di clase tambe a pone cu e popularidad di e estilo di bistí aki a baha. Serwah, di 65 aña, a conta Spierta! cu te cu poco tempu pasá, hopi hende tabata di opinion cu paña estilo occidental tabata pa hende educá, miéntras cu kaba tabata pertenecé na hende sin educacion.

Sin embargo, debí na un ola nobo di concientisacion cultural hopi muher africano a bai pensa atrobe riba kaba. Diseñadónan di moda tambe a contribuí hopi pa promové e bistí. Pa cuminsá, nan a desaroyá un trahe innovador cu yama slit. Dor cu e ta diseñá manera un saya, pero te na enkel, el a solucioná e problema cu algun hende muher tabatin pa mara e asetam i nguso bon. Exhibicion i shownan di moda tambe a hunga un rol importante den promové kaba como último moda.

Naturalmente, mescos ta e caso cu moda den hopi pais, algun dje último estilonan ta pone hopi énfasis riba sensualidad. Clara, di 69 aña, ta haña cu pañanan sunú asina ta parce di ruiná “e meta original di kaba,” cu tabata pa “tapa asta e scoudernan.” P’esei, muhernan cristian ta tene na mente e conseho di apostel Pablo: “Di igual manera, mi ta deseá pa hende muher dorna nan mes cu bistí bon areglá, cu modestia i sano huicio.”—1 Timoteo 2:9; 1 Corintionan 10:29.

Pa muhernan cu ta scoge prudentemente, kaba por resultá di ta un trahe elegante i práctico. I maske hopi trahe tradicional africano a bai for di moda, te asina leu kaba a sa di sobrebibí como un estilo cu ta reflehá e cultura i ambiente africano den un manera atractivo i elegante.

[Plachi na página 12]

Nguso, usá aki como paña pa cabes

[Plachi na página 13]

Nguso, usá pa carga un yu