Kico Ta Mihó pa e Yu?

DIVORCIA of no divorciá? Esei ta un pregunta importante cu hopi hende cu tin un matrimonio infelis ta haci nan mes. Hopi aña pasá hende no tabata gusta divorcio, pa no bisa cu nan tabata conden’é mes, pa motibunan moral i religioso. I cualkier pareha cu yu cu tabatin un matrimonio infelis normalmente tabata keda huntu pa e bienestar dje yunan. Pero último tempu e normanan dje mundu aki a cambia radicalmente. Awe divorcio ta algu mashá aceptá.

Sin embargo, maske divorcio ta aceptá, mas i mas mayor, hues, sociólogo i otronan ta expresá preocupacion tocante e efectonan negativo cu divorcio tin riba yunan. Awor ta tende mas hende duna spiertamentu. Tin cada bes mas evidencia cu ta mustra cu divorcio por tin un impacto devastador riba un mucha. Ta urgi mayornan pa pensa riba e consecuencianan cu divorcio tin pa nan mes i pa nan yunan. Sociólogo Sara McLanahan, di Princeton University, ta bisa cu “entre sesenta pa setenticincu porciento dje famianan cu ta divorciá probablemente lo mester tuma mas tempu i lo mester pensa mihó si nan ta haciendo loke ta bon.”

Studionan recien ta mustra cu yunan di divorcio tin mas rísico pa haña nan cu problema di embaraso di tiener, kita for di scol, depresion, divorcio den nan mes matrimonio i uni n’e fila di hende cu ta haña onderstand. Den paisnan di occidente, 1 di cada 6 mucha ta ser afectá dor di divorcio. Den su buki tocante tutela na Merca, historiadó Mary Ann Mason a comentá: “Un mucha cu a nace na 1990 tabatin un 50 porciento chens di cai bou dje hurisdiccion di un corte enbolbiendo un caso pa determiná na unda i cu ken e mester biba.”

Lamentablemente, e divorcio no semper ta caba cu e pleitu, ya cu mayornan kisas ta sigui bringa den corte tocante tutela i areglo di bishita, causando mas tension ainda pa nan yunan. E encuentronan emocionalmente cargá aki den e ambiente hostil dje sala di corte ta pone na prueba e lealtad dje yunan na nan mayornan i hopi bes ta pone nan sinti impotente i yen di miedu.

Un consehero di famia a bisa: “Divorcio no ta salba e yunan. Tin biaha e ta salba e adultonan sí.” E realidad ta cu dor di divorciá, mayornan lo por resolvé nan mes dilemanan, pero na mes momento, nan por dal nan yunan un sla duru, i e yunan lo por pasa e resto di nan bida tratando na compensá e daño.

Opcionnan di Tutela

Den tur e hostilidad i tension emocional di un divorcio, ta extremadamente difícil pa papia di un manera calmu i racional tocante ken lo bai keda cu e tutela dje yunan. Pa minimisá confrontacion entre mayornan i evitá casonan hudicial hostil, algun hurisdiccion ta ofrecé un forma alternativo pa resolvé disputanan, manera un mediacion pafó di corte.

Ora e funcioná debidamente, mediacion ta permití e mayornan yega na un acuerdo en bes di laga un hues dicidí cerca ken e yunan lo biba. Si no ta posibel pa aplicá e areglo di mediacion, kisas mayornan lo por yega na un acuerdo en cuanto tutela i areglo di bishita via nan abogado. Ora e mayornan yega na un acuerdo i pon’é riba papel, e hues por firma un órden cu ta contené nan deseonan.

Ora mayornan no por yega na un acuerdo riba tutela, e sistema legal den mayoria pais lo percurá maneranan pa purba sigurá cu e mihó interesnan dje yunan ta protehá. E interes principal dje hues lo ta e yunan, no e mayornan. E hues lo considerá hopi factor relevante, manera e deseonan dje mayornan, e relacion dje yu cu cada mayor, e preferencianan dje yu, i e abilidad di cada mayor pa percurá cuido diario. Despues e hues lo determiná na unda i cu ken e mucha lo biba i tambe con e mayornan lo tuma decisionnan importante tocante e futuro dje yu.

Ora un mayor so haña e tutela (único voogd), lo por ta cu ta e tin e autoridad pa tuma decision. Ora ámbos mayor ser otorgá tutela, o sea den caso cu tur dos mantené e ouderlijke macht of poder paternal, nan tur dos mester yega na un acuerdo riba decisionnan importante, manera e educacion i cuido médico dje yu.

Problemanan cu Lo Bo Por Encontrá

Den un caso hudicial pa tutela, mayornan cu ta Testigo di Jehova lo tin cu pensa tambe kico ta mihó p’e spiritualidad dje yunan. Por ehempel, kico si e mayor cu no ta Testigo ta contra pa su yunan haña entrenamentu bíblico? Of kico si e mayor cu no ta Testigo ta scomulgá for dje congregacion cristian?

E senarionan aki por hacié mas complicá pa mayornan cristian tuma decision. Nan kier actua den un manera sabí i razonabel. Pero a la bes nan kier mantené un bon concenshi dilanti Jehova segun cu nan ta considerá huntu cu oracion loke ta mihó pa e yunan.

Den e siguiente artículonan, nos lo analisá cuestionnan manera: Ora di concedé tutela, kico ley ta bisa tocante religion? Con mi por enfrentá e desafio di un caso legal en cuanto tutela exitosamente? Con mi por trata cu perde tutela riba mi yunan? Con mi ta mira un acuerdo pa compartí e poder paternal huntu cu un mayor scomulgá?