For Di Nos Lectornan

Hardin Mundial Mi tin cu bisa danki pa e bunita seri “Un Hardin Mundial—Soño of Futuro Realidad?” (8 di april, 1997) Sí, hardin i color por tin un efecto riba nos salú i yena nos cu goso. Mi a gusta mashá e parti titulá “Di Regreso na Paradijs.” E poco palabranan ei tabata asina animador—nan tabata manera un invitacion cu ta bisa: “Esaki ta e caminda.” Ki dushi lo ta un dia pa traha for di ora solo sali te ora cu e baha pa yuda transformá e tera den un paradijs! Ya cu mi ta gusta pinta, i haci obra di man, mi ta disfrutá tambe di tur e plachinan den e revistanan.

V. R., Australia

Mi kier encomendá boso pa e artículonan. Mi a gusta nan masha hopi mes. Mi tin casi 80 aña i ainda ta gusta traha den mi curá. Kisas mi flor i berduranan lo no gana promé premio, pero mi ta gusta ta pafó i traha den nan. Desde cu mi a lesa e artículonan, mi ta comprendé mihó pakico hende ta gusta traha den hardin.

R. R., Merca

E Relato di Ginger Klauss Lagá mi conta boso cuantu e experencia di Ginger Klauss, “Awor Mi Ta Contentu di Ta na Bida!” a animá mi. (8 di mei, 1997) Mescos cuné, ami tambe a perde tur confiansa den mi mes, i a sinti cu mi no tin balor i cu ningun hende stimá mi. Siendo cu mi no por a trata cu e sintimentunan aki, na yoramentu mi tabata bisa Dios tur dia cu mi kier muri. Mi a mira morto como un alivio. Pero un dia mi a bisa den oracion: “Si ta bo boluntad, por fabor, duná mi un animacion pa biba.” Djis despues cu mi a haci e oracion ei, mi a ricibí e edicion aki di Spierta! Ora mi a mira e artículo aki, un cos a dal mi: Dios a contestá mi oracion. Mi a siña di Ginger cu dor di mantené un sentido di humor i no tuma mi mes demasiado na serio mi por mantené un actitud positivo. Definitivamente mi por bisa cu esun revista aki a duná mi e ánimo pa biba.

M. K., Hapon

Mi a caba di lesa e artículo pa di seis biaha, i lo e no ta e último biaha! Mi tin 21 aña i ta un evangelisadó di tempu completo. Mi ta admirá Ginger Klauss mashá pa e celo cu e tin p’e trabou di predicá apesar di ta den rolstoel. Su experencia a motivá mi pa haci tur loke mi por pa sirbi Jehova.

S. Z., Italia

Mi ta infinitamente gradicí pa e experencia conmovedor. Debí na distrofia muscular, gran parti di cada dia mi ta na cama i ta pasa masha trabou mes pa sali bai predicá den rolstoel. E experencia di Ginger a animá mi masha hopi i ta yudá mi enfrentá e momentonan ora mi ta un tiki deprimí pa motibu di mi malesa.

M. R., Italia

Amigunan Inseparabel Danki pa e experencia di Anne-Marie Evaldsson. (8 di mei, 1997) Mi ta admirá e ruman aki hopi p’e manera con e ta sigui padilanti spiritualmente apesar di su hendikep. E relato a poné mi pensa. Hopi di nos no ta apreciá loke a ser duná na nos pa sirbi Jehova. Mi kier a encomendá e ruman i su fiel amigu. Ki un ehempel excelente!

R. A., Ecuador

Ta hopi animador pa sa cu un persona ciegu ta traha, ta participá den e ministerio di cas-pa-cas, ta conducí studionan di Bijbel i ta asistí na reunionnan cristian tur siman. El a hací mi sinti cu ta bale la pena pa mi haci lo mihó cu mi por den e ministerio i manten’é na promé lugá. En berdad, e balor di un bista spiritual ta muchu mas importante. Lo mi recordá Anne-Marie Evaldsson cu amor i aprecio profundo.

J. O., Nigeria