For Di Nos Lectornan

Con pa Mehorá na Scol Mi ta bai scol ainda i mi kier a gradicí boso pa e artículo “Hóbennan Sa Puntra . . . Mi Por Presta Mihó na Scol?” (8 di april 1998) Aunke semper mi puntonan tabata mas haltu cu e promedio, nunca mi no a mira e motibu pa presta mihó. Pero danki na e artículo interesante i motivador aki, mi ta comprendé awor cu mi por logra mas dor di fiha meta razonabel.

B. R., Merca

Mi tin 14 aña di edad, i nunca mi no a comprendé bon ta con mester siña les. Mi a concluí cu tin algun cos cu lo mi no usa nunca den futuro, i mi a haña cu no tabatin sentido pa siña nan. E artículo aki a pone mi mira cos di otro manera. Tambe, mi kier gradicí boso pa e splicacion hopi práctico en cuanto con pa siña les!

K. F., Hapon

Morde Riba Djente E artículo “Bo Ta Morde Riba Djente?” (8 di april 1998) tabata loke mi tabatin mester. Mi a hañ’é hopi informativo i animador, ya cu mi ta sufri dje problema aki. Nunca mi no a imaginá cu boso lo a publicá algu riba e tópico aki. Cu tantu variedad di informacion, boso ta yega na cada lector individualmente.

A. M. N. C., Brazil

Hende Muher Ora mi tabata lesa e seri di artículo “Ki Futuro Tin pa Hende Muher?,” den e Spierta! di 8 di april 1998, lágrima a laba mi cara. Nada no a yega di emocioná mi asina tantu. Masha, masha danki pa boso animacion di pone nos speransa den futuro ora trato opresivo lo terminá.

C. J., Merca

E bida duru di hopi hende muher rond mundu a conmové mi. Mi wowo a yena cu awa ora mi a lesa di tur e cosnan cu e muhernan aki tin cu haci, i hopi biaha hibando e carga nan so. Ami ta mama di dos yu, i hopi bes mi ta yora pa e hopi dificultadnan cu mi ta pasa aden. E artículo aki a yuda mi realisá cu mi situacion ta mihó cu di hopi otro muher.

K. S., Merca

Sofocá dor di Amigu Ta djis mi kier a bisa boso cuantu mi a apreciá e artículo “Hóbennan Sa Puntra . . . Con Mi Por Evitá di Ser Sofocá dor di Mi Amigu?” (8 di mei 1998) Aunke mi ta un adulto i ta casá, semper mi ta gusta lesa e artículonan aki. Esun specífico aki a pas asina precis cu loke ami i mi esposo ta pasando aden actualmente, cu mi a lesa e artículo cincu biaha promé cu mi a pon’é abou. El a yuda mi siña cu asta Jesus tabatin mester di tempu pa su mes.

P. A., Trinidad

Tin biaha, debí na malcomprendimentunan chikitu, ami cu mi amigu ta keda sin papia cu otro. Esaki ta haci mi asina deprimí cu mi no por concentrá. Despues di a lesa e artículo vários biaha, mi a realisá cu mi ta sofocando mi amigu i cu mi no ta dun’é tempu pa haci otro cos. Mi ta sinti cu boso a skirbi e artículo aki net pa mi, ya cu el a mustra mi asina tantu manera pa mehorá mi relacion cu otro hende.

R. S., India

Relato di Bida di Grace Marsh Mi kier a expresá mi gratitud pa e experencia di Grace Marsh den Spierta! (8 di mei 1998) Tabata edificante i animador pa lesa di su curashi pa sigui predicá apesar di oposicion. El a yuda mi apreciá mas ainda e libertad cu nos tin pa predicá, ya cu e ta e resultado dje esfuersonan dje rumannan di pasado.

C. F., Merca