For Di Nos Lectornan

Crueldad Contra Animal Pa medio di esaki mi kier a laga boso sa ki un trabou tremendo boso a haci cu e artículo “E Punto di Bista Bíblico: Crueldad Contra Animal Ta Malu?” (8 di november 1998) Ami ta haña masha bon mes cu boso a mustra cu Dios no ta aprobá crueldad contra animal, foral na man di esnan cu ta bisa cu nan ta cristian.

J. L. C., Merca

Desaster Cósmico? Mi tin dies aña i mi a gusta e artículo “E Punto di Bista Bíblico: Un Desaster Cósmico Lo Destruí Nos Tera?” (8 di december 1998) El a yuda mi mira cu lo no tin niun desaster cósmico cu lo destruí nos planeta, pasobra Jehova kier pa nos biba den un paradijs riba tera.

J. P., Merca

Jesus Su Aparencia Na página 8, (dje edicion di 8 di december 1998, den e seri di artículo “Jesus—Con Su Aparencia Tabata di Berdad? Kico E Ta Awor?”), boso ta bisa cu “Dios a transferí e bida di Jesus pa matris di un bírgen hudiu.” Siendo cu Jesus tabata perfecto, esaki ta nificá cu e no tabatin ningun rasgo di Adam su genenan den dje?

J. G., Merca

Promé cu Jesus a ser concibí, angel Gabriel a bisa Maria: “Spiritu santu lo baha riba bo, i poder dje Haltísimo lo cubri bo cu su sombra. P’e motibu ei tambe loke lo nace lo ser yamá santu, Yu di Dios.” (Lucas 1:35) Evidentemente, e spiritu santu di Dios a fertilisá un webu den Maria su matris, i a transferí e bida di Dios su Yu primogénito for dje region spiritual pa tera. No tin duda cu e spiritu santu a haci sigur cu e forsa di bida baronil perfecto dje Yu aki a neutralisá cualkier imperfeccion adámico den webu di Maria, miéntras el a mantené cierto rasgonan genético. Probablemente Jesus a parce Maria.—RED.

Stop di Huma! E artículo “Nos A Stop—Bo Tambe Por!” tabata masha special pa mi. (8 di december 1998) Mi a caba di terminá un studio di Bijbel cu un señora cu ta huma. E ta bini tur nos reunionnan, pero el a yega na un punto cu e no ta haci mas progreso spiritual debí na su adiccion. Mi a dun’é artículonan tocante stop cu humamentu cu a yega di sali promé. Mi oracion ta pa e artículo aki yud’é pa por fin e superá su obstáculo.

E. C., Merca

Perde Mayornan Danki pa a skirbi un artículo bunita asina manera “Hóbennan Sa Puntra . . . Con Mi Por Sobrebibí sin Mi Mayornan?” (8 di januari 1999) El a yuda mi sinti mi sigur cu Jehova tin e abilidad di protehá nos, cu ta e muchanan, si nos perde nos mayornan. Ami tin tur dos mi mayornan, pero hopi biaha mi ta puntra mi mes kico lo sosodé cu mi si nan muri. E ehempel excelente di Horacio a animá mi mashá.

M. J., Trinidad

Leon Danki pa e artículo “Leon—Africa Su Mahestuoso Pushi cu Klina.” (8 di februari 1999) E artículo aki tabata masha importante pa mi, ya cu mi gusta leon for di hopi aña caba. Mi ta admirá nan masha hopi, pasobra nan ta bunita i balente. Un dia lo mi tin gana di ta cerca “e yu di leon machu cu klina.”—Isaías 11:6-9.

E. A. S., Brazil

Mata Versus Polucion E artículo corticu “Mata Versus Polucion” (8 di februari 1999) tabata ègt sobresaliente. E informacion a proba fuera di tur duda cu mester tin un Creador amoroso, interesá i inteligente. El a mustra con Jehova a crea tera pa cuida su mes, asta ora e ta ser menasá pa esfuersonan di hende pa ruin’é. Tambe, e artículo a reconfirmá mi speransa di biba den e Paradijs cu Jesus a primintí na Lucas 23:43.

R. J., Merca