For Di Nos Lectornan

Cirugia Ami cu mi esposo ta gradicí Jehova for di profundidad di nos curason pa e artículo “Cirugia Sin Cuchú.” (8 di mart 1998) Mi esposo mester a haci un operacion celebral invasivo pa un malformacion arteriobenoso. E artículo tabata manera un contesta riba nos oracionnan. Mi esposo a haci e operacion cu e procedura mencioná den e artículo, i tur cos ta bayendo bon.

L. J., Merca

Prensa Ruso Masha danki pa e artículo “Prensa Ruso Ta Elogiá Testigonan di Jehova.” (8 di mart 1998) Ta djis mi kier a laga boso sa cu esaki no ta promé biaha cu mi wowo a yena cu awa ora mi ta lesa boso maraviyoso artículonan. Ta dushi pa sa cu un dia, henter tera lo ta mes bunita cu e sucursal nobo di Testigonan di Jehova na Solnechnoye.

I. C. S. A., Brazil

Orguyo di Rasa Mi a yena cu goso ora mi a lesa e artículo “Hóbennan Sa Puntra . . . Kico di Orguyo di Rasa?” (8 di mart 1998) Hopi biaha hende a puntra mi: “Di ki nacionalidad bo ta?” Siendo cu mi no conocé mi desendencia, mi tabata contestá den wega: “Westpointer!” Un minister biahero a bisa: “Ora un hende puntra kico bo ta, djis bisa: ‘Mi ta un Testigo di Jehova.’ ” Mi ta orguyoso di ta parti di un organisacion cu ta considerá tur rasa como igual.

D. H., Merca

Mi tin 14 aña di edad i kier a gradicí boso pa e artículo. Mi orguyo di rasa a bira racismo. E artículo a yuda mi comprendé cu den Jehova su bista nos tur ta igual.

I. P., Italia

Tempu mi tabata yong, hopi dje muchanan na scol tabata orguyoso di nan rasa i color, i tabata bisa cu nan tabatin sanger spañó, miéntras cu ami tabata pertenecé na un grupo minoritario. Mi a haña un compleho i no tabatin respet propio. Tin biaha mi a pensa: ‘Mi ta odia mi color!’ E conseho dje artículo aki a yuda mi haña mi respet propio bek i sinti mi contentu cu loke Jehova a duna mi.

A. G., Filipínas

Mi tabatin ègt un punto di bista trocí, keriendo cu hende cu a nace den paisnan mas ricu tabata superior. Boso artículo a yuda mi wak cu en realidad tin solamente un rasa: e rasa humano.

L. G., Brazil

Confia Ciencia? Boso seri di artículo “Te Con Leu Bo Por Confia Ciencia?” (8 di mart 1998) tabata un spiertamentu oportuno. El a yuda mi pa ta mas realístico tocante invento i descubrimentunan científico, di cua hopi por causa efecto secundario dañino na hende i su medio ambiente. Na mes momento, e seri di artículo a dirigí lectornan na Bijbel, algu cu ta totalmente confiabel.

A. I. B., Brazil

Con pa Manehá Stres Mi a yega di lesa artículonan den revistanan popular en cuanto con pa trata cu fatiga i agotamentu nervioso. Pero hopi biaha nan ta laga mi cu e duda si mi por sigui padilanti! Mi a keda contentu pa mira cu dje 15 sugerencianan pa manehá stres cu boso a duna, ningun a sugerí pa entregá of baha cu penshon. (“Bo Por Manehá Stres!,” 8 di april 1998) Mas bien nan a mustra mi con pa reducí stres miéntras mi ta dal bai cu mi bida.

J. B., Bolivia