Hobennan Sa Puntra . . .

Con Nos Por Hiba un Namoracion Bibando Leu for di Otro?

“Mi a caba di compañá un grupo di delegado asistiendo na un congreso internacional di Testigonan di Jehova bek pa nan hotel. Ora mi tabata cla pa bai cas, un otro grupo a cana pasa, anto mi a para papia un ratu. E ora ei mi a topa cu Odette. Mas despues den siman nos camindanan a bolbe crusa. Nos a dicidí di skirbi otro, i despues di algun aña di a siña conocé otro via carta, nos a cuminsá namorá.”—Tony.

MUNDU a bira chikitu. Den e último décadanan, biahe barata cu avion, un sistema di telecomunicacion mundial, entrega rápido di post i Internet, a habri posibilidadnan nobo pa hiba un romance. I di hopi manera, e idea di hiba un namoracion bibando cientos of asta miles di kilometer leu for di otro, por parce atractivo, foral si e chensnan pa casa na bo pais ta parce di ta limitá.

Pa algun pareha, namoracion na distancia a resultá di ta un bendicion. Tony ta bisa: “Nos ta felismente casá pa 16 aña awor.” Asta tin hende ta trece padilanti cu namoracion na distancia tin e bentaha cu e ta laga parehanan siña conocé otro sin cu atraccion físico ta ciega nan. Pero, kico cu e bentahanan por ta, un romance na distancia tin su desafionan cuné.

Con pa Siña Conocé Otro

E mihó cos ta pa busca pa sa mas tantu cu bo por di esun cu bo tin pensá di casa cuné. Sin embargo, manera un esposo cu yama Frank ta bisa di experencia personal, “no ta fácil pa siña conocé e berdadero persona, ‘e persona secreto di curason.’ ” (1 Pedro 3:4) Doug, otro cristian mas cu tabatin un namoracion na distancia, ta admití: “Mirando bek, mi ta realisá cu nos no tabata conocé otro masha bon.”

Di berdad ta posibel pa siña conocé un hende cu ta biba cientos of miles di kilometer leu? Sí, pero esei ta exigí masha hopi esfuerso. “Nos no tabatin cen pa yama telefon. P’esei, nos tabata skirbi otro un bes pa siman,” Doug ta conta. Pero Joanne i Frank a haña cu skirbimentu di carta no tabata suficiente. Joanne ta bisa: “Na cuminsamentu nos tabata skirbi carta, i a purba yama otro. Despues, Frank a manda un tape recorder chikitu pa mi. Nos tabata graba un tape nobo tur siman.”

Onestidad Ta e Unico Manera

Sea cual sea e forma di comunicacion cu bo usa, ta importante pa ta onesto. “Si bo gaña, lo e sali na cla un dia i afectá e relacion,” segun un esposa cristian cu yama Ester. “Sea onesto cu otro. Sea onesto cu bo mes. Si tin algu cu boso no ta di acuerdo cu otro, no djis ignor’é. Papia riba dje.” Apostel Pablo ta duna e bon conseho aki: “Papia e berdad cada un di boso cu su próhimo.”—Efesionan 4:25; compará cu Hebreonan 13:18.

Cua ta algun asuntu cu boso mester soru pa papia di dje? Tur pareha cu ta namorá tin cu papia di cosnan manera metanan, yu, asuntu financiero i salú. Sin embargo, tin asuntunan cu lo por rekerí atencion special. Por ehempel, si boso casa, un di boso, of kisas boso tur dos, lo tin cu muda. Bo ta dispuesto i capas pa haci esei, mentalmente i emocionalmente? Con bo sa? Bo a yega di muda promé of bo a yega di ta leu di bo famia pa hopi tempu? Joanne su futuro esposo tabata kier pa nan bai traha como boluntario na e sede di Sociedad Watch Tower, e publicadónan dje revista aki. Joanne ta conta: “El a puntra mi si lo mi por biba den un kamber chikitu cu tiki cen. Nos mester a papia hopi bon dje asuntu aki.”

Si bo namorado ta di otro pais, bo ta dispuesto pa adaptá bo mes na un otro cultura? “Boso ta disfrutá caba di otro su cultura riba un base diario?” Frank ta puntra. “Papia tocante e cosnan importante aki asina cu boso cuminsá boso relacion. Mas trempan boso haña sa, mihó, promé cu boso invertí demasiado den sentido emocional of financiero.” Sí, biba tur dia den un otro cultura ta diferente cu ora bo ta un turista pa un par di dia. Lo bo mester siña un otro idioma? Lo bo por ahustá bo mes na condicionnan di bida hopi diferente? Ademas, ta posibel cu bo ta encantá cu e cultura i no asina tantu cu e persona mes? Cu tempu, probablemente e encanto ei lo mengua. Pero matrimonio ta uni dos hende pa semper.—Mateo 19:6.

Tony ta splica: “Un mucha muher cu mi conocé di un otro parti di tera, a casa cu un hende di Caribe. Pero el a haña cu ta difícil pa biba riba un isla. Ei semper tabata calor i el a bira malu. E cuminda tabata otro, i el a sinti falta di su famia. Di manera cu nan a purba bai biba na su tera natal. Pero e ora ei su esposo a sinti cu e estilo di bida ei tabata muchu materialista, i el a haña falta dje asociacion cerá cu e tabatin cu famia i bisiña. Awor nan ta separá; e esposo ta biba na su tera natal, i e mucha muher ta biba na esun di dje. Nan dos yunan ta sinti falta dje amor i atencion di ámbos mayor.”

Tin otro desafionan mas ora bo casa cu un persona di un pais lehano, i kisas di otro cultura. Bo ta prepará pa e gastunan extra pa biaha i comunicá? Lydia ta conta: “Phil tabata haci chansa bisa cu nos mester casa pasobra su cuenta di telefon tabata bin muchu haltu, pero awor nos tin cu paga p’e yamadanan cu ami ta haci na mi mama!” Kico si boso haña yu? Algun lo crece casi sin conocé nan mes famia, asta sin por papia cu nan na telefon debí n’e diferencianan di idioma! Nos no kier men cu no por surpasá e problemanan aki. Pero bo mester calculá e gastu di drenta un matrimonio asina.—Compará cu Lucas 14:28.

Con E Ta di Berdad?

Con bo sa si bo namorado di berdad ta sincero i abierto cu bo? Mateo 7:17 ta bisa: “Tur bon palu ta producí fruta excelente.” Pues, kico su obranan ta? Su accionnan ta apoyá loke e ta bisa? Su pasado ta mustra cu di berdad e tin e metanan cu e ta bisa di tin pa futuro? “E promé cos cu nos a puntra otro tabata nos metanan spiritual,” Ester ta splica. “El a sirbi como evangelisadó di tempu completo pa ocho aña caba, i esei a duna mi e siguransa cu e tabata men e ora el a bisa cu e kier sigui.”

Pero suponé cu e persona cu bo ta namorá ta evitá di contestá. No ignorá e asuntu anto djis spera lo mihó. Busca mas profundo! Puntra DI CON? Un proverbio ta bisa: “Conseho den curason di un homber ta manera awa profundo, pero e homber di dicernimentu ta esun cu lo sak’é.” (Proverbionan 20:5) Un otro proverbio ta spierta: “Cualkier persona sin experencia ta pone fe den tur palabra, pero esun spiertu ta considerá su pasonan.”—Proverbionan 14:15.

Cara-Cara

Tog tin un límite na loke bo por siña di un hende via carta of telefon. Ta interesante cu apostel Juan a skirbi vários carta na su rumannan cristian. Aunke e cartanan aki a fortalecé e vínculo di cariño entre nan masha hopi, Juan a bisa: “Aunke mi tin hopi cos pa skirbi boso, mi no kier hacié cu papel i ink, pero mi ta spera di bini cerca boso i papia cu boso cara-cara.” (2 Juan 12) Asina tambe, nada no ta mihó cu pasa tempu huntu cu un hende en persona. Asta lo ta bon si un di boso por muda bini pa un tempu, pa boso por ta mas cerca di otro. Tambe esaki lo permití esun cu ta muda wak con e clima i condicionnan di bida di su posibel hogar nobo ta.

Con boso por saca lo mihó di boso tempu huntu? Haci cos cu ta revelá boso cualidadnan. Studia Dios su Palabra huntu. Observá otro su participacion na reunion di congregacion i den e ministerio. Haci trabou di cas huntu, manera haci cas limpi i haci compra. Bo por haña sa masha hopi di un hende dor di mira con e ta comportá su mes bou dje stres di tin yen cos di haci.a

Tambe ta bon pa pasa tempu huntu cu e famia di bo namorado. Busca pa forma un bon relacion cu nan. Al fin i al cabo, si boso casa, nan lo bira bo famia. Bo conocé nan? Boso ta bai bon cu otro? Joanne ta consehá: “Te asina leu cu ta posibel, ta bon pa tur dos famia siña conocé otro.” Tony ta agregá: “E manera cu bo namorado ta trata su mes famia, asina e ta bai trata abo tambe.”

Sea cu bo ta namorá un hende en persona of via telefon i carta, evitá di core tuma decision. (Proverbionan 21:5) Si sali na cla cu si boso casa, cos lo no bai bon, lo ta sabí pa papia di terminá e namoracion. (Proverbionan 22:3) Di otro banda, kisas boso tin mester di mas tempu pa comunicacion onesto i sincero.

Namoracion na distancia por ta difícil, pero e por ta recompensador tambe. Di tur manera, e ta un asuntu serio. Tuma bo tempu. Siña conocé otro. Anto, si boso dicidí di casa, boso namoracion lo ta un tempu pa atesorá, no pa lamentá.

[Notas]

[Plachi na página 15]

Soru pa boso papia di cosnan manera metanan, yu i asuntu financiero asina cu boso cuminsá boso relacion