Namorashon Ta Yuda Bo Tuma Bon Desishon

1-2. Kiko algun ruman a konta tokante nan namorashon?

NAMORASHON por ta un tempu dushi i bunita. Si bo ta papiando ku un hende, sin duda bo ke pa e relashon bai bon. I esei ta e kaso ku hopi pareha. Tsion,a un ruman muhé di Etiopia, a konta: “Un di e temporadanan mas felis di mi bida tabata ora ami ku mi kasá tabata date otro. Nos tabata papia di kosnan serio pero nos tabata pasa prèt tambe. Mi tabata felis di a haña un hende ku mi stima i ku tambe stima mi.”

² Sinembargo, Alessio, un ruman di Hulanda, a konta: “Aunke e tempu ku mi tabata namorá mi kasá tabata dushi, e tabatin su retonan tambe.” Den e artíkulo akí, nos lo trata algun di e retonan ei i algun prinsipio di Beibel ku lo yuda parehanan yega na un bon desishon. Ademas, nos lo mira kon e kongregashon por yuda nan.

META DI NAMORASHON

3. Ki ta e meta di namorashon? (Proverbionan 20:25)

³ E tempu ku bo ta pasa pa konosé un hende mihó ta dushi, pero tambe e ta un kos serio pasó e por hiba na matrimonio. Riba e dia di kasamentu, un pareha ta primintí dilanti di Yehova ku nan lo stima i respetá otro tanten ku nan dos ta na bida. Promé ku kualke un di nos primintí un kos, nos tin ku pens’é bon. (Lesa Proverbionan 20:25.) Anto foral den kaso di matrimonio. E meta di namorashon ta pa yuda un pareha tuma un bon desishon. Tin biaha e desishon por ta pa kasa òf tin biaha e por ta pa stòp ku e namorashon. Si un pareha kibra ku otro, esei no ke men ku e namorashon no a bai bon. Al kontrario, e pareha a haña chèns di mira si nan mester kasa òf nò.

4. Kiko nos tur tin ku kòrda tokante namorashon?

⁴ Ta importante pa rumannan soltero kòrda ku dos hende ta namorá pa mira si nan mester kasa ku otro òf nò. P’esei, nan lo no kuminsá nada ku un ruman ku nan sa bon bon ku nan no tin niun intenshon di kasa kuné. Pero, no ta rumannan soltero so tin ku kòrda esei; mas bien ta nos tur tin ku kòrda esei. Por ehèmpel, tin ruman ta pensa ku si un pareha ta konosiendo otro, nan tin ku kasa. Kon tipo di pensamentu asina ta laga rumannan soltero sinti? Melissa, un ruman na Merka, a bisa: “Ora dos ruman ta namorá, nan ta haña nan ku masha hopi preshon mes. Anto tur esei ta pone ku asta ora nan ta mira ku e relashon no ta bai, nan ta sigui fòrsa e kos. Tin ruman soltero ku no ta ni date mes pasó nan no por ku tur e preshonnan.”

SIÑA KONOSÉ OTRO BON

5-6. Kiko un pareha mester haña sa tokante otro? (1 Pedro 3:4)

⁵ Si bo ta papiando ku un ruman, kiko lo yuda bo disidí si lo bo kasa kuné òf nò? Esei ta di siña konos’é bon. Ta sigur ku ya bo sa algun kos dje ruman asta promé ku boso a kuminsá namorá. Pero awor bo tin chèns di siña konosé e hende ku e ta “di paden,” esei ke men, su spiritualidat, su personalidat i su manera di pensa. (Lesa 1 Pedro 3:4.) Ku tempu, bo por kontestá e siguiente preguntanan: ‘Lo e ta un bon kasá pa ami?’ (Pro. 31:​26, 27, 30; Efe. 5:33; 1 Tim. 5:8) ‘Nos por duna otro e amor i atenshon ku kada un mester? Mi por biba ku su imperfekshonnan?’b (Rom. 3:23) Anto kòrda, loke ku ta mas importante no ta kuantu kos boso tin igual sino kon bon boso por adaptá na e diferensianan di otro.

⁶ Kiko mas bo tin ku haña sa? Promé ku bo kurason pega muchu na e ruman, ta bon pa boso papia tokante algun kos importante, manera e metanan ku boso tin. Pero, kiko awor di asuntunan mas personal manera problema di salú òf finansiero i troumanan di pasado? No ta nesesario pa papia tokante tur e kosnan ei fo’i komienso. (Kompará ku Huan 16:12.) Si bo ta sinti ku ta muchu trempan pa papia tokante sierto kos personal, bisa e otro persona. Pero, tene kuenta sí ku lo e bai tin mester di e informashon ei pa por tuma un bon desishon. Pues tardi òf trempan, boso mester papia habrí tokante nan.

7. Kon un pareha ku ta namorá por konosé otro mihó? (Wak e kuadro “Kon pa Namorá un Hende Ku Ta Biba Leu.”) (Wak e plachi.)

⁷ Kon bo por haña sa ken e hende ta realmente? Esei ta di papia habrí ku otro, hasi pregunta i skucha bon. (Pro. 20:5; Sant. 1:19) Kisas boso por hasi kosnan ku ta hasié mas fásil pa tene un kòmbersashon. Por ehèmpel, kome huntu, kana huntu den lugánan públiko òf prediká huntu. Algu otro ku boso por hasi pa siña konosé otro bon ta di pasa tempu ku amigu- i famianan. Ademas, varia e kosnan ku boso ta hasi pa asina boso wak kon e otro ta komportá su mes den diferente sirkunstansia i ku diferente hende. Esei ta loke Aschwin di Hulanda a hasi tempu ku el a kuminsá konosé Alicia mihó: “Nos tabata plania kosnan ku lo a duna nos chèns di konosé otro mihó. Hopi biaha nan tabata kosnan simpel, manera kushiná huntu i hasi algun trabou di kas huntu. Asina ei, nos tabata haña chèns di mira otro su puntonan fuerte i débil.”

8. Dikon ta bon pa un pareha ku ta namorá studia huntu?

⁸ Algu otro ku bo por hasi ta di studia temanan bíbliko huntu. Pasó si resultá ku boso dos kasa ku otro, boso lo mester traha tempu pa adorashon komo famia pa asina semper Yehova keda forma un parti importante den boso matrimonio. (Ekl. 4:12) P’esei, traha tempu for di awor pa studia huntu. Ta bèrdat ku un pareha ku ta namorá no ta un famia ainda i e ruman hòmber no ta e ruman muhé su kabes. Pero segun ku nan ta krea e kustumber di studia huntu nan por mira kon e amistat di kada un di nan ta ku Yehova. Max i Laysa, un pareha di Merka, a bisa ku studiamentu huntu a yuda nan ku un otro kos tambe. Max a bisa: “Fo’i ora nos a kuminsá namorá nos tabata buska informashon tokante namoramentu, matrimonio i bida di famia den nos publikashonnan. Debí na esei nos por a papia tokante temanan importante ku lo tabata difísil pa kuminsá papia riba dje.”

OTRO KOSNAN PA TENE KUENTA KUNÉ

9. Ki kosnan un pareha ku ta namorá mester tene kuenta kuné ora di disidí ta ken nan lo bisa?

⁹ Ken boso lo bisa? Ta boso dos mester disidí esei. Kisas na kuminsamentu boso lo bisa un par di hende so. (Pro. 17:27) Asina ei, boso lo evitá yen di pregunta i preshon innesesario. Pero, miedu pa hende haña sa no mester pone ku boso no ta bisa niun hende. Dikon? Pasó purbando di tene kos sekreto, boso por isolá boso mes anto esei ta peligroso. P’esei, lo ta sabí pa por lo ménos boso bisa esnan ku por duna boso bon konseho i yudansa. (Pro. 15:22) Por ehèmpel, boso por bisa algun famia, amigu madurá òf ansiano.

10. Ki un pareha por hasi pa tur kos kana nèchi? (Proverbionan 22:3)

¹⁰ Ki boso por hasi pa tur kos kana nèchi? Ta normal ku boso lo sinti boso mas i mas atraí na otro. Kon boso por evitá di hasi algu ku lo hasi Yehova tristu? (1 Kor. 6:18) Evitá di papia riba kos inmoral, di ta boso so i di bebe di mas. (Efe. 5:3) Tur e kosnan ei por lanta boso deseo seksual i hasié hopi mas difísil pa boso hasi loke ta bon. Krea e kustumber di papia tokante kiko ta e kosnan ku boso por hasi pa hasi sigur ku kos ta sigui kana nèchi. (Lesa Proverbionan 22:3.) Wak loke Dawit i Almaz di Etiopia a hasi. Nan a bisa: “Nos tabata pasa tempu na lugánan kaminda tabatin hopi hende òf ku nos amigunan. Nunka nos no tabata nos dos so den outo ni den kas. Asina ei nos a evitá situashonnan ku por a pone kosnan sali fo’i man.”

11. Ki kosnan un pareha mester tene kuenta kuné ora di mustra kariño?

¹¹ Awor kiko di mustra kariño? Segun ku boso amor ta krese, kisas boso por disidí di mustra kariño na manera apropiá. Pero si boso deseo seksual bira fuerte, esei por nubla boso kapasidat di tuma un bon desishon tokante otro. (Kant. 1:2; 2:6) Anto ta fásil pa boso pèrdè kontrol i hasi algu ku lo hasi Yehova tristu. (Pro. 6:27) P’esei, fo’i kuminsamentu, papia tokante kon Yehova ta mira i pensa tokante mustramentu di kariño i ki boso lo hasi.c (1 Tes. 4:​3-7) Puntra boso mes: ‘Kon hende den nos área lo mira nos muestra di kariño? E muestra di kariño por lanta deseo den un di nos?’

12. Kiko un pareha ku ta namorá mester tene kuenta kuné ora nan haña nan ku problema i desakuerdo?

¹² Kon boso por dil ku problema i desakuerdo? Kiko si ratu ratu boso tin desakuerdo? Esei ta nifiká ku boso no ta bon pa otro? No nesesariamente. Tur pareha, sea ku ta namorá òf ta kasá, sa tin desakuerdo. Un matrimonio fuerte ta konsistí di dos hende ku ta traha komo tim pa resolvé nan diferensianan. Pues, e manera ku boso ta resolvé problema ta bisa hopi di kon boso matrimonio lo bira. Puntra boso mes: ‘Ora nos ta papia tokante un asuntu, nos ta hasié na un manera kalmu i ku rèspèt? Nos ta kla pa atmití nos foutnan i ta purba mehorá? Nos ta kla pa sede, pidi despensa i pordoná?’ (Efe. 4:​31, 32) Pero, si tur ora bai boso ta pleita i tin desakuerdo, no kere ku esei lo mehorá òf kambia ora boso kasa. Si bo ripará ku e hende ei no ta esun ideal pa abo, kisas e mihó kos pa boso tur dos ta di para e namorashon.d

13. Kiko por yuda un pareha disidí kon largu nan namorashon tin ku dura?

¹³ Kon largu boso namorashon mester dura? Hopi bes, desishon tumá purá purá no ta bai bon. (Pro. 21:5) Pues, boso namorashon mester ta sufisiente largu pa boso siña konosé otro bon. Pero boso no mester rèk e di mas tampoko. Beibel ta bisa: “Speransa posponí ta hasi e kurason sinti malu.” (Pro. 13:12) Ademas, mas largu e namorashon dura, mas difísil ta bira pa resistí e impulsonan seksual. (1 Kor. 7:9) Na lugá di focus riba kon largu e namorashon tin ku dura, puntra bo mes: ‘Kiko mas mi falta pa sa di e hende pa mi por tuma un desishon?’

KON NOS POR YUDA PAREHANAN KU TA NAMORÁ?

14. Kua ta algun manera ku nos por yuda parehanan ku ta namorá? (Wak e plachi.)

¹⁴ Si nos konosé un pareha ku ta namorá, kon nos por yuda nan? Kisas nos por invitá nan pa bin kome serka nos, djòin nos Adorashon Komo Famia òf pa keiru ku nos. (Rom. 12:13) Na momentonan asina nan por konosé otro mas mihó. Kisas nos por ofresé pa kompañá nan, hiba nan un lugá òf pa nan bin nos kas pa nan por papia trankil, sin ku nan ta nan so. (Gal. 6:10) Alicia, menshoná anteriormente, a bisa: “Algun ruman a bisa nos ku nos por a bishitá nan ki ora ku nos tabatin mester di un lugá pa ta huntu sin ku nos ta nos so. Ami ku Aschwin ta masha gradisidu pa esei.” Kon bo tin ku sinti si un pareha pidi bo pa kompañá nan? Bo por mir’é komo un bunita oportunidat pa yuda bo amigunan. Tene kuidou sí pa no laga nan kompletamente nan so, pero diserní ki ora nan tin mester di tempu i espasio pa nan papia nan kosnan.—Flp. 2:4.

15. Kiko mas rumannan por hasi pa yuda un pareha ku ta namorá? (Proverbionan 12:18)

¹⁵ Un manera mas ku nos por yuda parehanan ku ta namorá ta ku loke nos ta bisa òf keda sin bisa. Tin biaha, kisas nos tin ku dominá nos mes. (Lesa Proverbionan 12:18.) Por ehèmpel, kisas nos ta ansioso pa konta otro hende ku un pareha a kuminsá namorá, pero kisas e pareha mes lo ke duna e notisia. Nos no mester hasi redu tokante un pareha ku ta namorá ni kritiká nan riba asuntunan personal. (Pro. 20:19; Rom. 14:10; 1 Tes. 4:11) Tampoko nos lo no ke hasi pregunta ni duna remarke ku lo laga e pareha sinti ku ta preshoná nan pa kasa. Un ruman ku yama Elise i su kasá a konta: “Nos tabata sinti nos masha inkómodo mes ora rumannan tabata puntra nos kon ta ku e plannan di kasamentu, ora ku nos no a ni sikiera papia tokante e asuntu ei ainda.”

16. Ki nos por hasi si un pareha para nan namorashon?

¹⁶ Awor kiko si un pareha disidí ku nan no ta sigui ku otro? Nos no mester purba di saka afó dikon nan a disidí di kibra e relashon ni tuma parti pa niun di dos. (1 Ped. 4:15) Un ruman ku yama Lea a bisa: “M’a bin haña sa ku hende tabata spekulá tokante dikon m’a kibra ku mi frei. Loke nan a hasi ei a duel mi hopi.” Manera nos a menshoná na kuminsamentu, si un pareha disidí di para e namorashon, nos no mester konkluí ku e desishon ku nan a tuma ta malu. Generalmente, esei ke men ku e namorashon a kumpli ku su meta—el a yuda e pareha tuma un bon desishon. Pero esei no ta kita ku e desishon ei ta kousa nan doló, tristesa i kisas sintimentu di soledat. P’esei, laga nos ta atento pa yuda nan.—Pro. 17:17.

17. Kiko parehanan ku ta namorá mester sigui hasi?

¹⁷ Manera nos a mira, namorashon tin su retonan, pero e por ta un tempu dushi i bunita. Jessica ta kòrda: “Pa ta onesto, namorashon ta eksigí tempu i esfuerso. Pero e tabata bale la pena.” Si bo tin un frei, sigui hasi esfuerso pa konos’é bon. Anto si bo hasi esei, bo namorashon lo yuda boso tur dos tuma un bon desishon.