E Punto Di Bista Bíblico

Mester Onra e Mortonan?

“CERCA MAYORIA HENDE UN SINTIMENTU PROFUNDO TA IMPULSA NAN PA TRATA CURPA DI UN DEFUNTU CU UN RESPET CU NAN NO TA SINTI PA UN BESTIA MORTO.”—ENCYCLOPÆDIA BRITANNICA.

MAYORIA hende ta onra nan sernan kerí cu a muri den un manera of otro. Hende sa onra e defuntu den anuncionan di korant cu un biografia corticu, i nan ta elogiá nan den discurso. Den algun pais ta comun pa haci entiero hopi elaborá cu ritonan religioso of tradicional. Ceremonianan pa defuntu por dura dia, siman of lunanan largu. Nan ta duna scol, aeropuerto, caya i pueblo, nomber di hende famoso cu a fayecé. Ta lanta monumentonan i ta fiha dianan di fiesta pa conmemorá personahenan heroico.

Sin embargo, segun e Palabra di Dios, e mortonan no ta conciente mes dje onor cu hende ta duna nan. (Job 14:10, 21; Salmo 49:17) E mortonan ta bibu solamente den e memoria di esnan cu ta corda nan. Bijbel ta bisa: “E bibunan ta conciente cu nan lo muri; pero en cuanto e mortonan, nan no ta conciente di nada en absoluto.” (Eclesiástes 9:5) E Scritura ta ofrecé e speransa di un resureccion cu lo tuma lugá den futuro. (Juan 5:28, 29; 11:25) Pero te cu e ora ei, e mortonan no ta existí. Literalmente nan ta bira stof.—Génesis 3:19; Job 34:15.

Siendo cu Bijbel ta masha cla en cuanto e condicion dje mortonan, tin sentido pa onra nan? Cristiannan lo mester sigui custumbernan tradicional relacioná cu entiero di sernan kerí?

Ritonan Basá Riba un Suposicion Falsu

Hopi, i kisas mayoria dje ritonan tradicional relacioná cu e mortonan tin rais profundo den siñansanan religioso cu no tin base bíblico. Algun rito ta pa “protehá e fayecido di atake di demoño; tin biaha e propósito dje ritonan tabata pa protehá e bibunan di contagiá cu morto of cu e malicia dje defuntu,” segun Encyclopædia Britannica. Cualkier dje custumbernan aki cu ta basá riba e suposicion falsu cu ainda e mortonan ta bibu den un region invisibel, ta bai net contrali cu e berdadnan di Bijbel.—Eclesiástes 9:10.

Hopi hende ta venerá nan mortonan. E clase di adoracion aki ta encerá haci sacrificio i oracion na antepasadonan morto. Algun hende cu ta participá den ritonan asina, no ta considerá loke nan ta haci como adoracion, sino mas bien como expresion di reverencia of respet profundo pa e defuntu. Tog, e clase di debocion aki duná na antepasadonan morto tin base religioso i ta klèsh cu siñansanan bíblico. Jesucristo a bisa: “Ta Jehova bo Dios bo tin cu adorá, i ta na dje so bo tin cu rindi sirbishi sagrado.”—Lucas 4:8.

Un Punto di Bista Balansá

No ta semper muestra di onor i respet na e defuntu ta conectá cu siñansanan religioso falsu. Por ehempel, un relato di Bijbel ta conta cu ora e fiel Rey Ezekías a muri, e pueblo di Dios a onr’é despues di su morto. Nan a “der’é n’e subida cu ta hiba n’e keldernan dje yunan di David; i henter Huda i e habitantenan di Jerusalem a rindié onor na su morto.” (2 Crónicanan 32:33) Un otro ehempel ta esun di Jesus. Bijbel ta bisa cu su disipelnan “a tuma e curpa di Jesus i a lor’é den repi di paña cu specerei, manera hudiu tin e custumber di prepará pa entiero.”—Juan 19:40.

E Scritura ta contené hopi otro caso den cua a sigui proceduranan special relacioná cu e curpa i entiero dje defuntu. E prácticanan aki no tabata adoracion di antepasado, ni nan no tabata basá riba e creencia eróneo cu e mortonan ta sigui influenciá asuntu di hende bibu. Mas bien, esnan na luto a desplegá respet profundo pa nan sernan kerí. Bijbel no ta contra pa mustra un clase di respet asina, ya cu tras di esaki tin emocionnan humano natural. Pero Bijbel no ta apoyá desplieguenan elaborá of histérico na entiero. Di otro banda, e no ta prohibí cristiannan di mustra emocion i keda indiferente ora nan enfrentá cu morto di un ser kerí.

P’esei, ora nan ta asistí n’e entiero di nan sernan kerí, Testigonan di Jehova ta rindi e respet i onor apropiado na e defuntu. (Eclesiástes 7:2) Ora ta trata di asuntu di flor, ceremonianan di entiero i otro custumbernan local, cristiannan ta wak bon kico nan ta dicidí pa evitá prácticanan cu ta klèsh cu siñansa di Bijbel. Den esaki ta necesario pa ta balansá i mustra bon huicio. Encyclopædia of Religion and Ethics ta splica cu “un rito ta cambia di nificacion i balor cu pasamentu di tempu, di manera cu e nificacion cu hende ta dun’é den tempu posterior por ta hopi diferente for di esun cu e tabatin originalmente, i e splicacion popular kisas no ta revelá nada di su orígen.”a

Ta Malu pa Duna Discurso di Elogio?

E principio pa ta balansá ta aplicá tambe na e asuntu di duna discurso pa elogiá e defuntu. Na ceremonianan di entiero, Testigonan di Jehova ta haci esfuerso pa consolá esnan na luto. (2 Corintionan 1:3-5) Un programa formal lo por tin un of mas orador. Pero lo no ta apropiado pa combertí e ocasion den un seri largu di hende cu ta alabá i halsa e fayecido. Mas bien, e entiero ta duna oportunidad pa halsa Dios su maraviyoso cualidadnan, entre otro, su bondad den duna nos e speransa di resureccion.

Pero esaki no kier men cu ta malu pa recordá e bon cualidadnan dje defuntu durante un discurso di entiero. (Compará cu 2 Samuel 1:17-27.) Si e defuntu a keda fiel na Dios te na morto, e ta bira un bon ehempel pa imitá. (Hebreonan 6:12) Ta bon pa refleccioná riba e curso di integridad di Dios su sirbidónan. Compartí e pensamentunan positivo aki cu otronan durante un ceremonia di entiero, ta un consuelo pa esnan cu a keda atras i ta onra memoria dje defuntu.

Cristiannan berdadero no ta adorá hende morto. Nan no ta participá den ritonan popular cu ta na conflicto cu berdadnan bíblico. Pero tampoco Dios su sirbidónan no ta aceptá e punto di bista extremo cu debí cu e mortonan ta stof so, ningun custumber di entiero tin sentido of ta necesario. Nan ta yora nan defuntu i nan ta recordá nan. Pero e berdadnan di Bijbel, cu e mortonan no ta sufri i cu tin e speransa di resureccion, ta aliviá nan dolor i tristesa.

[Notanan]

[Plachi na página 10]

Procesion fúnebre na onor di Gustavo II, rey di Suecia, na su morto na 1632

[Rekonosementu]

Dje buki Bildersaal deutscher Geschichte