E Pasado Mahos di Sclabitud

NET pafó dje costa dje pais africano Senegal, cerca dje stad di Dakar, tin Île de Gorée. Te cu 1848, e isla aki a sirbi pa 312 aña largu como centro di un negoshi floreciente den alma humano. Archivonan for dje haf frances na Nantes ta mustra cu entre 1763 i 1775 so, a manda mas cu 103.000 catibu for di Gorée pa e haf di Nantes pa bende.

Awe un promedio di 200 persona pa dia ta bishitá e museo, Maison des Eclaves, Cas di Catibu. E guia turístico, Joseph Ndiaye, a conta algun dje horornan cu e víctimanan indefenso a pasa aden: “Nan a deportá nos antepasadonan, a separá nan famianan for di otro, a marca nan cueru cu heru cayente, como si fuera ta baca nan ta.” Famianan henter a yega mará cu cadena. “Kisas nan a manda e mama Merca, e tata Brazil, e yunan Antianan,” e guia a conta.

“Despues di pisa nan,” Ndiaye a splica, “tabata establecé e prijs dje hombernan segun edad i orígen; algun grupo étnico tabata haña prijs haltu debí na nan fortalesa of como supuesto trahadó di hopi yu. Por ehempel, tabata bende hende dje tribu di yoruba como ‘cabai di dek.’ ”

Nan tabata prop catibunan flacu cu cuminda pa haci nan gordo promé cu bende nan. Negoshantenan di catibu tabata scoge e mucha muhernan pa satisfacé nan placer sexual tur anochi. Nan tabata cologá catibunan rebelde na pechu en bes di na garganta, pa prolongá nan agonia.

Papa Juan Pablo II a bishitá Gorée na 1992. The New York Times a raportá cu “el a pidi despensa pa e negoshi di catibu, i a pidi pordon pa tur esnan cu a participá den dje, incluyendo e misioneronan católico cu a aceptá e cautiverio dje africanonan como algu normal.”

Sin embargo, no ta tur hende kier reconocé loke a tuma lugá. Dos aña i mei pasá, promé cu e registronan di Nantes a sali na cla, un jesuita frances a sigurá cu na Gorée a bende solamente 200 pa 500 catibu pa aña. Sr. Ndiaye a comentá cu te ainda, “mundu no a logra siña biba cu e gran maldad aki.”

[Plachi Rekonosementu na página 31]

Gianni Dagli Orti/Corbis

Yann Arthus-Bertrand/Corbis

Reproducí for di DESPOTISM—A Pictorial History of Tyranny