For Di Nos Lectornan

Usa Remedi Riba Bo Mes Mi a keda masha encantá cu e seri di artículo “Ta Bon of Malu pa Usa Remedi Riba Bo Mes?” (8 di juli 1998) E ta bon skirbí i ta duna un bista general i balansá dje tópico, cu lo por ta práctico den mayoria pais rond mundu. El a logra hopi bon di enfatisá e importancia di tuma responsabilidad personal pa nos salú dor di hiba un estilo di bida sano en bes di stèns riba un ‘píldora pa cada dolor.’

J. M. J., Inglatera

Observá Para Mi ta un hobencita di shete aña. Mi a gusta e artículo “Observá Para—Un Hobi Fasinante pa Un i Tur?” (8 di juli 1998) E potretnan i e splicacionnan a ègt yuda mi mira cu Jehova a traha e mundu den un manera maraviyoso. E animal cu mi a gusta mas tabata e kroonkraanvogel di Africa, pasobra e ta pret. Danki pa e investigacion cu boso a haci.

F. C., Italia

Di Con Mi No Por Concentrá? Mi wowo a yena cu awa di contentu ora mi a lesa e artículo “Hóbennan Sa Puntra . . . Di Con Mi No Por Concentrá?” (8 di augustus 1998) Mi tin 18 aña di edad i ta sirbi den e ministerio di tempu completo. Mi tabata tur preocupá, pasobra mi no por a concentrá, i esaki ta importante pa por yuda hende den e ministerio di veld. Mi a yega te n’e punto di sinti mi deprimí, pasobra mi no por a corda ni analisá cosnan. Ta berdad, manera Bijbel ta bisa, cu Jehova ta percurá cuminda na e debido tempu.

A. R. C. R., Merca

Tipnan pa Biahero Un tip cu ta falta for dje “Tipnan pa Biahero,” den e artículo “Dengue—Un Keintura di un Picá di Sangura” (8 di augustus 1998), ta pa anochi usa un klambu of net contra sangura, preferiblemente unu cu a haña tratamentu cu insecticida.

I. H., Inglatera

Nos ta apreciá e lector su comentario. Foral pa prevencion di malaria, e sugerencia aki ta masha útil. (Mira “¡Despertad!” di 22 di juli 1997, página 31.) Sin embargo, segun e Centro pa Control i Prevencion di Enfermedad di Merca, e sangura cu ta causa e keintura di dengue “ta preferá di chupa sanger di hende durante dia.” Mayoria biaha e ta pica bo “parti mainta pa vários ora despues cu di dia habri i lat den atardi pa vários ora promé cu bira scur.” P’esei, usa net contra sangura parti anochi kisas no ta masha eficas pa e malesa specífico aki.—RED.