For Di Nos Lectornan

Amantenan di Para Danki pa e bunita descripcion cu boso a duna di un creacion maraviyoso di Jehova den e artículo “Cock-of-the-Rock—Un Beyesa dje Selva Amazónico.” (8 di october 1998) Pa un ratu, boso artículo a hiba mi den e selva amazónico.

E. L. V., Brazil

Di un manera of otro, e artículo aki a capta mi atencion na un manera nobo. E tabata masha positivo, i a enfatisá cu Jehova a traha tur e criaturanan aki pa nos disfrutá di nan!

L. H., Barbádos

Mi a keda encantá cu e artículo “Observá Para—Un Hobi Fasinante pa Un i Tur?” (8 di juli 1998) Pero e blenchi cu boso ta bisa ta di “Norte/Centroamérica,” nos ta mir’é na Sur América tambe.

J. P., Argentina

E palabranan cu a compañá e potret no tabata completo; nos ta apreciá e clarificacion.—RED.

Concentracion Mi tabatin dificultad pa concentrá ora e maestro ta papia. Pero boso artículo “Hóbennan Sa Puntra . . . Con Mi Por Logra Concentrá?” (8 di october 1998) a yuda mi cambia mi custumbernan den klas. For di dia cu mi a lesa boso artículo, mi no tin e problema aki mas, i awor mi ta mas disipliná.

M. A. M., Brazil

Mi tin problema pa concentrá. Mi no tabata sa cu tur loke tabata necesario pa concentrá tabata un tiki motivacion i disiplina propio. Esaki ta bai costa mi bastante esfuerso sí, pero mi ta kere cu mi por!

D. R. A., Merca

Spierta! ta contené hopi informacion cu ta masha interesante pa hóbennan manera mi. Mi a beneficiá dje artículo aki, pasobra falta di concentracion ta un problema cu mi tin. Masha masha danki.

M. N., Italia

Idioma di Seña Despues di a lesa boso artículo “Un Idioma cu Bo Ta Mira!” (8 di september 1998), mi no por a haci otro sino skirbi boso pa gradicí boso. Artículonan manera esaki ta yuda nos comprendé otro hende cu no ta den e mésun circunstancia cu nos. Mi tin un amiga cu a nace surdu, i mi kier a siña idioma di seña. Pero pa un of otro motibu, nunca mi no a haña e tempu. Awor sí mi no ta bai pospon’é mas!

M. E., Inglatera

Mi kier a gradicí boso pa e gran esfuerso cu boso ta haci pa apoyá hende surdu. Mi a entregá algun ehemplar di boso artículo na funcionarionan di gobiernu. Dor cu e tabata asina bon skirbí, nan a pidi mas ehemplar! Tambe mi a laga un señora, cu no a gusta cu su yu muher surdu tabata studia Bijbel cu Testigonan di Jehova, wak e. Ora el a lesa e artículo, el a drama lágrimanan di goso. Awor e ta apoyá e esfuersonan di su yu muher pa asistí na reunionnan cristian i asta el a primintí di paga pa su transport p’e bai un congreso cristian!

E. R., México