For Di Nos Lectornan

Un Siglo di Atrocidad Awe mi a ricibí e edicion di Spierta! di 8 di augustus 1998 den post. Asina cu mi a mira e portada, mi no por a haci otro sino cai sinta i lesa “Un Siglo Yen di Atrocidad—Ta Tempu pa Lubidá?” Mi ta ègt bira hopi tristu di mira e clase di maldad cu hende ta capas pa cometé. Mi ta anhelá masha tantu mes pa e tempu ora henter humanidad lo biba den berdadero pas!

T. D., Merca

E edicion aki a contestá preguntanan cu mi tabatin pa basta tempu caba. Mi ta sinti cu Dios ta usa boso publicacionnan pa yuda hende manera ami.

T. C., Merca

Música Latino Masha danki pa e artículo “Mundu Henter Gusta Música Latino.” (8 di augustus 1998) Mi gusta baila i mi ta stima música. Danki cu boso a trece algun dje posibel peligernan dilanti, manera e música yamá narco corrido. Lo mi no a haña e informacion aki ningun otro caminda. Mi a apreci’é mashá.

J. B., Merca

Culpa Satanas? Mi tin 17 aña i ta poco dia ei mi a lesa Spierta! pa promé biaha. Awor mi no por sin dje! E tabatin informacion hopi balioso, manera “E Punto di Bista Bíblico: Nos Mester Culpa Satanas pa Nos Picánan?” (8 di september 1998) Promé cu mi a les’é, mi a kere cu mi por culpa e ora mi cometé un picá. Wel, mi kier laga boso sa cu mi ta haña cu boso revista ta di primera clase, i mi ta recomend’é na tur hende. Por fabor, pone mi riba e lista di abonado!

M. M., Merca

Suicidio Hubenil Mi tabata kier a gradicí boso masha hopi mes pa e seri di artículo “Ki Speransa Tin pa Hóbennan Djawe?” (8 di september 1998) Mi wowo a yena cu awa. Mi a trata na cometé suicidio vários biaha. Pero mi ta contentu cu mi no a logra.

A. Z., República Checo

E artículonan aki a mustra hopi comprension riba un tópico masha delicado. Mi a trata na pone fin na mi bida anteriormente e aña aki ora mi tabata sufri di depresion clínico. Danki pa e tópico oportuno aki. El a salba mi bida.

R. P., Inglatera

Ta tristu pa bisa, pero dos hóben di mi klas a purba cometé suicidio. Un di nan a haci esei pasobra ora el a pensa riba su futuro, e no por a mira nada bon, solamente dificultad cu e mester superá. P’esei, e artículo aki tabata práctico, pasobra el a duna un splicacion masha cla i specífico con nos futuro por tin nificacion.

R. D., Spaña

Boso artículo a toca mi curason. Tabata como si fuera Jehova tabata papia cu mi manera un Tata amoroso. Tempu mi tabata mucha, mi a sufri abusu na man di mi tata. Mi a sinti cu mi no tabata bal nada i hopi bes mi a pensa di pone un fin na mi bida. Pero awor, manera boso artículo a sugerí, mi ta cultivando un anhelo pa “e berdadero bida.”—1 Timoteo 6:19.

S. R., Brazil

Mi kier a gradicí boso specialmente pa pone loke hóbennan mes a bisa. Hopi di nan a duna solucion pa problemanan den poco palabra.

W. H., Alemania

Con pa Gana Placa Masha danki mes cu boso a tuma e tempu pa publicá e artículo informativo “Hóbennan Sa Puntra . . . Con Mi Por Gana Poco Placa?” (8 di september 1998) Mi tabatin dificultad pa haña trabou. Pero mi a sigui boso recomendacion i por fin mi a haña trabou!

S. D., Ghana