Miyones Di Hende Ta Bai—Abo Tambe?
TUR aña, mas cu ocho miyon hende rond mundu ta asistí na e congresonan di distrito anual di Testigonan di Jehova. P’e temporada di zomer e aña aki tin 201 Congreso di Distrito di tres dia programá pa Merca, cu e tema “Dios Su Palabra Profético.” Nos ta contentu di por informá cu na Aruba i Kòrsou tambe lo tin 4 dje congresonan aki den juli cu augustus. Nos ta animá bo pa ta presente ora e programa cuminsá cu música diabierne mainta 9:30.
E programa di mainta lo habri cu un discurso di bon biní. Tambe lo tin e discurso clave titulá “Presta Atencion na Dios Su Palabra Profético.” Tra’i merdia, e simposio “Haña Deleite den Lesa e Palabra di Dios,” lo duna sugerencianan práctico riba con pa haci lesamentu di Bijbel probechoso i tambe placentero. E discurso final dje dia ei, “Esnan Cu Ta Lucha Contra Dios Lo No Prevalecé,” lo repasá e lucha cu hende a hiba contra e proclamadónan dje Reino di Dios den nos tempu.
E programa di diasabra mainta tin un consideracion di bautismo; lo tin oportunidad pa esnan cu ta cualificá bautisá. Tra’i merdia lo presentá informenan animador tocante con bon e hendenan di cierto paisnan na Latinoamérica, Africa i Oost Europa, como tambe n’e inmenso pais asiático Kazakstan, ta reaccioná riba e berdad di Bijbel. E parti ei tin e tema “ ‘Cosnan Deseabel’ Ta Yenando e Cas di Jehova.” E programa di diasabra lo cera cu dos discurso: “Textonan Profético Ta Spierta Nos pa Ta Vigilante” i “E Palabra Profético den e Tempu di Fin.” E último discurso aki lo enfocá riba e buki bíblico di Daniel i lo duna motibunan pakico nos tin cu presta atencion na su profecia.
Diadomingo mainta un simposio di un ora, dividí den tres parti, cu e tema “Palabranan Profético pa e Tempu Señalá,” lo considerá e profecia di Habacuc. Lo bo mira ki un animacion e buki bíblico corticu aki por ta pa cristiannan awe. Despues, e drama den trahe i esenario antiguo tocante e relato bíblico di Jacob cu Esau, lo resaltá e tema “Laga Nos Apreciá Nos Patrimonio Spiritual.” E programa di diadomingo mainta lo cera cu e discurso animador “Kico Nos Patrimonio Precioso Ta Nificá pa Bo?” Anto tra’i merdia bo por disfrutá dje discurso público “Haciendo Tur Cos Nobo—Manera A Ser Profetisá.”
Traha plan for di awor pa ta presente. Pa haña e sitio mas cerca di bo, tuma contacto cu e Salon di Reino local di Testigonan di Jehova, of skirbi e publicadónan dje revista aki. Nos revista compañero, E Toren di Vigilancia, a duna un lista dje sitionan di congreso na Antianan Hulandes i Aruba, Hulanda, Merca i Cánada den su edicion di 15 di februari 1999.