Bo Mes Por Scoge Bo Futuro

AUNKE “den henter e mundu di antigwedad,” hende a considerá divinacion “un gran logro intelectual,” e tabata “un arte cu e profetanan hebreo a haci bofon di dje,” segun arkeólogo Joan Oates. Di con?

Maske e israelitanan di antigwedad tabata rondoná dor di nacionnan cu tabata kere cu bida ta predestiná, nan a rechasá e idea di cu tin un forsa impersonal ta forma nan bida. Entre e instruccionnan cu Dios a duna e nacion, tabatin esaki: “No mester ta hañá den bo . . . ningun hende cu ta usa divinacion, practicante di magia ni ningun hende cu ta busca señal ni ningun hacidó di bruha, ni . . . un pronosticadó profesional di sucesonan.”—Deuteronomio 18:10, 11.

Siendo cu e israelitanan no a kere den destino ni no a usa miradó di destino, nan por tabatin confiansa pa loke ta e futuro. E enciclopedia católico frances Théo ta splica cu esaki ta asina dor cu e nacion a kere cu “hende i mundu no tabata víctima di un forsa impersonal. Dios tabatin un propósito pa hende.” Ki propósito?

Destino i Boluntad Liber

Dios a primintí e israelitanan pas i prosperidad si nan a obedecé su leynan. (Levítico 26:3-6) Ademas, nan tabata spera riba un Mesías cu lo a trece condicionnan hustu riba tera. (Isaías, capítulo 11) Sin embargo, e echo cu Dios a primintí e cosnan aki no a nificá cu hende por a djis sinta man crusá warda cos sosodé. Al contrario. Dios a bisa nan: “Tur loke bo man haña pa haci, hacié cu bo forsa mes.”—Eclesiástes 9:10.

Un punto central den esaki tabata e idea di boluntad liber. E israelitanan tabata liber pa sirbi Dios i forma nan futuro. Dios a primintí nan: “Tin cu sosodé cu si boso obedecé mi mandamentunan sin falta cu mi ta manda boso awe, pa boso stima Jehova boso Dios i sirbié cu henter boso curason i cu henter boso alma, anto ami tambe sigur lo duna boso tera awaceru na su tempu señalá, awaceru di otoño i awaceru di primavera, i en berdad lo bo recogé bo grano i bo biña dushi i bo zeta.” (Deuteronomio 11:13, 14) Ora Israel tabata obediente, nan a ricibí Dios su bendicion.

Net promé cu nan a drenta e tera cu Dios a primintí nan, el a pone e nacion di Israel scoge: “Mira cu di berdad mi ta pone dilanti bo awe bida i loke ta bon, i morto i loke ta malu.” (Deuteronomio 30:15) E futuro di cada persona a dependé di su mes accion i decisionnan. Sirbi Dios a nificá bida i bendicion, pero nenga di sirbié a nificá problema. Pero kico di awe?

Causa i Efecto

Nos ta mará na un cantidad di ley natural cu t’ei pa nos mes bon. Un di esakinan ta e ley di causa i efecto, of, manera Bijbel ta bis’é: “Kico cu un hende sembra, esaki lo e cosechá tambe.” (Galationan 6:7) Una bes nos reconocé e principio aki, ta posibel pa considerá e probabilidad di cierto futuro sucesonan.

Si nos ta core auto duru i descabeyá, nos tin mas chens di haña un accidente, cu si nos ta core cu cuidou. Si nos ta huma, tin mas chens cu nos lo haña cancer, cu si nos no ta huma. Ta cierto cu aparentemente tin masha poco probabilidad cu sucesonan manera e atakenan terorista mencioná den e promé artículo dje seri aki lo sosodé cu nos, i no tin sentido pa purba calculá nan probabilidad. Pero recurí n’e idea di destino lo no hiba nos niun caminda. E no ta iluminá nos tocante presente ni futuro. Kere den un mentira no ta duna bo ningun berdadero siguransa pa futuro. Mira Dios su man den tur cos cu sosodé tampoco lo no haci esei.

Con Bo Futuro Lo Ta?

No ta asina cu nos futuro ta skirbí di antemano. Mas bien e ta ser formá dor di loke ta sosodé awor. Maske bida ta un regalo for di Dios, Bijbel ta mustra claramente cu nos ta hunga un papel clave den dicidí nos presente i futuro. E echo cu nos por scoge sea pa haci Dios contentu of, al contrario, hacié tristu, ta mustra cu Dios a pone den nos man un midí di control riba nos bida.—Génesis 6:6; Salmo 78:40; Proverbionan 27:11.

Ademas, e Santu Scritura ta enfatisá hopi bes cu nos futuro ta dependé di nos awante i nos manera di biba. Esakinan lo no a nificá mashá si tur cos tabata predestiná caba. (Mateo 24:13; Lucas 10:25-28) Wel, si nos scoge pa ta obediente i fiel na Dios, ki futuro nos por spera?

Bijbel ta revelá cu humanidad tin un futuro masha briyante mes su dilanti. Tera lo ser transformá den un paradijs caminda lo reina pas i siguridad. (Salmo 37:9-11; 46:8, 9) E futuro ei ta sigur, pasobra e Creador todopoderoso lo cumpli cu su promesanan. (Isaías 55:11) Pero cu nos lo ser bendicioná cu bida den Paradijs no ta dependé di destino; esei ta loke ta spera nos si nos ta obediente i ta cumpli cu Dios su boluntad awor. (2 Tesalonicensenan 1:6-8; Revelacion 7:14, 15) Dios a duna nos un boluntad liber i ta animá nos pa “scoge bida pa bo por keda na bida.” (Deuteronomio 30:19) Kico abo lo scoge? Bo futuro no ta dependé di destino; e ta den bo man.

[Plachinan na página 10]

Dios su propósito ta un futuro maraviyoso pa hendenan obediente