Capítulo 5

Con mi por trata cu e segundo matrimonio di mi mayornan?

“E dia cu papa a casa cu Rita tabata e dia di mas malu di mi bida,” segun Sebastian. “Mi tabata rabiá. Rabiá cu papa pasobra el a traicioná mi mama. Rabiá cu mama pasobra el a bai scol di abogado i a láganos pa nos cuenta. Rabiá cu e dos demoño, yiu di Rita, cu tabatin cu bin biba den nos cas . . . Pero, mas cu tur, mi tabata rabiá cu Rita . . . mi a odié. I door cu no ta correcto pa odia, mi tabata rabiá cu mi mes, també.”—Stepfamilies—New Patterns in Harmony, di Linda Craven.

ORA mayornan ta divorciá i ta casa cu otro hende, esei ta destrui e speranza di cu nan lo bira bon cu otro. Esei por hacíbo sintíbo insigur, traicioná, i jaluz.

E casamento nobo por ta specialmente perhudicial si e ta sigi e morto di un mayor stimá. Melissa di 16 aña di edad a bisa: “E morto di mi mama a hacími mashá amarga. Mi a kere cu e comprometida di mi tata tabata tuma e lugar di mi mama, p’sei mi a traté mashá cruel.” Lealtad na bo mama natural asta por molestia bo concenshi si bo ta cuminza stima bo madrasa.

No ta straño, anto, cu hopi hoven ta saca nan duele emocional di manera destructivo. Algun asta ta planea pa kibra e matrimonio nobo di nan tata of mama. Pero, no lubida, bo tata of mama natural, of padraso of madrasa, a haci huramento dilanti Dios. “P’sei, loke Dios a uni hunto no laga ningun hende [of yiu] separa.” (Mateo 19:6) I aunque bo por kibra nan matrimonio, esei no por uni bo mayornan natural di nobo.

No ta razonabel tampoco pa keda den conflicto cons⁠tante cu bo padraso of madrasa. Proverbio 11:29 ta adverti: “Ken cu ta causa problema pa nan famía lo hereda solamente bientu,” esta, caba sin nada. (New International Version) E rencor di Geralda di diescinco aña di edad contra su madrasa finalmente a culmina den un pleitu amarga. Cu ki resultado? Su madrasa a exigi pe tata di Geralda scoge entre ele i su yiu. Pa caba, Geralda a bolbe biba cerca su mama natural—cu també a bolbe casa.

Amor ta yudábo enfrenta e situacion

Ki solucion tin pa yuda hovenan enfrenta cu bon éxito e segundo matrimonio di nan mayornan? Ehercicio di amor basá riba principio conforme cu detaye skirbí den 1 Corintio 13:4-8:

Amor “no ta busca su mes interés.” Esei kier men ‘buscando, no bo mes bentaha, sino e bentaha dje otro persona.’ (1 Corintio 10:24) Si bo tata of mama ta decidi cu nan di nobo tin mester dje compañerismo di un casá, bo mester carga rencor contra esei?

“Amor no ta jaluz.” Hopi bez hovenan no kier comparti e amor di nan tata of mama natural cu ningun otro hende. Pero, bo no tin cu tene miedu cu e amor di bo mayornan lo caba, pasobra amor por extende. (Compara cu 2 Corintio 6:11-13.) Asina bo tata of mama natural por extende nan amor pa inclui un casá nobo sin perde ningun cariño pa bo. Bo ta habri bo curazón pa inclui un padraso of madrasa? Hacimento di esei di ningun manera kier men cu bo ta desleal na bo difunto tata of mama.

Amor “no ta comportele indecentemente.” Bibando cu ruman homber of muher nobo di otro sexo por crea presion moral. Segun informe, relacion sexual ilegal ta sosode den miembro di famía di 25 porciento di famía adoptá.

Segun David, ora e segundo matrimonio di su mama a trece cuater mitá ruman muher tiener den e cas, “tabata necesario pa crea un bloqueo mental en cuanto sintimento sexual.” També bo kier tene cuidao pa evita di ser indebidamente familiar, haciendo sigur cu ni bo bistí ni bo conducta ta provocativo sexualmente.—Colosense 3:5.

Amor “ta soporta tur cos . . . E ta dúnanos poder pa wanta tur cos.” (Traduccion di Charles B. Williams) Tin bez cu nada ta parce di haci bo sintimento di dolor bai. Marla a admiti: “Mi a sintími como si mi no tabatin lugar na cas. Mi asta a bisa mi mama cu mihor mi nunca a nace.” Marla a bira rebelde i asta a hui for di cas! Sin embargo, awor e ta bisa: “E mihor cos pa haci ta di wanta.” Si bo ta wanta també, cu tempo amargura, confusion, i e dolor cu bo a sinti na principio lo mengua.

‘Bo no ta mi berdadero mama/tata!’

Aceptacion di disiplina di un mayor nobo no ta fácil, i ora un mayor di crianza ta pidíbo haci algo, bo por sintíbo tentá pa grita, ‘Bo no ta mi berdadero mama/​tata!’ Pero, corda e principio declará den 1 Corintio 14:20: ‘Sea hende hecho den bo comprendimento.’

Aceptacion dje autoridad di bo tata of mama di crianza di disiplinábo ta un manera pa mustra cu bo ta un hende maduro den bo moda di pensa. Bo tata of mama di crianza ta cumpli cu e deber di un tata of mama natural i ta merece bo respet. (Proverbio 1:8; Efesio 6:1-4) Den tempo bíblico, un tata of voogd di crianza a cria Ester ora su mayornan a muri. Aunque Mardoqueo no tabata e tata natural di Ester, el a ‘duné mandamento,’ locual Ester a obedece asta como adulto! (Ester 2:7, 15, 17, 20) Realmente, e disiplina di un tata of mama di crianza generalmente ta un expresion di nan amor i interés den bo.—Proverbio 13:24.

Sin embargo, keho legítimo tin cu presenta. Si ta asina, mustra cu bo ta un ‘hende hecho’ cumpliendo cu e conseho di Colosense 3:13: “Sigi soporta otro i pordona otro libremente si un tin causa pa keha contra otro.”

Siña comparti, siña haci compromiso

Ora Juanita di 15 aña di edad a biba so cu su mama, e tabatin su mes camber i a bisti paña costoso. Ora su mama a casa di nobo i Juanita a hayé den un famía cu cuater yiu, cosnan a cambia. El a lamenta: “Awor mi no tin mi mes camber mas. Mi tin cu comparti tur cos.”

Kizás abo també tin cu bandona bo puesto como e yiu mayor of e único yiu. Si bo ta yiu homber, kizás pa mashá tempo bo tabata manera cabez di famía—un puesto cu awor bo tata di crianza ta ocupa. Of si bo ta yiu muher, tal bez abo i bo mama tabata manera ruman, asta drumiendo den e mesun camber, pero awor bo tata di crianza ta sacábo afó.

E Bijbel ta recomenda: “Duna tur hende di conoce cu bo ta razonabel.” (Filipense 4:5) E palabra original ta nifica “suave,” i ta duna di conoce cu bo no ta insisti riba tur derecho legal cu bo tin. Pues, purba di keda suave, haciendo compromiso. Saca mayor probecho di bo situacion nobo, i evita di biba den pasado. (Eclesiastés 7:10) Keda dispuesto di comparti cosnan cu ruman di crianza, sin trátanan manera hende straño. (1 Timoteo 6:18) Mas pronto boso ta cuminza trata otro manera berdadero ruman, mas pronto boso sintimento un pa otro lo mehora. I en cuanto e homber nobo den e cas, no carga rencor contra dje. Keda contentu cu e tei pa yuda wanta e carga di responsabilidad dje famía.

Enfrentando tratamento desigual

Despues di a admiti cu su tata di crianza ta mustra amor, un mucha muher a bisa: “Pero, tin un diferencia. E ta spera mas, ta disiplinános mas, tin menos comprendimento di nos . . . cu e tin di su mes yiunan dje mesun edad. Esei ta un irritacion pa nos.”

Comprende cu generalmente tata of mama di crianza no ta síntinan mescos tocante yiu di crianza cu nan ta síntinan tocante nan yiunan natural. Ta asina debí, no tanto na enlace carnal cu nan yiunan natural, sino na compartimento di experencia den bida. En todo caso, asta mayornan natural por stima un yiu mas cu otro. (Génesis 37:3) Sin embargo, tin un distincion importante entre loke ta igual i loke ta husto. Hende tin personalidad individual i necesidad distinto. Pues, en bez di keda demasiado preocupá en cuanto si bo ta recibi tratamento igual, purba di mira si bo tata of mama di crianza ta purba di satisface bo necesidad. Si bo ta kere cu nan no ta haci esei, anto bo tin motibo pa considera e asunto cu e tata of mama di crianza.

Bo mitá rumanan també por causa pleitu. Nunca lubida cu nan també tin dificultad acostumbrando nan mes cu e situacion di un famía nobo. Kizás nan asta ta carga rencor contra bo como un intruso den nan famía. Haci bo posibel, anto, sea bondadoso. Si nan no ta aceptábo, ‘vence malu cu bon.’ (Romano 12:21) Además, no ta nada straño pa asta rumanan natural choca cu otro de bez en cuando.—Mira capítulo 6.

Pacenshi ta bale la pena!

“Mihor ta e fin despues di un asunto cu su principio. Hende cu tin pacenshi ta mihor cu hende cu tin spiritu soberbe.” (Eclesiastés 7:8) Normalmente, varios aña ta necesario promé cu berdadero confianza ta desaroya asina leu cu miembro di famía nobo ta síntinan trankilu cu otro. Solamente cu tempo, costumber i balornan diferente por armoniza pa bira un rutina práctica. Pues, tene pacenshi! No spera di experimenta “amor instantáneo” of cu un “famía instantáneo” lo ta e resultado.

Ora e mama di Tomás a bolbe casa, el a keda inketu, por lo menos. Su mama tabatin cuater yiu, anto e homber cu a casa cuné tabatin tres. “Nos tabatin pelea, argumento, desordu, i terrible tension emocional,” segun Tomás. Kico a resulta den bon éxito despues? “Aplicacion di principio bíblico a resolve tur cos; no semper un bez, sino cu tempo i cu aplicacion di fruta di spiritu di Dios, tur situacion cu tempo a wordu drechá.”—Galatio 5:22, 23.

Experencia dje sigiente hovenan cu nos a entrevistá ta ilustra cu debocion na principio realmente ta resulta den bon éxito den famía nobo:

Hovenan den famía nobo cu tabatin bon éxito

Entrevistador: Con bo a evita di carga rencor contra e disiplina di bo padraso of madrasa?

Leo: Mi mama i padraso semper a keda di acuerdo en cuanto disiplina. Ora algo a sosode, nan dos a tuma decision di duné, pues, ora mi a haya zota, mi tabata sa cu el a bini di nan dos.

Linda: Tabata mashá dificultoso na principio pasobra mi a puntra, “Ki derecho bo tin di bisámi esei?” Anto mi a corda con e Bijbel ta bisa ‘Onra bo mama i tata.’ Aunque e no tabata mi tata natural, den bista di Dios e tabata mi tata toch.

Robin: Mi tabata sa cu mi rencor contra e persona cu mi mama a stima por ofendele profundamente.

Entrevistador: Kico a promove bon comunicacion?

Leo: Bo tin cu bira interesá den loke bo padraso ta haci. Mi a yudé den su trabao seglar. I durante cu nos a traha nos a papia hopi. Esei a yudámi mira con el a pensa. Na otro tempo nos simplemente a sinta hunto i a papia tocante ‘nada.’

Valerie: Mi madrasa i mi a pasa hopi tempo hunto, i mi realmente a yega di comprendele. Nos a bira amiga di mas íntima.

Robin: Mi tata a muri un aña so promé cu e segundo matrimonio di mi mama. Mi a nenga di bira amigo di mi padraso pasobra mi no tabata kier pe tuma e lugar di mi tata. Mi a pidi Dios yudámi recobrámi dje morto di mi tata i bira mas cariñoso cu mi padraso. Mi a haci oracion tras oracion tras oracion. Jehova Dios realmente a contesta mi oracion.

Entrevistador: Kico bo a haci pa bira mas íntimo?

Valerie: Tabatin bez cu mi a pidi mi madrasa bai cine cu mi—nos dos so. Of, ora mi a sali, mi a cumpra flor pe of un baso, algo pa mustré cu mi tabata pensa di dje. E realmente a aprecia esei.

Eric: Bo tin cu busca algo cu boso dos ta gusta. E único cos cu mi tabatin en común cu mi padraso tabata cu el a casa cu mi mama i nos a biba den e mesun cas. E yudanza mayor a yega ora mi a cuminza mustra e mesun interés den e Bijbel cu e tabatin. Mientras cu mi a yega mas cerca Jehova Dios, mi a yega hopi mas cerca mi padraso. Awor nos realmente tin algo en común!

Entrevistador: Con esei a beneficiábo personalmente?

Robin: Ora mi a biba cu mi mama so, mi tabata rebelde i malcriá. Mi semper kier a haci loke mi kier. Awor mi a siña consideracion pa otronan i di ser menos egoísta.

Leo: Mi padraso a yudámi pensa manera homber. El a yudámi practica ofishi i sa con pa traha cu mi man. Ora tempo tabata dificultoso i mi tabatin mester di yudanza, el a duné. Sí, e ta e mihor tata cu hende por haya.

Pregunta pa consideracion Capítulo 5

◻ Con hopi hoven ta síntinan ora nan mayornan ta casa di nobo? Pakico?

◻ Con e demonstracion di amor cristian ta yuda hovenan enfrenta e problema?

◻ Bo tin cu acepta e disiplina di un tata of mama di crianza?

◻ Pakico ta importante pa bo sa con pa haci compromiso i comparti cu otro?

◻ Bo tin cu spera tratamento igual cu loke mitá rumanan ta recibi? Kico bo mester haci si bo ta kere cu e tratamento ta inhusto?

◻ Menciona algun cos cu bo por haci cu por yudábo keda mihor cu bo padraso of madrasa.

[Komentario na página 45]

“Mi a pensa cu e comprometida di mi tata tabata tuma e lugar di mi mama, p’sei mi a traté mashá cruel.”

[Plachi na página 43]

Hopi bez e segundo matrimonio di bo mayornan ta cria sintimento di rencor, insiguridad, i envidia

[Plachi na página 46]

Hopi bez yiu ta carga rencor contra disiplina di padraso