Famia di Criansa Por Tin Exito

TA POSIBEL PA FAMIA DI CRIANSA TIN EXITO? SÍ, FORAL ORA TUR MIEMBRO ENBOLBI CORDA cu “tur Scritura ta inspirá di Dios i ta probechoso pa siña, pa reprendé, pa rectificá cosnan, pa disipliná den husticia.” (2 Timoteo 3:16) Ora tur hende ta aplicá principionan di Bijbel, éxito ta prácticamente garantisá.

E Cualidad Básico

Bijbel ta describí solamente algun berdadero ley cu ta dirigí relacionnan humano. Principalmente e ta animá hende pa cultivá bon cualidad i actitud cu ta guia nos pa actua di un manera sabí. E bon actitud i cualidadnan ei ta e base pa un bida di famia felis.

Por parce lógico, pero tog ta bale la pena bisa cu e cualidad básico necesario pa un famia por tin éxito ta amor. Apostel Pablo a bisa: “Laga boso amor ser sin hipocresia. . . . Den amor fraternal tene tierno cariño pa otro.” (Romanonan 12:​9, 10) Hopi hende tin un concepto robes dje palabra “amor,” pero e cualidad na cua Pablo a referí aki ta algu special. E ta amor basá riba debocion na Dios, i e no ta “faya nunca.” (1 Corintionan 13:8) Bijbel ta describié como inegoista i dispuesto pa sirbi. E ta obra activamente p’e bienestar di otro hende. E tin pacenshi i ta bondadoso, nunca e ta yalurs, bromadó ni orguyoso. E no ta busca su mes bentaha. Semper e ta cla pa tene cuenta cu circunstancianan suavisador, pa confia, pa spera, pa soportá kico cu bini.​—1 Corintionan 13:​4-7.

Amor berdadero ta yuda hende pasa por haltu di diferencia di opinion i ta uni personanan cu tin criansa i personalidad bastante distinto di otro. I e ta yuda contrarestá e efectonan devastador di un divorcio of morto di un mayor biológico. Un homber cu a bira tata di criansa ta describí su problemanan masha real: “Hopi bes mi tabata muchu preocupá cu mi mes sintimentunan pa analisá e emocionnan di mi yunan di criansa of asta di mi casá. Mi tabatin cu siña ser ménos sensitivo. Mas importante, mi tabatin cu siña ser humilde.” Amor a yud’é haci e cambionan necesario.

E Mayor Biológico

Amor por yuda den atendé cu e relacion dje muchanan cu nan mayor biológico cu awor no t’ei mas. Un tata di criansa ta confesá: “Mi tabata kier pa mi yunan di criansa tin mas cariño pa ami cu pa otro hende. Ora nan tabata bishitá nan tata biológico, tabata difícil pa resistí e tentacion di critik’é. Ora nan tabata bin cas bek despues di a pasa un dia agradabel cuné, mi tabata sinti mi masha malu. Ora nan a pasa un mal dia cuné, ami tabata felis. Realmente, mi tabatin miedu di perde nan. Un dje cosnan di mas difícil tabata pa yega na realisá i aceptá e importancia dje tata biológico su papel den bida di mi yunan di criansa.”

Amor genuino a yuda e tata di criansa aki enfrentá e echo cu tabata irealístico pa spera amor “instantáneo.” E no mester a sinti su mes rechasá ora e yunan no a acept’é mesora. El a bin realisá cu e nunca lo por a reemplasá e tata biológico completamente den curason di su yunan. E muchanan a conocé e homber aki for di nan promé añanan di bida, miéntras cu e tata di criansa tabata un recien yegá cu mester a lucha pa gana e amor dje yunan. E investigadó Elizabeth Einstein ta reflehá e experencia di hopi persona ora e bisa: “Hamas bo por reemplasá e tata biológico​—hamas. Asta un mayor cu ta morto of unu cu a bandoná e yunan, ta retené un lugá importante den bida dje yunan.”

Disiplina​—Un Tema Delicado

Bijbel ta indicá cu disiplina amoroso ta esencial pa hóbennan, i esei ta incluí yu di criansa. (Proverbionan 8:33) Hopi profesional a cuminsá reconocé e posicion di Bijbel riba esaki. Profesor Ceres Alves de Araújo a declará: “Di naturalesa ningun hende ta gusta límite, pero nan ta necesario. ‘No’ ta un palabra di proteccion.”

Sin embargo, den un famia mesclá, punto di bista riba disiplina por hiba na desacuerdonan serio. Yunan di criansa a ser formá parcialmente dor di un adulto cu awor ta ausente. Probablemente, nan tin hábito of custumbernan cu por iritá e mayor di criansa. I probablemente nan no ta comprendé pakico e mayor di criansa tin opinion fuerte riba cierto asuntunan. Con bo por trata cu e situacion na un manera exitoso? Pablo ta exhortá cristiannan: “Sigui tras di . . . amor, awante, genio suave.” (1 Timoteo 6:11) Amor cristian ta yuda tantu e mayor di criansa como e yunan ser suave i mustra pacenshi segun cu nan ta siña comprendé otro. Si e mayor di criansa ta impaciente, ‘furia, rabia i abla ofensivo’ por ruiná lihé cualkier relacion cu nan a logra crea.​—Efesionan 4:31.

Profeta Mikéas a duna comprendimentu penetrante den loke lo yuda den esaki. El a bisa: “Kico Jehova ta pidi bek di bo sino di ehercé husticia i stima bondad i sea modesto canando cu bo Dios?” (Mikéas 6:8) Husticia ta vital ora di duna disiplina. Pero kico di bondad? Un anciano cristian ta conta cu hopi bes tabata difícil pa lanta su yunan di criansa riba diadomingo mainta pa bai reunion di congregacion. En bes di zundra nan, el a purba cu bondad. E tabata lanta trempan, prepará desayuno, anto hiba co’i keinta stoma pa cada un di nan. Como resultado, nan tabata muchu mas incliná pa haci caso di su peticion pa lanta riba.

Profesor Ana Luisa Vieira de Mattos a duna e siguiente comentario interesante: “No ta e tipo di famia ta importante, sino e calidad dje relacion. Den mi estudionan mi a ripará cu hóbennan cu tin problema di comportacion casi semper ta bini di famianan den cua tin un supervision swak di parti dje mayornan, falta di regla i comunicacion.” El a bisa tambe: “Bo no por caba di enfatisá cu lantamentu di yu ta implicá e necesidad pa bisa no.” Ademas, e specialistanan Emily i John Visher a declará: “Básicamente, disiplina ta funcioná solamente ora e persona cu ta ricibí e disiplina tin interes den e reaccionnan dje persona cu ta dunando e disiplina, i tambe den su relacion cuné.”

E remarkenan aki ta pone dede riba e pregunta di ken den famianan di criansa mester duna e disiplina. Ken mester ta esun pa bisa no? Despues di a papia riba e asuntu, algun mayor a dicidí cu, pa cuminsá, e mayor biológico mester ta esun principal pa duna disiplina i asina permití tempu p’e mayor di criansa edificá un relacion mas estrecho cu e yunan. Laga e yunan siña sinti nan sigur dje amor cu e mayor di criansa tin pa nan promé cu e disipliná nan.

Kico si e mayor di criansa ta e tata? Bijbel no ta bisa cu e tata ta cabes dje famia? Sí. (Efesionan 5:​22, 23; 6:​1, 2) Sin embargo, un tata di criansa lo por deseá di delegá e asuntu di disiplina pa un tempu, specialmente si esei ta enbolbé castigu. Lo e por permití e yunan obedecé ‘e ley di nan mama’ miéntras e ta pone un fundeshi pa nan ‘scucha n’e disiplina di nan tata [nobo].’ (Proverbionan 1:8; 6:20; 31:1) Evidencia ta mustra cu, al fin i al cabo, esaki no ta bai contra e principio di hefatura. Ademas, un tata di criansa ta bisa: “Mi a corda cu disiplina ta encerá spiertamentu, coreccion i reprendementu. Ora duna esaki den un manera hustu, amoroso i compasivo i apoy’é cu ehempel di mayor, generalmente e ta duna resultado.”

Mayornan Mester Comunicá

Proverbionan 15:22 ta bisa: “Plannan ta frustra ora no tin papiamentu confidencial.” Den un famia di criansa, papiamentu calmu i confidencial entre mayornan ta vital. Un columnista dje korant O Estado de S. Paulo a remarcá: “Semper yunan tin tendencia di test e límitenan cu e mayornan ta pone wak te con leu nan por bai cu nan mayornan.” Esei ta conta asta mas den famia di criansa. P’esei, e mayornan mester yega na un acuerdo riba diferente asuntu p’e yunan por mira cu nan ta uní. Pero kico si un mayor di criansa ta actua di un manera cu e mayor biológico ta haña ta inhustu? E ora ei nan dos mester resolvé e asuntu den privá, no dilanti e yunan.

Un mama cu a casa di nobo ta conta: “E cos di mas difícil pa un mama ta di mira e tata di criansa disipliná su yunan, foral ora e sinti cu e tata di criansa ta actua muchu lihé of no ta realmente hustu. Esei ta kibra su curason, i e kier defendé su yunan. Na oranan asina, ta duru pa keda sumiso n’e casá i apoy’é.

Na un ocasion, mi dos yu hombernan di 12 i 14 aña, a pidi nan tata di criansa permit pa haci algu. El a nenga mesora anto a sali for di sala sin duna e muchanan oportunidad pa splica pakico e peticion tabata importante pa nan. E muchanan tabata cla pa yora, i ami no tabata sa kico pa bisa. Esun mas grandi a wak mi i bisa: ‘Mami a mira kico el a haci?’ Mi a contestá: ‘Sí, mi a mira. Pero ta e ta cabes di cas ainda, i Bijbel ta bisa nos pa respetá hefatura.’ Nan tabata bon mucha i a bai eens cu esaki, i nan a calma un tiki. E mésun anochi ei, mi a splica mi esposo e asuntu, i el a realisá cu e tabata muchu autoritario. El a bai derechitu den kamber dje muchanan i a pidi nan despensa.

Nos a siña hopi for dje incidente ei. Mi casá a siña pa scucha promé cu e tuma decision. Ami a siña pa apoyá e principio di hefatura, asta ora esei ta difícil. E muchanan a siña e importancia di ser sumiso. (Colosensenan 3:​18, 19) I mi casá su despensa sincero a siña nos tur un les importante den humildad. (Proverbionan 29:23) Awe, tur dos yu ta anciano cristian.”

Hende lo haci fout. Muchanan lo sigui bisa of haci cosnan cu ta haci dolor. Presion di momento lo pone mayornan di criansa actua di un manera irazonabel. Sin embargo, e palabranan simpel ei, “Sori, pordoná mi por fabor,” por contribuí hopi na cura herida.

Fortalecé Unidad di Famia

Tempu ta necesario pa edificá un relacion caluroso den un famia di criansa. Si bo ta un mayor di criansa, bo mester mustra empatia. Sea comprensivo, cla pa dedicá tempu n’e yunan. Hunga cu esnan mas chikitu. Sea prepará pa papia cu esnan mas grandi. Busca oportunidad pa pasa tempu huntu​—por ehempel, invitá e muchanan pa yuda cu trabou di cas, manera prepará cena of laba auto. Invitá nan pa bai cu bo i yuda bo ora bo ta bai supermarket. Ademas, gestonan chikitu di cariño por mustra e amor cu bo tin pa nan. (Claro cu tatanan di criansa mester soru di keda den e límite adecuá cu nan yu muhernan di criansa i no pone nan sinti nan incómodo. I mamanan di criansa mester corda cu tin límite pa mucha homber tambe.)

Famia di criansa por tin éxito. I hopi di nan tin éxito. Esnan mas exitoso ta esnan den cua tur e miembronan enbolbí, specialmente e mayornan, ta cultivá actitudnan corecto i expectativanan realístico. Apostel Juan a skirbi: “Stimánan, laga nos sigui stima otro, pasobra amor ta bini for di Dios.” (1 Juan 4:7) Sí, amor di curason ta e berdadero secreto di un famia di criansa felis.

[Plachinan na página 7]

FAMIA DI CRIANSA FELIS

ta pasa tempu huntu . . .

ta studia e Palabra di Dios huntu . . .

ta combersá cu otro . . .

ta traha huntu . . .