E Problemanan Tipico di Famia di Criansa

TA POSIBEL PA FAMIA DI CRIANSA TA FELIS! CON?

Famia di criansa a bira un tipo di famia comun den hopi parti di mundu. Tog, famia di criansa tin su problemanan único. Sin duda, e cos mas difícil ta lantamentu di yu. Sin embargo, manera e dos artículonan cu ta sigui lo trata di mustra, ta posibel pa lanta yu cu éxito den un ambiente di famia di criansa.

PA TRADICION, TATA I MAMANAN DI CRIANSA TA DEN UN LUS NEGATIVO. TEMPU NOS TABATA mucha, hopi di nos a tende algun version dje cuenta di Assepoester, kende a sufri masha hopi na man di su mama di criansa cruel. Muchanan na Europa ta siña e cuenta di Sneeuwwitje i e Shete Kabouternan tambe. Sneeuwwitje su mama di criansa a resultá di ta un heks malbado!

E cuentanan ei ta duna un punto di bista corecto di famia di criansa? Ta tur mayor di criansa di berdad ta asina cruel? No. Mayoria di nan kier solamente loke ta mihó p’e yunan cu nan ta heredá dor di casa cu e mama of tata. Pero nan tin cu enfrentá sí algun problema difícil inherente na bida di famia di criansa.

E Problemanan di Lantamentu di Yu

Ora un promé matrimonio fracasá, hopi bes e causa ta falta di madures dje partnernan. Den un di dos matrimonio, ta presencia dje yunan por haci e relacion tenso. Algun registro ta mustra cu mas cu 4 di cada 10 famia di cua e tata of mama ta mayor di criansa, ta caba na divorcio den e promé cincu añanan.

Kisas e pareha recien casá no ta realisá e confusion emocional, e conflictonan di lealtad i e sintimentunan di yaluzí i rencor cu binimentu di un mayor di criansa ta causa den e yunan di criansa. E yunan por sinti cu nan mayor natural tin mas cariño p’e mayor di criansa cu pa nan. Ademas, un mayor natural bandoná dor di un partner por haña cu ta difícil pa comprendé di con e yunan sí ta sigui pega na su ex-partner. Un mucha homber a purba splica su bon relacion cu su tata biológico, bisando: “Mami, mi sa cu Papi a tratá bo malu, pero pa ami e tabata bon!” Aunke un expresion asina ta onesto, e por pone un mama sinti rencor amargo contra tata di su yu.

Un tata di criansa a confesá: “Mi no tabata realmente prepará pa trata cu tur e problemanan relacioná cu lantamentu di mi yunan di criansa. Mi a drenta e situacion pensando cu awor cu mi a casa cu nan mama, ami ta nan tata. Masha simpel! Mi no a comprendé di con e yunan a sigui pegá na nan tata biológico, i mi a cometé hopi ekibocacion.”

Tension por surgi foral den e asuntu di disiplina. Yunan tin mester di disiplina amoroso, pero hopi bes nan ta rebelá contra dje asta ora e bini di un mayor natural. Ban corda ora e bini di un mayor di criansa! Por lo general, ora un yu di criansa hañ’é cu tal disiplina, lo e bisa algu manera: “Bo’n ta mi tata!” E palabranan ei por ta hopi devastador pa un mayor di criansa cu tin bon intencion!

Por lanta yu cu éxito den un famia mesclá? Mayornan di criansa por hunga un papel positivo den edificá un famia di criansa exitoso? E contesta riba ámbos pregunta ta afirmativo si tur persona enbolbí sigui e conseho den Bijbel, Dios su Palabra inspirá.

[Plachi na página 3]

“Bo’n ta mi tata!”