Capítulo 28
Pregunta tocante yunamento
CASI un aña a pasa desde cu Jesús a asisti ne pascu hudío di aña 30 EC. Ya caba, Juan bautista tabata encarcelá pa varios luna. Aunque e tabata kier pa su disípelnan bira sigidor di Cristo, nan tur no a haci esei ainda.
Awor algun disípel di Juan encarcelá a acudi na Jesús i a puntra: “Pakico nos i fariseo ta practica yunamento pero bo disípelnan no ta yuna?” Fariseo a practica yunamento dos bez pa siman como un ceremonia di nan religion. I ta posibel cu disípel di Juan a sigi un costumber similar. També tabata posibel cu nan a yuna pa lamenta e encarcelacion di Juan i nan a puntra pakico disípel di Jesús no a participa cu nan den tal expresion di desconsuelo.
Contestando, Jesús a splica: “Amigo di bruidegom no tin motibo pa lamenta tan tempo cu e bruidegom ta cerca nan, no ta berdad? Pero dianan ta bini ora e bruidegom lo ser kitá foi nan, anto nan lo yuna.”
Disípel di Juan mester a corda cu Juan mes a menciona Jesús como e Bruidegom. Pues, mientras cu Jesús tabata presente, Juan no por a considera cu tabata apropiado pa yuna, ni disípel di Jesús. Despues, ora Jesús a muri, su disípelnan sí a lamenta i a yuna. Pero ora e tabata resusitá i a subi den cielo, nan no tabatin motibo mas pa yuna den lamentacion.
Anto, Jesús a conta e sigiente comparacion: “Ningun hende ta cose lapi di paña no gekrimp riba bistí exterior bieu; pasobra tur su forza por ranqué for dje paña exterior i e kibrá lo bira pior. Tampoco hende no ta pone biña nobo den sacu di cuero bieu; pero si acaso nan hacié, anto e sacu di cuero ta kibra i e biña ta basha i e sacu di cuero ta daña. Ma hende ta pone biña nobo den sacu di cuero nobo.” Kico comparacion asina tin cu ber cu yunamento?
Jesús tabata yuda disípel di Juan bautista comprende cu ningun hende por spera pa sigidor di dje conformánan cu costumber bieu di hudaísmo, tal como e ceremonia di yunamento. Jesús no a bini pa lapi i prolonga e sistema bieu i anticuado di adoracion cu tabata cla caba pa ser kitá. Cristianismo no tabata trahá na semehanza di hudaísmo dje tempo ei cu su tradicion di hende. No, e no tabata manera un lapi nobo riba paña bieu ni manera biña nobo den sacu di cuero bieu. Mateo 9:14-17; Marco 2:18-22; Lucas 5:33-39; Juan 3:27-29.
▪ Ken a practica yunamento, i pa ki propósito?
▪ Pakico disípel di Jesús no a yuna mientras cu e tabata cerca nan, i mas tardi con e motibo di yunamento a desparce pronto?
▪ Cua comparacion Jesús a conta, i kico nan kier men?