Dios Ta Rekeri Yunamentu?

E LEY di Dios mediante Moises a rekerí pa hende yuna na solamente un ocasion—riba e Dia anual di Expiacion. E Ley a manda pa riba e dia ei e israelitanan ‘afligí nan alma,’ for di cua nos por concluí cu nan a yuna. (Levítico 16:29-31; 23:27; Salmo 35:13) Sin embargo, e yunamentu aki no tabata un simpel formalidad. Wardamentu dje Dia di Expiacion a impulsá e pueblo di Israel na mayor conciencia di nan estado pecaminoso i dje necesidad di ser redimí. Nan a yuna riba e dia ei tambe pa expresá duele pa nan picánan i repentimentu dilanti Dios.

Aunke esaki tabata e único yunamentu obligatorio bou dje Ley di Moises, e israelitanan a yuna na otro ocasionnan tambe. (Exodo 34:28; 1 Samuel 7:6; 2 Crónicanan 20:3; Esdras 8:21; Ester 4:3, 16) Incluí entre esakinan tabatin yunamentunan boluntario como un medio pa desplegá repentimentu. Jehova a urgi e pueblo desobediente di Huda: “Bolbe na mi cu tur boso curason, i cu yunamentu i cu yoramentu i cu gritunan di yoramentu.” Esaki no mester tabata un manifestacion exterior, pasobra Dios ta sigui bisa: “Sker boso curason, i no boso paña.”—Joël 2:12-15.

Cu tempu, hopi israelita tabata yuna como un formalidad pa bista di hende. Jehova a detestá tal yunamentu insincero i p’esei a puntra e israelitanan hipócrita: “E yunamentu cu ami ta scoge mester bira mescos cu esaki, manera un dia pa hende terenal afligí su alma? Pa incliná su cabes manera un richi, i pa e habri un simpel paña di sacu i shinishi como su cama? Esaki ta loke bo ta yama un yunamentu i un dia aceptabel pa Jehova?” (Isaías 58:5) En bes di haci un exhibicion grandioso di nan yunamentu, Dios a manda e hendenan desobediente aki producí obra cu ta pas cu repentimentu.

Algun yunamentu cu e hudiunan a establecé a ser desaprobá dor di Dios for di cuminsamentu mes. Por ehempel, un tempu e pueblo di Huda tabatin cuater yunamentu anual pa conmemorá e sucesonan calamitoso relacioná cu Jerusalem su sitiamentu i desolacion den siglo shete P.E.C. (2 Reynan 25:1-4, 8, 9, 22-26; Zacarías 8:19) Despues cu e hudiunan a ser librá for di cautiverio na Babilonia, Jehova a bisa mediante profeta Zacarías: “Ora boso tabata yuna . . . , i esaki pa setenta aña, boso realmente tabata yuna pa mi, sí pa mi?” Dios no a aprobá dje ayunonan aki pasobra e hudiunan tabata yuna i lamentá riba huicionan cu a bini for di Jehova mes. Nan tabata yuna debí n’e calamidad cu a bini riba nan, no debí na nan mes malecho cu a hiba na dje. Despues cu nan a ser restorá na nan patria, tabata tempu pa nan alegrá en bes di lamentá e pasado.—Zacarías 7:5.

Yunamentu Ta pa Cristiannan?

Aunke Jesucristo nunca no a manda su disipelnan yuna, e i su siguidornan a yuna riba Dia di Expiacion pasobra nan tabata bou dje Ley di Moises. Ademas, algun di su disipelnan a yuna boluntariamente na otro ocasionnan, ya cu Jesus no a manda nan evitá e custumber totalmente. (Echonan 13:2, 3; 14:23) Sin embargo, nan nunca mester a “desfigurá nan cara pa nan por parce na hende cu nan ta yuna.” (Mateo 6:16) Un manifestacion exterior asina di piedad por trece miradanan di admiracion i expresionnan di aprobacion for di otro hende. No obstante, un exhibicion grandioso asina no ta agradá Dios.—Mateo 6:17, 18.

Tambe Jesus a papia dje yunamentu di su disipelnan n’e tempu di su morto. E no tabata instituyendo dje manera ei un yunamentu ritual. Mas bien, e tabata indicando un reaccion riba e tristesa profundo cu nan lo a pasa den. Una bes el a ser resucitá, lo e tabata cu nan atrobe, i lo no tabatin un motibu asina mas pa nan yuna.—Lucas 5:34, 35.

E Ley di Moises a terminá ora “Cristo a ser ofrecí una bes pa semper pa carga e picánan di hopi.” (Hebreonan 9:24-28) I cu e fin dje Ley, e mandamentu pa yuna riba Dia di Expiacion a terminá. Pues, e único yunamentu obligatorio cu ta ser mencioná den Bijbel a ser eliminá.

Kico di Cuaresma?

Kico anto, ta e base pa cristiandad su custumber di yuna durante cuaresma? Tantu Iglesia Católico como Protestant ta reconocé cuaresma, aunke e manera di observ’é ta varia di iglesia pa iglesia. Algun ta come solamente un cuminda pa dia durante henter e periodo di 40 dia promé cu Pascu di Resureccion. Otronan ta yuna totalmente solamente riba Diarason di Shinishi i Bierne Santu. Pa algun, cuaresma ta rekerí pa abstené for di carni, piscá, webu i productonan di lechi.

Cuaresma supuestamente ta basá riba Jesus su ayuno di 40 dia despues di su bautismo. E tabata estableciendo e tempu ei un ritual pa hende sigui anualmente? Di ningun manera. Esaki ta bisto for dje echo cu Bijbel no ta registrá ningun custumber asina entre e cristiannan di promé. Hende a observá cuaresma pa promé bes den siglo cuater despues di Cristo. Mescos cu hopi otro siñansa di cristiandad, el a ser adoptá for di fuentenan pagano.

Si cuaresma ta un imitacion di Jesus su yunamentu den e desierto despues di su bautismo, pakico hende ta ten’é durante e simannan cu ta hiba na Pascu di Resureccion—supuestamente e tempu di su resureccion? Jesus no a yuna durante e dianan promé cu su morto. E Evangelionan ta indicá cu e i su disipelnan a bishitá casnan i a come cuminda na Betania djis un par di dia promé cu el a muri. I el a come e cena di Pascu hudiu e anochi promé cu su morto.—Mateo 26:6, 7; Lucas 22:15; Juan 12:2.

Tin algu cu nos por siña for di Jesus su yunamentu despues di su bautismo. E tabata cuminsando un ministerio vital. E vindicacion di Jehova su soberania i e futuro di henter e rasa humano tabata enbolbí. Esaki tabata un tempu pa meditacion profundo i pa acudí via oracion na Jehova pa yudansa i guia. Durante e tempu aki, apropiadamente, Jesus a yuna. Esaki ta indicá cu yunamentu por ta beneficioso ora e ser hací cu e motibu corecto i na un ocasion apropiado.—Compará cu Colosensenan 2:20-23.

Ora Yunamentu Por Ta Beneficioso

Laga nos considerá algun ocasion awe ora un adorador di Dios lo por yuna. Un persona cu a cometé un picá tal bes no tin gana di come pa un periodo di tempu. Esaki no ta pa impresioná otronan of como rabia p’e disiplina cu el a ricibí. I, naturalmente, yunamentu riba su mes lo no rectificá asuntunan cu Dios. Sin embargo, un persona berdaderamente repentí lo sinti duele profundo cu el a ofendé Jehova i probablemente amigunan i famia. Angustia i oracion ferviente pa pordon por impedí un deseo pa cuminda.

Rey David di Israel tabatin un experencia similar. Enfrentá cu e chens di perde su yu cu el a haña cu Bat-seba, el a concentrá tur su esfuersonan pa haci oracion na Jehova pa obtené misericordia relacioná cu e yu. Miéntras e tabata totalmente absorbá den oracion, el a yuna. Di igual manera, kisas no ta parce apropiado pa come bou di cierto condicionnan di tension awe.—2 Samuel 12:15-17.

Por tin tempu tambe ora un persona piadoso kier enfocá riba algun asuntu spiritual profundo. Investigacion den Bijbel i publicacionnan cristian tal bes ta necesario. Un periodo di tempu por ta necesario pa meditacion. Durante un sesion di studio profundo asina, un individuo por scoge pa no ser distraí cu comementu.—Compará cu Jeremías 36:8-10.

Tin ehempelnan bíblico di sirbidornan di Dios cu a yuna ora nan tabatin cu tuma decisionnan serio. Den tempu di Nehemías e hudiunan mester a haci un huramentu na Jehova, i nan lo a ricibí un maldicion si nan a viol’é. Nan mester a primintí pa manda nan esposanan stranhero bai i pa keda separá for dje nacionnan den becindario. Promé cu nan a haci e huramentu aki i durante e confesion di nan culpa, henter e congregacion a yuna. (Nehemías 9:1, 38; 10:29, 30) P’esei, ora un cristian ta enfrentá decisionnan pisá, lo e por opta pa no come pa un periodo di tempu corticu.

Tumamentu di decision di parti di cuerponan di anciano den e congregacion cristian di promé algun biaha tabata compañá cu yunamentu. Awe, ancianonan di congregacion, enfrentá cu decisionnan difícil, tal bes en coneccion cu un caso hudicial, por abstené di cuminda miéntras cu nan ta trata e caso.

Scoge pa yuna den cierto circunstancianan ta keda na cada individuo pa dicidí. Un persona no mester husga un otro riba e asuntu aki. Nos lo no kier “parce hustu pa hende”; ni nos no mester haci cuminda asina importante cu e ta interferí cu nos deber pa cumpli cu responsabilidadnan serio. (Mateo 23:28; Lucas 12:22, 23) I Bijbel ta mustra cu Dios no ta ni rekerí pa nos yuna ni no ta prohibí nos di yuna.

[Plachi na página 7]

Bo sa pakico Jesus a yuna pa 40 dia despues di su bautismo?