Dikon Hesus Su Disipelnan No Tabata Yuna?

Huan Boutista tabatin algun tempu kaba den prizòn. Ta for di algun dia despues di e Pasku Hudiu di aña 30 di promé siglo, nan a ser’é. Huan tabata ke pa tur su disipelnan bira disipel di Hesus, pero ta algun di nan so a hasi esei durante e lunanan ku e tabata será.

Awor, un poko tempu promé ku e Pasku Hudiu di aña 31, algun di su disipelnan a bai serka Hesus i a puntr’é: “Pakiko nos ku e fariseonan tin kustumber di yuna, ma bo disipelnan sí no ta yuna?” (Mateo 9:14) Pa e fariseonan, yunamentu tabata djis un rito religioso. Mas despues, Hesus a asta konta un ilustrashon den kua un fariseo ku tabata hustu den su mes bista a hasi orashon i bisa: “O Dios, mi ta gradisí bo ku mi no ta manera otro hende . . . Mi ta yuna dos biaha pa siman.” (Lukas 18:11, 12) Podisé e disipelnan di Huan tambe tabata yuna djis pa sigui un kustumber. Òf kisas nan tabata yuna debí ku nan tabata tristu pasobra Huan tabata den prizòn. Podisé nan tabata asta puntra nan mes dikon Hesus su disipelnan no tabata yuna debí na loke a pasa ku Huan.

Usando un ehèmpel, Hesus a kontestá nan: ‘Akaso e amigunan di e brùidehòm tin motibu pa lamentá tanten ku e brùidehòm ta serka nan? Ma lo bini dia ku lo kita e brùidehòm for di nan, i e ora ei nan lo yuna.’—Mateo 9:15.

Huan mes a referí na Hesus komo e brùidehòm. (Huan 3:28, 29) P’esei, ora Hesus tabata presente, Hesus su disipelnan no tabata yuna. Pero despues sí, ora Hesus lo a muri, su disipelnan lo tabata tristu i lo a asta pèrdè apetit. Ma ki un gran goso nan lo tabatin ora Hesus a resusitá. Nan no tabatin motibu mas pa ta tristu i yuna.

Despues di a kontestá nan ku e ehèmpel ei, Hesus a konta nan dos ilustrashon. El a bisa: “Ningun hende no sa kose lapi di paña nobo riba un paña bieu, pasobra e paña nobo lo kremp i e sker lo bira pió. Tampoko hende no sa pone biña nobo den saku di biña bieu. Si nan hasié, e saku di biña lo rementá i e biña lo basha abou i e saku di biña lo bai pèrdí. Mas bien, hende ta pone biña nobo den saku di biña nobo.” (Mateo 9:16, 17) Kiko tabata Hesus su punto?

Wèl, Hesus tabata ke yuda e disipelnan di Huan komprondé ku niun hende no mester a spera ku Hesus su siguidónan lo a sigui ku kustumbernan bieu di hudaismo, tal komo yunamentu. Hesus no a bini pa lapi i prolongá e sistema bieu i antikuá di adorá Dios ku tabata a punto di ser eliminá. E adorashon ku Hesus tabata enkurashá hende pa rindi na Dios no tabata basá riba hudaismo ni su tradishonnan ku hende a bini kuné. Pues, Hesus no tabata purba di lapi paña nobo na paña bieu ni pone biña nobo den saku di biña bieu.