Capítulo 62

Un les den humildad

DESPUES di a cura e mucha homber endemoniá den e region cerca Cesarea Filipo, Jesús kier a bai cas den Capernaum. Pero e kier a bai so cu su disípelnan pe por dúnanan mas preparacion pa su morto i nan responsabilidad despues. El a splícanan: “E Yiu di hende lo ser entrega na man di hende i nan lo maté, pero, apesar di su morto, lo e lanta tres dia despues.”

Aunque Jesús a papia tocante esei caba, i e tres apóstol a mira su transformacion durante locual nan a papia tocante su “despidida,” su sigidornan ainda no tabatin comprendimento dje asunto. Aunque ningun di nan a purba di nenga cu lo e ser matá, manera Pedro a haci caba, nan tabatin miedu di hacié mas pregunta tocante dje.

Cu tempo nan a yega na Capernaum, locual tabata manera un sorto di centro durante e ministerio di Jesús. Esei també tabata e stad unda Pedro a biba i varios otro apóstol. Den Capernaum, homber cu a cobra belasting pe tempel a yega cerca Pedro. Kizás den un esfuerzo pa enbolbe Jesús den violacion di nan costumber, nan a puntra: “Bo maestro no ta paga e belasting [di tempel] di dos dracma?”

Pedro a contesta cu “Sí.”

Jesús, cu por a yega ne cas un poco despues, tabata sa loke a pasa. Pues, asta promé cu Pedro por menciona e asunto, Jesús a puntra: “Kico bo ta pensa, Simón? Di ken rey di tera ta recibi contribucion of belasting personal? For di nan yiu of for di stranhero?”

Pedro a contesta: “For di stranhero.”

Jesús a bisa: “Realmente, anto, e yiunan ta liber di belasting.” Siendo cu e Tata di Jesús ta Rey di universo, Esun cu nan a adora den e tempel, realmente no ta un requisito legal pe Yiu di Dios paga belasting di tempel. “Pero,” Jesús a bisa, “pa nos no hácinan trompica, bai lamá, tira ansué, i tuma e promé piscá cu ta subi i, ora bo habri su boca, bo por haya placa di un stater. Tuma esei i duné na nan pa mi i pa bo.”

Ora e disípelnan tabata hunto despues di a bolbe na Capernaum, kizás den e cas di Pedro, nan a puntra: “Ken realmente ta mayor den e reino di cielo?” Jesús sa kico a impulsa e pregunta, ya cu e tabata sa di nan discusion ora nan tabata camna tras di dje bolbiendo for di Cesarea Filipo. P’sei Jesús a puntra: “Kico boso tabata debati riba camina?” Yen di bergüenza, e disípelnan a keda ketu, pasobra nan tabata debati cu otro riba ken ta mayor.

Despues di casi tres aña di siñamento di Jesús, no ta parce increíbel cu e disípelnan a debati esei? Wel, esei ta mustra e influencia fuerte di imperfeccion humano, i també un pasado religioso. E religion hudío den locual e disípelnan a lanta a duna énfasis na puesto of rango den tur su tratamento. Además, kizás, Pedro, debí ne promesa di Jesús di recibi cierto “yabi” di Reino, a sintié superior. Kizás Santiago i Juan a tene idea similar ya cu nan a recibi e fabor di ser presente durante e transformacion di Jesús.

Sea loke sea e caso, Jesús a presenta un demonstracion conmovedor den un esfuerzo pa corrigi nan actitud. El a yama un mucha cerca dje, a hacié para dilanti nan, a tené den su braza i a bisa: “Amenos cu boso bira i yega di ser manera un mucha, boso di ningun manera lo drenta den e reino di cielo. P’sei, ken cu humiyá su mes manera e mucha aki ta esun cu ta mayor den e reino di cielo; i ken cu recibi un mucha asina riba base di mi nomber ta recibími també.”

Ki un manera maraviyoso pa corrigi su disípelnan! Jesús no a rabia cu nan ni no a yámanan soberbe, haragán, of ambicioso. No, ma el a ilustra e les di correccion usando ehempel di mucha, cu tin carácter modesto i ta liber di ambicion i cu generalmente no tin ningun idea di rango den nan. Asina Jesús a mustra cu su disípelnan tabatin cu desaroya tal calidad di carácter di mucha humilde. Manera Jesús a conclui: “Ken cu comportele como uno menor den boso tur ta esun cu ta grandi.” Mateo 17:22-27; 18:1-5; Marco 9:30-37; Lucas 9:43-48.

▪ Ora nan a bolbe na Capernaum, Jesús a repiti cua siñanza, i con nan a recibié?

▪ Pakico Jesús no tabata bao di obligacion di paga belasting di tempel, pero pakico el a pagué?

▪ Kico kizás a contribui ne argumento dje disípelnan, i con Jesús a corrigínan?