Lès 11

Creencianan i Custumbernan Cu Ta Desagradá Dios

Ki clase di creencia i custumbernan ta incorecto? (1)

Cristiannan mester kere cu Dios ta un Trinidad? (2)

Pakico cristiannan berdadero no ta celebrá Pascu di Nacementu, Pascu di Resureccion of cumpleaño? (3, 4)

E mortonan por haci daño na e bibunan? (5)

Jesus a muri na crus? (6)

Con importante ta pa agradá Dios? (7)

1. No tur creencia i custumber ta malu. Pero Dios no ta aprobá di nan si nan ta bini di religion falsu of ta contra siñansanan di Bijbel.—Mateo 15:6.

2. Trinidad: Jehova ta un Trinidad—tres persona den un Dios? No! Jehova, e Tata, ta “e único Dios berdadero.” (Juan 17:3; Marco 12:29) Jesus ta Su Yu primogénito i e ta bou dje autoridad di Dios. (1 Corintionan 11:3) E Tata ta mayor cu e Yu. (Juan 14:28) E spiritu santu no ta un persona; esei ta e forsa activo di Dios.—Génesis 1:2; Echonan 2:18.

3. Pascu di Nacementu i Pascu di Resureccion: Jesus no a nace dia 25 di december. El a nace rond di 1 di october, na un tempu ora e wardadornan di carné tabatin nan tounan pafó den anochi. (Lucas 2:8-12) Jesus nunca a manda cristiannan pa celebrá su nacementu. Mas bien, el a bisa su disipelnan pa conmemorá, of recordá, su morto. (Lucas 22:19, 20) Pascu di Nacementu i su custumbernan ta bini for di religionnan falsu di antigwedad. Mescos ta cierto di custumbernan di Pascu di Resureccion, manera e uso di webu i konenchi. E cristiannan di promé no a celebrá Pascu di Nacementu ni Pascu di Resureccion, i awe cristiannan berdadero tampoco ta haci esei.

4. Cumpleaño: E único dos celebracionnan di cumpleaño cu Bijbel ta papia di dje a ser tené dor di personanan cu no tabata adorá Jehova. (Génesis 40:20-22; Marco 6:21, 22, 24-27) E cristiannan di promé no a celebrá cumpleaño. E custumber di celebrá cumpleaño ta bini di religionnan falsu di antigwedad. Cristiannan berdadero ta duna regalo i ta pasa bon huntu na otro tempunan durante e aña.

5. Miedu dje Mortonan: E mortonan no por haci nada ni por sinti nada. Nos no por yuda nan ni nan no por haci nos daño. (Salmo 146:4; Eclesiástes 9:5, 10) E alma ta muri; e no ta sigui biba despues di morto. (Ezekiel 18:4) Pero tin biaha angelnan malbado, yamá demoñonan, ta pretendé di ser spiritu di hende morto. Cualkier custumber cu tin di haci cu miedu dje mortonan of cu adoracion na nan ta incorecto.—Isaías 8:19.

6. Crus: Jesus no a muri na crus. El a muri na un biga, of un staca. E palabra griego traducí cu “crus” den hopi Bijbel a nificá djis un solo pida palu. E símbolo dje crus ta bini di religionnan falsu di antigwedad. Cristiannan di promé no a usa ni a adorá e crus. P’esei, bo ta kere cu lo ta corecto pa usa un crus den adoracion?—Deuteronomio 7:26; 1 Corintionan 10:14.

7. Kisas ta hopi difícil pa bandoná algun dje creencia i custumbernan aki. Famianan i amigunan tal bes ta purba di convencé bo pa no cambia bo creencianan. Pero agradá Dios ta mas importante cu agradá hende.—Proverbionan 29:25; Mateo 10:36, 37.

[Plachi na página 22]

Dios no ta un Trinidad

[Plachi na página 23]

Pascu di Nacementu i Pascu di Resureccion ta bini di religionnan falsu di antigwedad

[Plachi na página 23]

No tin motibu pa adorá e mortonan of tene miedu di nan