Dikon Testigunan di Yehova No Ta Selebrá Pasku di Resurekshon?
Algun idea robes
Mito: Testigunan di Yehova no ta selebrá Pasku di Resurekshon pasobra nan no ta kristian.
Realidat: Nos ta kere ku Hesukristu ta nos Salbador i nos ta hasi esfuerso pa “sigui su pasonan fielmente.”—1 Pedro 2:21; Lukas 2:11.
Mito: Boso no ta kere ku Hesus a ser resusitá.
Realidat: Nos ta konvensí ku Hesus a ser resusitá, i e siñansa ei ta un siñansa fundamental di nos fe kristian. Ademas, resurekshon di Hesus ta un mensahe importante ku nos ta prediká.—1 Korintionan 15:3, 4, 12-15.
Mito: Boso ta stroba boso yunan di disfrutá di e fiestanan di Pasku di Resurekshon.
Realidat: Nos ta stima nos yunan, i nos ta hasi esfuerso pa eduká nan i yuda nan pa nan por ta felis.—Tito 2:4.
Dikon Testigunan di Yehova no ta selebrá Pasku di Resurekshon?
Pasku di Resurekshon no ta basá riba Beibel.
Hesus a instruí nos pa rekordá su morto, no su resurekshon. Nos ta rekordá su morto tur aña riba e fecha ku el a muri segun e kalènder lunar di tempu bíbliko.—Lukas 22:19, 20.
Nos ta kere ku e orígen di Pasku di Resurekshon, ku ta bini di rito antiguo di fertilidat, ta hasi Pasku di Resurekshon un fiesta inaseptabel pa Dios. Dios ke pa nos ‘adorá e so,’ i e ta sintié ofendí si nos adorashon na dje ta inkluí práktika ku e no ta aprobá.—Éksodo 20:5; 1 Reinan 18:21.
Nos ta konvensí ku nos desishon pa no selebrá Pasku di Resurekshon ta firmemente basá riba Beibel. Beibel ta animá nos pa usa sabiduria i diskreshon en bes di djis sigui tradishon di hende. (Proverbionan 3:21; Mateo 15:3) Aunke nos ta splika nos opinion tokante Pasku di Resurekshon ora hende puntra nos, nos ta respetá kada persona su derecho di disidí kiko e ke hasi.—1 Pedro 3:15.