Pasku di Resurekshon Ta un Fiesta Kristian?

E Encyclopædia Britannica ta deskribí Pasku di Resurekshon komo “e fiesta di mas importante di iglesia kristian.” Pero Pasku di Resurekshon ta un fiesta kristian?

Si bo ke sa si un artefakto ta outéntiko, bo tin ku analisá su detayenan. Di mes manera, pa nos sa si Pasku di Resurekshon ta un fiesta kristian, ta importante pa nos analisá e detayenan ku tin di haber ku e fiesta akí.

Di promé, Hesus a instruí su siguidónan pa rekordá su morto, no su resurekshon. Apòstel Pablo a yama e okashon ei “e sena di Señor.”—1 Korintionan 11:20; Lukas 22:19, 20.

Ademas, segun e Encyclopædia Britannica, hopi di e tradishonnan di Pasku di Resurekshon “no tin nada di haber” ku e resurekshon di Hesus; mas bien, nan “ta bini di kustumbernan popular.” Por ehèmpel, The Encyclopedia of Religion ta bisa lo siguiente tokante e kustumber di usa webu i konènchi: “E webu ta representá un bida nobo ku ta kibra pasa dor di e kaska duru, ku ta un símbolo di morto.” E ta bisa tambe: “Konènchi ta konosí komo un bestia hopi fértil, i p’esei e ta simbolisá komienso di e temporada di lènte.”

Philippe Walter, un profèser di literatura di Edat Medio, ta splika kon e tipo di kustumbernan ei a bira parti di e fiesta di Pasku di Resurekshon. El a skirbi ku Pasku di Resurekshon tabata un selebrashon di “e kambio di klima for di e punto mas friu di wenter, kaminda tur kos ta parse morto, te na e temporada di lènte ora tur kos ta bolbe biba.” El a sigui bisa ku “durante di e proseso di kombertí hende na religion kristian” tabata fásil pa asosiá e fiesta pagano akí ku e resurekshon di Hesus. Ademas, Walter a bisa ku esaki tabata un paso importante pa inkluí “fiestanan kristian” riba e kalènder pagano, loke a habri kaminda pa hopi hende kombertí.

E proseso di “kombertí hende na religion kristian” no a sosodé tempu ku e apòstelnan tabata na bida pasobra nan a fungi komo un “frena” kontra influensia pagano. (2 Tesalonisensenan 2:7) Apòstel Pablo a spièrta ku despues ku lo e ‘no tabat’ei mas, lo a lanta hòmbernan ku lo a trose e bèrdat pa pone e disipelnan bai nan tras.’ (Echonan 20:29, 30) I na final di e promé siglo, apòstel Huan a skirbi ku ya kaba algun hende tabata gaña e kristiannan. (1 Huan 2:18, 26) Pues tabata fásil pa nan kuminsá aseptá kustumbernan pagano.

Algun hende por a pensa ku no tabatin nada malu den aseptá sierto di e kustumbernan akí, pasobra esei lo a yuda “e paganonan” komprondé e nifikashon di Hesus su resurekshon mas mihó. Pero Pablo lo no tabata di akuerdo ku esei. Maske el a ser eksponé na hopi kustumber pagano ora e tabata bai di un lugá pa otro den e Imperio Romano, nunka el a adoptá un di nan pa yuda hende haña un mihó komprondementu di Hesus. Al kontrario, el a spièrta e kristiannan: “No uni ku hende ku no ta kreyente. Pasobra ki relashon hustisia tin ku maldat? Òf kiko lus tin en komun ku skuridat? ‘P’esei, sali for di meimei di nan, i separá boso,’ Yehova ta bisa, ‘i stòp di mishi ku loke ta impuru.’”—2 Korintionan 6:14, 17.

Pues, despues di a analisá e detayenan akí, na ki konklushon nos por yega? Nos por mira bon kla ku Pasku di Resurekshon no ta un fiesta kristian.