Pascu di Resureccion of Memorial—Cua Bo Mester Celebrá?

SEGUN cu aurora ta plama su briyo riba horizonte dia 7 di april, miyones di hende lo yama bon biní na nan dia mas santu dje aña—Pascu di Resureccion. Na un tempu e nomber a aplicá na un periodo di 120 dia di bankete i yunamentu cu a cuminsá cu un dia di fiesta yamá Septuagésima i a terminá riba loke ta ser yamá Dia di Trinidad. Awe e nomber Pascu di Resureccion ta ser aplicá na un solo dia conmemorando e resureccion di Jesus—Domingo di Resureccion.

Sin embargo, un par di anochi mas promé den e mésun siman ei, otro miyones di hende lo reuní pa celebrá e Memorial di Cristo su morto, conocí tambe como e Cena di Señor. Esei ta un celebracion cu Jesus mes a instituí riba su último anochi riba tera. N’e ocasion ei el a bisa su disipelnan: “Sigui haci esaki na mi recuerdo.”—Lucas 22:19.

Cua di nan bo mester celebrá?

E Orígen di Pascu di Resureccion

E nomber Easter (Pascu di Resureccion na ingles), usá den hopi pais, no ta ser hañá den Bijbel. E buki Medieval Holidays and Festivals [Dianan di Fiesta i Festivalnan di Edad Media] ta conta nos cu “e dia di fiesta a ser duná e nomber di e Diosa pagano di Aurora i di Primavera, Eostre.” I ken e diosa aki tabata? The American Book of Days [E Buki di Dianan di Fiesta i Aniversario Mericano] ta contestá, “Eostre tabata esun cu, segun e leyenda, a habri e portanan di Valhalla pa ricibí Baldur, yamá e Dios Blancu, debí na su puresa i yamá tambe e Dios di Solo, pasobra su frenta a suministrá lus na humanidad.” E buki ta agregá: “No tin duda cu e Iglesia den su comienso a adoptá e custumbernan bieu pagano i a duna nan un nificacion cristian. Como cu e fiesta di Eostre tabata un celebracion dje renobamentu di bida den primavera, tabata fácil pa hacié un celebracion dje resureccion di Jesus for di morto, kende su evangelio nan a predicá.”

E adopcion aki di custumbernan pagano ta splica con den cierto pais e custumbernan di Pascu di Resureccion, manera webunan di Pascu, e conenchi di Pascu i e pandushinan di Pascu cayente dorná cu crema den forma di crus, a originá. Relacioná cu e custumber di traha pandushi cayente marcá cu crus, “cu nan casca maron lombrante marcá cu un . . . crus,” e buki Easter and Its Customs [Pascu di Resureccion i Su Custumbernan] ta declará: “E crus tabata un símbolo pagano hopi tempu promé cu el a adkerí nificacion eterno for dje sucesonan dje promé Bierne Santu, i pan i bolonan tin biaha a ser marcá cu [e crus] den tempunan pre-cristian.”

Ningun caminda den e Scritura e custumbernan aki ta ser mencioná, tampoco tin ningun evidencia cu e disipelnan di Jesus di promé a kere den nan. De facto, apostel Pedro ta bisa nos pa “forma un anhelo pa e lechi no adulterá perteneciendo na e palabra, pa mediante dje [nos] por crece na salbacion.” (1 Pedro 2:2) Pues pakico e iglesianan di cristiandad a adoptá tal símbolonan claramente pagano den nan creencia i prácticanan?

E buki Curiosities of Popular Customs [Curiosidadnan di Custumbernan Popular] ta contestá: “Tabata e política invariabel dje Iglesia di promé pa duna un nificacion cristian na e cierto ceremonianan pagano existente cu no por a ser eradicá. Den e caso di Easter e combertimentu tabata specialmente fácil. Goso pa e salimentu dje solo natural, i pa e lantamentu di naturalesa for dje morto di winter, a bira goso pa e salimentu dje Solo di husticia, na e resureccion di Cristo for di graf. Algun dje celebracionnan pagano cu a tuma lugá rond di promé di mei tambe a ser cambiá pa corespondé cu e celebracion di Easter.” En bes di keda leu di custumbernan popular pagano i ritonan mágico, e lidernan religioso a aprobá nan i a duna nan “nificacion cristian.”

‘Pero tin algu malu den esei?’ tal bes bo ta puntra bo mes. Algun hende ta pensa cu no. “Ora un religion manera cristianismo ser introducí na un pueblo for di pafó, e ta adoptá i ‘bautisá’ algun custumber local dje pueblo cu a originá for di religionnan mas bieu,” segun Alan W. Watts, un capelan episcopal, den su buki Easter—Its Story and Meaning [Pascu di Resureccion—Su Historia i Nificacion]. Cristiandad “ta scoge i introducí den e liturgia celebracionnan dje pueblo cu ta parce di nificá e mésun principionan eterno siñá dor dje Iglesia.” Pa hopi hende, e echo cu nan iglesia a aprobá e celebracionnan aki i a trata nan como sagrado ta suficiente motibu pa aceptá nan. Pero preguntanan importante ta ser pasá por haltu. Kico Dios ta pensa tocante e custumbernan aki? El a duna nos cualkier indicacion pa sigui den e asuntu aki?

Hañando Dios Su Punto di Bista

“Dia di Easter, e Fiesta di Resureccion di Nos Señor, ta esun di mas grandi di tur e fiestanan dje Iglesia Cristian,” segun Christina Hole den su buki Easter and Its Customs. Otro escritornan ta di acuerdo. “Ningun dia santu of di fiesta den e aña cristian por compará na importancia cu Domingo di Resureccion,” segun Robert J. Myers ta nota den e buki Celebrations. Sin embargo, esei ta lanta algun pregunta. Si celebracion di Pascu di Resureccion ta asina importante, pakico no tin ningun mandamentu specífico den Bijbel pa haci esei? Tin cualkier registro cu Jesus su disipelnan di promé a celebrá Domingo di Resureccion?

No ta asina cu Bijbel ta keda sin duna indicacion en cuanto loke mester ser celebrá of no. Dios tabata masha specífico den declará esaki na e antiguo nacion di Israel, i manera a ser indicá anteriormente, instruccionnan explícito a ser duná pa cristiannan sigui observá e Memorial di Cristo su morto. (1 Corintionan 11:23-26; Colosensenan 2:16, 17) Un promé edicion di The Encyclopædia Britannica ta bisa nos: “No tin ningun indicacion dje celebracion dje fiesta di Pascu di Resureccion den e Testament Nobo, of den e skirbimentunan dje Tatanan apostólico. E santidad di dianan special no tabata un idea cu a existí den mente dje promé cristiannan. . . . Ni e Señor [Jesus] ni su apostelnan a prescribí e wardamentu di esaki of di cualkier otro dia di fiesta.”

Algun hende ta di opinion cu e alegria di tal dianan di fiesta i e felicidad cu nan ta trece ta suficiente hustificacion pa celebrá nan. Sin embargo, nos por siña dje ocasion ora e israelitanan a adoptá un práctica religioso egipcio i a cambia su nomber pa “un fiesta na Jehova.” Nan tambe “a sinta pa come i bebe” i “a lanta pa dibertí nan mes.” Pero nan accionnan a pone Jehova Dios rabia mashá, i el a castigá nan severamente.—Exodo 32:1-10, 25-28, 35.

E Palabra di Dios ta masha cla. E “lus” di creencianan berdadero no por tin parti cu e “scuridad” dje mundu di Satanas; no por tin “armonia” entre Cristo i adoracion pagano. Nos ta ser bisá: “‘P’esei sali for di meimei di nan, i separá boso,’ Jehova ta bisa, ‘i stop di mishi cu cos impuru’; ‘i lo mi ricibí boso.’”—2 Corintionan 6:14-18.

Siendo cu solamente e Memorial—no Pascu di Resureccion—ta ser mandá den Bijbel pa cristiannan celebrá, esei mester ser observá. Pues con nos por celebr’é dignamente?