Unda pa Acudí pa Contesta

“E teoria di sufrimentu eterno no ta compatibel cu e creencia den Dios su amor pa cosnan creá. . . . Creencia den castigu eterno dje alma p’e erornan di un par di aña, sin duna e alma un chens pa haci coreccion, ta bai contra tur lógica.”—NIKHILANANDA, FILOSOFO HINDU.

1, 2. En bista dje variedad di creencia tocante bida despues di morto, ki preguntanan ta lanta?

MESCOS cu e filósofo hindú Nikhilananda, hopi hende awe ta sinti nan incómodo cu e siñansa di tormento eterno. Pero p’e mésun motibu, otronan tin dificultad pa comprendé conceptonan manera alcansá nirvana i ser den union cu Tao.

² Sin embargo, debí n’e idea cu e alma ta inmortal, religionnan di tantu Oriente como Occidente a desaroyá un kaleidoscop confundidor di creencianan tocante bida despues di morto. Ta posibel pa haña sa e berdad tocante kico ta sosodé cu nos ora nos muri? E alma realmente ta inmortal? Unda nos por acudí pa contesta?

Ciencia i Filosofia

3. Ciencia of e método di investigacion científico ta duna contesta riba e preguntanan relacioná cu bida despues di morto?

³ Ciencia of e método di investigacion científico tin contesta pa preguntanan relacioná cu bida despues di morto? Basá riba relatonan recien di personanan cu a hera di muri of cu a sinti cu nan a ‘sali pafó di nan curpa,’ algun investigadó a purba duna comentario tocante bida despues di morto. Repasando algun di nan afirmacionnan den su discurso, “Morto Como Entrada pa Lus?,” teólogo católico Hans Küng a concluí: “E clase di experencianan aki no ta proba nada tocante un posibel bida despues di morto; aki e ta un cuestion dje último cincu minuutnan promé cu morto i no di un bida eterno despues di morto.” El a agregá: “E cuestion di un posibel bida despues di morto ta di tremendo importancia pa bida promé cu morto. E ta rekerí un contesta cu mester busca otro caminda si expertonan médico no por dun’é.”

4. Filosofia por yuda nos haña e contestanan entre e hopi posibilidadnan di bida despues di morto cu e vários religionnan ta ofrecé?

⁴ Kico di filosofia? E por yuda nos haña e contestanan entre e hopi posibilidadnan di bida despues di morto cu e vários religionnan ta ofrecé? Bertrand Russell, filósofo británico di siglo 20, ta bisa cu exploracion filosófico ta encerá “actividad speculativo.” Segun The World Book Encyclopedia, filosofia ta “un forma di investigacion: un proceso di análisis, evaluacion, interpretacion i speculacion.” Relacioná cu e tópico di bida despues di morto, speculacionnan filosófico a varia di yama inmortalidad simplemente speransa bano te na proclam’é e derecho di tur hende.

Un Fuente Unico di Contesta

5. Cua ta e buki mas bieu cu a yega di ser skirbí?

⁵ Sin embargo, tin un buki cu ta contené contestanan verídico pa preguntanan importante tocante bida i morto. E ta e buki mas bieu cu a yega di ser skirbí, di cua algun parti a ser componé un 3.500 aña pasá. E promé parti dje buki aki a ser skirbí un par di siglo promé cu a formulá e promé-promé himnonan di scritura hindú, e Vedanan, i rond di mil aña promé cu Buda, Mahāvīra i Confucio a cana riba tera. E buki aki a ser completá na 98 E.C., mas cu 500 aña promé cu Mohamed a funda islam. E fuente único aki di sabiduria superior ta Bijbel.a

6. Pakico nos por verwagt cu Bijbel ta bisa nos kico e alma ta?

⁶ Bijbel ta contené e historia di antigwedad mas exacto cu cualkier otro buki cu ta existí. E historia registrá den Bijbel ta bai bek te n’e cuminsamentu dje famia humano i ta splica con nos a bini aki riba tera. Asta e ta hiba nos bek n’e tempu promé cu hende a ser creá. Un buki asina en berdad por duna nos perspicacia den con hende a ser trahá i kico e alma ta.

7, 8. Pakico nos por acudí cu confiansa na Bijbel pa haña contestanan verídico i satisfactorio tocante loke ta sosodé ora nos muri?

⁷ Ademas, Bijbel ta un buki di profecia cu tabatin cumplimentu infalibel. Por ehempel, el a profetisá detayadamente e asenso i caida dje imperionan medo-perso i griego. E palabranan aki tabata asina exacto cu algun crítico a purba di prueba, pero en bano, cu nan a ser skirbí despues cu e sucesonan a tuma lugá. (Daniel 8:1-7, 20-22) Algun profecia registrá den Bijbel ta cumpliendo en detaye den nos mes tempu.b—Mateo, capítulo 24; Marco, capítulo 13; Lucas, capítulo 21; 2 Timoteo 3:1-5, 13.

⁸ Ningun hende, pa inteligente cu e ta, por a predicí sucesonan futuro cu asina un exactitud. Solamente e Creador di universo, todopoderoso i omnisapiente, tabata por. (2 Timoteo 3:16, 17; 2 Pedro 1:20, 21) Bijbel en berdad ta un buki cu ta bini di Dios. Sigur, un buki asina por duna nos contestanan verídico i satisfactorio tocante loke ta sosodé cu nos ora nos muri. Laga nos mira promé kico e tin di bisa tocante alma.

[Nota]

[Plachi na página 18]

E buki mas bieu cu a yega di ser skirbí

[Plachi na página 18]

Un buki cu ta duna contestanan confiabel i satisfactorio