Notisia di Reino Num. 36

E Milenio Nobo—Kico Futuro Tin pa Bo?

E Milenio Nobo—Comienso di un Era Nobo?

MEIANOCHI di 31 di december 1999, siglo 20 a terminá.a E tabata un siglo cu a mira hopi disturbio. Pero tambe el a mira comienso di tecnologia nobo, avance dramático den medicina, explosion di informacion i un crecementu rápido den economia mundial. P’esei hopi hende a ricibí e milenio nobo como un símbolo di speransa i cambio. E milenio lo mira kisas e fin di guera, pobresa, contaminacion dje medio ambiente, i malesa?

Hopi hende ta spera esei. Ki chens tin cu e milenio nobo lo producí cambionan cu ta beneficiá bo, cambionan cu lo haci bida mas ‘safe’ i sigur pa bo cu bo famia? Wak con serio djis algun dje problemanan cu nos ta enfrentá ta.

Polucion

Paisnan industrialisá ta “causa daño na escala mundial n’e medio ambiente i polucion extenso i desekilibrio di ecosistemanan.” Si e tendencia actual sigui, “e ambiente natural lo yega na punto di un colapso total.”—“Global Environment Outlook—2000” (Panorama Ambiental di Mundu—2000), Programa di Medio Ambiente di Nacionnan Uní.

Enfermedad

“Pa aña 2020, ta verwagt cu malesanan no-contagioso lo bira causante di shete di cada dies morto den regionnan desaroyá, compará cu ménos cu mitar awe.”—“The Global Burden of Disease” (E Peso Mundial di Enfermedad), Harvard University Press, 1996.

Algun experto ta afirmá cu “pa 2010, 66 miyon ménos hende [lo ta na bida] den e 23 paisnan cu tin e epidemia di [AIDS] mas severo.”—“Confronting AIDS: Evidence From the Developing World,” (Enfrentando AIDS: Evidencia for dje Mundu den Desaroyo), un informe dje Comision Europeo i di Banco Mundial.

Pobresa

“Casi 1,3 mil miyon hende ta biba cu ménos cu un dollar pa dia, i casi mil miyon hende no por cumpli cu e necesidadnan básico di alimentacion.”—“Human Development Report 1999” (Informe di Desaroyo Humano 1999), Programa di Desaroyo di Nacionnan Uní.

Guera

“Violencia entre [vários pais] lo por alcansá un nivel sin precedente. Causá pa [divisionnan] étnico, di tribu i religioso, . . . tal violencia lo forma . . . e clase di conflicto mas comun den e siguiente cuartal di siglo . . . , matando cientos di miles di hende tur aña.”—“New World Coming: American Security in the 21st Century” (Mundu Nobo Entrante: Siguridad Mericano den Siglo 21), Comision Mericano Riba Siguridad Nacional/Siglo 21.

P’esei e fanfare i excitacion cu e milenio nobo a causa, ta tapa e echo cu polucion, malesa, pobresa i guera a bira mas bisto cu nunca promé. E rais di tur e problemanan aki ta golosidad, desconfiansa i egoismo—característicanan cu no por ser eliminá djis dor di investigacion científico, tecnologia of política.

E Milenio Cu Lo Bendicioná Humanidad

Un escritor antiguo a yega di observá: “E caminda di hende terenal no ta pertenecé na dje. No ta pertenecé na hende cu ta canando pa ni sikiera dirigí su paso.” (Jeremías 10:23) Hende falta no solamente e capacidad, sino tambe e derecho pa goberná e tera. Solamente Jehova Dios, Esun cu a traha nos, tin e derecho i sa con pa resolvé problemanan di humanidad.—Romanonan 11:33-36; Revelacion 4:11.

Pero ki dia? Con? E evidencia cu nos ta cerca dje fin di “e último dianan” ta convincente. Por fabor, habri bo Bijbel i lesa 2 Timoteo 3:1-5. E ta describí na un manera bibu e característicanan di personalidad cu hende lo desplegá durante e “tempu crítico” aki. Mateo 24:3-14 i Lucas 21:10, 11 tambe ta describí “e último dianan.” Einan e enfoke ta riba sucesonan físico cu a tuma lugá desde 1914, tal como guera mundial, pest i scarcedad di cuminda tur caminda.

Pronto “e último dianan” lo caba. Daniel 2:44 ta bisa: “E Dios di shelu lo establecé un reino cu nunca lo no ser reducí na ruina. . . . Lo e aplastá i pone un fin na tur e reinonan [terenal] aki, i e mes lo permanecé te na tempu indefiní.” Pues, Bijbel a pronosticá cu Dios lo establecé un Reino of gobiernu, pa goberná e tera. Di acuerdo cu Revelacion 20:4, e gobiernu aki ta goberná pa mil aña—un milenio! Considerá djis algun dje maneranan cu condicion di bida lo mehorá pa henter humanidad durante e glorioso Milenio aki:

Situacion Económico. “Nan siguramente lo traha cas i biba den nan; i nan siguramente lo planta hofi di wijndruif i come nan fruta. Nan lo no traha cas i otro hende biba aden; nan lo no planta i otro hende come.”—Isaías 65:21, 22.

Salú. “N’e tempu ei wowo di esnan ciegu lo ser habrí, i orea mes di esnan surdu lo ser habrí. N’e tempu ei esun coho lo subi mescos cu un biná, i lenga di esun muda lo sclama di alegria.” “I ningun residente lo bisa: ‘Mi ta malu.’ ”—Isaías 33:24; 35:5, 6.

Medio Ambiente. Dios lo “causa e ruina di esnan cu ta ruinando e tera.”—Revelacion 11:18.

Relacionnan Humano. “Nan lo no haci ningun daño ni causa ningun ruina den henter mi ceru santu; pasobra e tera siguramente lo ta yená cu e conocimentu di Jehova.”—Isaías 11:9.

Miyones di hende tin fe den e promesanan bíblico aki i a bin haña un punto di bista optimista i positivo dje futuro. Como resultado, nan ta mas capas pa enfrentá preshon i problemanan di bida. Con Bijbel por yega di ta un guia poderoso den bo bida?

Conocimentu Cu Ta Hiba na Bida!

Ciencia i tecnologia tin bes por ta impresionante! Tog, conocimentu humano no a haci bida mas sigur i felis pa mayoria hende. E único conocimentu cu por logra esaki ta describí den Bijbel na Juan 17:3, cu ta bisa: “Esaki ta nificá bida eterno, cu nan ta ganando conocimentu di bo, e único Dios berdadero, i di esun cu bo a manda, Jesucristo.”

Tal conocimentu ta ser hañá den e páginanan di Bijbel. Aunke hopi hende ta expresá opinionnan fuerte relacioná cu e buki sagrado aki, poco di nan a yega di examin’é pa nan mes. Kico di abo? Ta berdad cu bo tin cu haci basta esfuerso pa lesa Bijbel. Pero e ta bale la pena. Bijbel ta e único buki cu “ta inspirá di Dios i ta probechoso pa siña, pa reprendé, pa rectificá cosnan, pa disipliná den husticia.”—2 Timoteo 3:16.

Con anto, bo por cuminsá conocé Bijbel? Pakico no aceptá e yudansa di Testigonan di Jehova? Nan ta duna instruccion grátis na miyones di hende den nan propio cas. Pa yuda bo den esaki, nan ta usa vários publicacion basá riba Bijbel, manera e foyeto Kico Dios Ta Rekerí di Nos? E ta duna contestanan breve i al caso riba hopi pregunta cu lo bo por tin relacioná cu Bijbel, manera: Ken Dios ta? Kico ta Dios su propósito pa e tera? Kico ta e Reino di Dios? Con Bijbel por mehorá bo bida di famia?

Si bo ta deseá pa un Testigo di Jehova bishitá bo na cas, por fabor, yena e cupon aki abou. Nan lo ta contentu pa duna bo mas informacion relacioná cu e glorioso Reinado di Mil Aña dje Reino di Dios!

□ Lo mi kier ricibí e foyeto Kico Dios Ta Rekerí di Nos? Indicá idioma preferí

□ Por fabor, tuma contacto cu mi pa un studio di Bijbel grátis na cas

[Nota]