Cultivá Interes Cu Noticia di Reino Num. 36 A Lanta
1 Bo a caba di parti bo porcion di Noticia di Reino Num. 36? E ta haci un pregunta oportuno pa tur hende refleccioná ariba: “E Milenio Nobo—Kico Futuro Tin pa Bo?” Segun cu aña 2000 tabata acercá, tabatin expectativanan masha variá relacioná cu kico e milenio nobo lo trece. Noticia di Reino Num. 36 ta considerá algun dje expectativanan aki i ta recordá nos cu condicion di mundu no ta duna un base pa optimismo. E único milenio cu lo trece e pas i siguridad cu mayoria hende ta busca, ta Cristo Jesus su Reinado di Mil Aña. Nos confiansa den e realidad di su Reino a impulsá nos pa distribuí Noticia di Reino Num. 36 na tur hende cu nos a topa.
2 Reaccionnan Riba Noticia di Reino: Distribucionnan anterior di Noticia di Reino a resultá di ta un excelente estímulo pa nos den nos trabou. Relacioná cu Noticia di Reino Num. 35, e sucursal di Cánada a skirbi: “E publicadónan i pioneronan den veld a sostené e campaña special aki cu entusiasmo, i nan tabatin hopi experencia animador.” Sin duda bo a demostrá un entusiasmo similar den distribucion di Noticia di Reino Num. 36.
3 E actual campaña di Noticia di Reino ta programá pa caba dia 17 di november 2000. Henter e teritorio asigná na boso congregacion a ser cubrí? Si no ta asina, tal bes e ancianonan ta pidi boso pa sigui cu e campaña te cu fin di november.
4 Con e reaccion tabata te asina leu riba distribucion di Noticia di Reino Num. 36 den boso teritorio? Un par di hende lo yena e cupon i pidi un ehemplar dje foyeto Rekerí i/of un studio di Bijbel na cas. Sin embargo, ta probabel cu mayoria di esnan cu mustra interes inicial den e tema di milenio lo no tuma accion sino te ora cu un Testigo di Jehova bolbe pasa bek. P’esei mester bishitá tur esnan cu a mustra interes. Ki ora lo ta bon pa haci esaki? E rebishita mester tuma lugá mas pronto posibel.
5 Tuma nota dje experencianan aki cu a resultá dor di bai bek caminda a laga Noticia di Reino Num. 35. Un pionero na Irlanda a laga un Noticia di Reino cu un doño di un restaurant. E señora a keda impresioná cu e mensahe i a invitá e ruman muher pa pasa bek. Dos dia despues e ruman muher a pasa, i a cuminsá un studio di Bijbel. Na Dinamarca, rumannan a laga un ehemplar di Noticia di Reino na un cas caminda no tabatin niun hende e ora ei. E mésun dia e señora cu ta biba einan a manda e cupon pa e oficina di sucursal, cu a mand’é pa e congregacion local. Promé cu e siman a pasa, dos ruman muher a bishitá e señora, haci areglo pa cuminsá un studio i el a asistí na su promé reunion na Salon di Reino!
6 Kico pa Bisa ora Bo Bolbe Bek: Haci rebishita caminda a laga Noticia di Reino ta basta fácil, i ta tambe un parti dushi di nos ministerio. Ora di haci esei, lo ta consehabel pa bo tin un ehemplar di Noticia di Reino Num. 36, ya cu kisas e doño di cas no tin su ehemplar. Lo bo por purba e sugerencianan aki.
7 Despues cu bo a recordá e doño di cas ta ken bo ta, lo bo por bisa:
◼ “Mi a laga un folder titulá ‘E Milenio Nobo—Kico Futuro Tin pa Bo?’ No tabata un animacion pa lesa cu pronto Cristo Jesus su Reino di Mil Aña lo cuminsá, i asina trece condicionnan paradísico riba tera? [Mustra e plachinan di Paradijs den e Noticia di Reino Num. 36.] Riba e página patras bo ta ser invitá pa pidi un ehemplar dje foyeto Kico Dios Ta Rekerí di Nos?” Mustra e foyeto, bai na les 5, lesa e promé pregunta i §1 cu 2, i pidi e doño di cas comentá. Lesa i considerá un of dos texto. Si ta posibel, considerá un pregunta i paragraf mas, anto caba haci areglo pa bolbe bek i sigui cu e consideracion.
8 Como cu e oferta cu ta sigui pa november lo ta e foyeto “Rekerí” of e buki “Conocimentu,” lo bo por bisa:
◼ “Recientemente cu mi a bishitá bo, mi a laga un ehemplar di ‘E Milenio Nobo—Kico Futuro Tin pa Bo?’ E ta contené un oferta pa un studio di Bijbel grátis na cas. Mi a pasa bek pa mustra bo loke nos ta usa pa conducí e studio. [Mustra e foyeto Rekerí i bai na e kaft patras; of mustra e buki Conocimentu i bai na página 188-9.] E Milenio cu Bijbel ta papia di dje lo trece condicionnan manera loke bo ta mira riba e plachi aki. Pa cualificá pa bida den Paradijs, nos tin cu gana conocimentu exacto di Dios. Por fabor, permití mi demostrá brevemente con nos ta studia Bijbel.”
9 Distribucion di Noticia di Reino Num. 36 a motivá nos pa intensificá nos participacion den e ministerio, produciendo un tremendo testimonio. Probablemente esaki a lanta e interes di hopi persona den teritorio. Nos esfuerso uní pa cultivá e interes aki, cu Jehova su yudansa, lo resultá cu nos gososamente lo localisá mas hende semehante na carné.—Mat. 10:11; Echo. 13:48, 49, 52.