Bai Bek Cerca Esnan cu A Mustra Interes den Noticia di Reino
1 Durante e último par di simannan, nos a disfrutá dje privilegio di distribuí Noticia di Reino Num. 35, titulá “Tur Hende Lo Stima Otro un Dia?” Na tur parti publicadónan ta haciendo esfuerso pa alcansá mas tantu hende merecedor posibel cu e edicion aki di Noticia di Reino. (Mat. 10:11) En realidad, e campaña ta programá pa terminá diadomingo, 16 di november. Pero si ainda tin mas teritorio pa cubri, ancianonan lo por pidí bo pa sigui distribuí Noticia di Reino Num. 35 miéntras e congregacion tin ainda.
2 E edicion aki di Noticia di Reino a lanta e interes di hopi hende. Nan ta mira cu en general hende no tin cariño natural mas i p’esei nan ta puntra nan mes ta kico futuro lo trece. (2 Tim. 3:3) Nos mester rebishitá esnan cerca ken nos a lanta interes.
3 Noticia di Reino Ta Duna Resultado: Durante e campaña di 1995 cu Noticia di Reino, un señora cu a ricibí un ehemplar a bini un reunion na Salon di Reino pasobra e kier a haña sa mas di loke Testigonan di Jehova ta kere. N’e reunion ei el a aceptá unbes un studio di Bijbel i despues di esei casi e no a falta ningun reunion. No a tarda mashá cu el a skirbi e iglesia caminda e tabata pertenecé un carta pa kita su nomber como miembro!
4 Pa awor aki, cientos di hende den e teritorio a lesa e mensahe di Noticia di Reino Num. 35. Pero con nan ta hañ’é? Asta si nan a keda impresioná cu loke nan a lesa, mayoria di nan lo no tuma accion tanten un Testigo di Jehova no bishitá nan atrobe. Bo ta planeando pa bai bek? Interes amoroso den nos próhimo mester conmové nos pa haci esei. Tur hende cu a mustra interes den Noticia di Reino mester haña mas bishita.
5 Kico Lo Bo Bisa ora Bo Bai Bek? Lo bo por comentá tocante con oportuno e mensahe di Noticia di Reino ta i despues haci un pregunta pa pone e doño di cas pensa. Scucha atentamente ora e ta expresá su mes pa asina bo por haña sa kico e tin na mente. Despues hala atencion na un punto cu ta al caso den e foyeto Rekerí, cu a ser presentá den Noticia di Reino. Si e reaccioná bon, purba cuminsá un studio di Bijbel e ora ei mes.
6 Ata aki algun sugerencia cu bo por purba ora di bai bek cerca esnan cu a mustra interes den “Noticia di Reino” Num. 35:
◼ “Kisas bo ta corda e informacion dje tratado cu mi a laga cu bo poco dia pasá. Su mensahe ta toca un asuntu importante cu ta causa desunion den humanidad awe, esta, falta di amor pa otronan.” Dirigí atencion na e evidencia presentá na página 2 di Noticia di Reino bou dje subtema “Amor pa Próhimo A Fria.” Anto puntra: “Bo ta kere cu Dios su propósito ta pa humanidad biba asina aki?” Permití contesta. Bai na les 5 dje foyeto Rekerí i purba cuminsá un studio di Bijbel.
◼ “Ora nos a topa promé biaha, mi a laga un informacion cerca bo riba e tópico ‘Tur Hende Lo Stima Otro un Dia?’ Abo ta kere cu un mundu asina ta posibel?” Permití contesta. Bai na les 6 dje foyeto Rekerí i lesa paragraf 6. Despues lesa Dios su promesa na Mikéas 4:3, 4. Si e doño di cas ta mustra interesá, ofrec’é e foyeto i un studio.
◼ “Biaha pasá ora mi a bishitá bo, mi a laga un literatura titulá ‘Tur Hende Lo Stima Otro un Dia?’ El a contené un oferta pa un studio di Bijbel grátis na cas. Mi a bin bek pa mustrá bo e buki cu nos ta usa pa studia cuné. [Mustra e buki Conocimentu.] E buki aki ta splica masha cla na ki tempu tur hende lo stima otro i e ta contestá otro preguntanan cu kisas bo a yega di haci bo mes: Pakico nos ta bira bieu i muri? Pakico Dios ta permití sufrimentu? Kico ta sosodé cu nos stimánan morto?” Despues puntra: “Bo ta permití mi mustrá bo con e studio ta bai?” Si e doño di cas no aceptá e oferta, puntr’é si e kier lesa e buki riba su mes. Si e kier esei, laga un ehemplar i splica cu nos ta pidi solamente un contribucion chikitu pa nos literatura. Planea pa bolbe bek.
7 Una bes cu nos a cubri e teritorio cabalmente cu Noticia di Reino Num. 35, nos lo por ofrecé e buki Conocimentu e resto dje luna. Nos por haña un seleccion amplio di sugerencia pa presentá e buki aki riba e último página di Nos Ministerio di Reino den e edicionnan di december 1995, mart, juni i november 1996 i juni 1997.
8 E distribucion special aki di Noticia di Reino mester motivá nos tur pa intensificá nos esfuersonan den e trabou di predicá. Cu Jehova su yudansa nos por tin e confiansa cu e campaña aki lo tin éxito sigur, pa yuda hende mira e propósito di Dios pa tur humanidad stima otro. Cu Jehova sigui bendicioná nos esfuersonan diligente pa bai bek cerca esnan cu a mustra interes den Noticia di Reino.