Ripitishon pa Énfasis

UN BON maestro ta hasi uso di ripitishon. Ora bo menshoná un punto importante mas ku un biaha, tin mas chèns ku bo oyentenan ta keda kòrd’é. Si bo bolbe menshon’é den un manera un poko diferente, nan lo por asta komprond’é mihó.

Si bo oyentenan lubidá loke bo a bisa, bo palabranan lo no influensiá nan kreensianan ni nan manera di biba. Pero si bo pone énfasis spesial riba sierto ideanan, probablemente nan lo sigui pensa riba nan.

Yehova, nos Magnífiko Instruktor, ta un ehèmpel pa nos pa loke ta trata uso di ripitishon. Ora el a duna e Dies Mandamentu na e nashon di Israel, el a usa un angel komo bosero i a laga e pueblo skucha nan na Seru Sínai. Despues Yehova a skirbi e mandamentunan aki i duna nan na Moises. (Éks. 20:1-17; 31:18; Deu. 5:22) Riba instrukshon di Yehova, Moises a bolbe deklará e mandamentunan ei na e nashon promé ku nan a drenta e Tera Primintí, i mediante spiritu santu, Moises a pone nan por eskrito, manera nos por lesa na Deuteronomio 5:6-21. Entre e mandamentunan ku Israel a haña tabatin e rekisito di stima i sirbi Yehova ku henter nan kurason, alma i forsa. E mandamentu aki tambe a ser ripití vários bes. (Deu. 6:5; 10:12; 11:13; 30:6) Dikon? Pasobra manera Hesus a bisa, esei tabata “e gran mandamentu i e di promé.” (Mat. 22:34-38) Mediante profeta Yeremías, Yehova a rekordá e pueblo di Huda mas ku 20 biaha di e seriedat di obedesé tur loke el a manda nan. (Yer. 7:23; 11:4; 12:17; 19:15) I mediante Ezekiel, Yehova Dios a deklará mas ku 60 biaha ku e nashonnan “lo sa ku ami ta SEÑOR.”—Eze. 6:10; 38:23.

Den e relatonan tokante e sirbishi di Hesus, nos ta ripará tambe ku e eskritor a hasi bon uso di ripitishon. Por ehèmpel, kada un di e kuater Evangelionan ta trata susesonan importante ku ta ser relatá tambe den un òf mas di e otro Evangelionan, pero nan ta ser presentá for di un ángulo un poko diferente. Hesus mes tambe a siña e mesun idea básiko na mas ku un okashon, pero den diferente manera. (Mar. 9:34-37; 10:35-45; Huan 13:2-17) I ora Hesus tabata riba Seru di Oleifi un par di dia promé ku su morto, el a usa ripitishon pa enfatisá e konseho vital aki: “Sea alerta . . . , pasobra boso no sa ki dia boso Señor ta bin.”—Mat. 24:42; 25:13.

Den Sirbishi di Vèlt. Ora bo ta duna testimonio bo kier pa e hendenan keda kòrda loke bo ta bisa. Bon uso di ripitishon por yuda bo logra esei.

Hopi bes, dor di ripití e punto ku bo ta papiando di dje bo ta grab’é den mente di e persona. Pues, lo bo por enfatisá un teksto bíbliko ku bo a kaba di lesa dor di hala atenshon na un parti klave di dje i puntra: “Bo a tuma nota di e ekspreshon ku e teksto ta usa?”

Ora bo ta terminá un kòmbersashon, tambe ta bon pa ripití e ideanan ku bo a kaba di papia di dje. Por ehèmpel, lo bo por bisa: “E punto prinsipal ku mi ta spera ku lo bo keda kòrda di nos kòmbersashon ta . . .” Anto bolbe menshon’é den un frase simpel. Lo bo por bisa algu asin’aki: “Dios su propósito ta pa transformá e tera den un paradeis. E propósito ei lo ser realisá sin falta.” Òf lo bo por bisa: “Beibel ta mustra bon kla ku nos ta bibando den e último dianan di e sistema di kosnan aki. Pa nos sobrebibí su fin, nos tin ku siña loke Dios ta rekerí di nos.” Òf tambe lo bo por bisa: “Manera nos a mira, e Palabra di Dios ta duna nos konseho práktiko pa trata ku e problemanan di bida di famia.” Den algun kaso bo por djis ripití un sita bíbliko komo e punto pa e persona keda kòrda. Klaru ku pa bo por ripití ideanan na un manera efikas bo tin ku pensa bon riba nan di antemano.

Na rebishita, i tambe studio di Beibel, bo por hasi preguntanan di repaso pa ripití puntonan importante.

Si un persona tin difikultat pa komprondé òf apliká un konseho bíbliko, lo bo tin ku menshoná e asuntu na mas ku un okashon. Purba present’é for di vários ángulo. No ta nesesario pa bo papia largu riba dje, pero loke bo ta bisa mester stimulá e studiante pa sigui pensa riba e asuntu. Kòrda ku Hesus a usa e tipo di ripitishon aki pa yuda su disipelnan vense e deseo di kier ta na promé lugá.—Mat. 18:1-6; 20:20-28; Luk. 22:24-27.

Ora di Duna Diskurso. Bo meta no ta solamente pa presentá e informashon for di plataforma, sino ku bo kier pa bo ouditorio komprond’é, kòrd’é i pon’é na práktika. Pa logra esei, bo mester hasi bon uso di ripitishon.

Sin embargo, no ripití e puntonan prinsipal demasiado biaha pasobra lo bo pèrdè e atenshon di bo ouditorio. Skohe ku kuidou e puntonan ku ta meresé un énfasis spesial. Por lo general nan ta e ideanan klave riba kua e diskurso ta basá, ounke bo por inkluí tambe otro ideanan ku lo ta di balor spesial pa bo ouditorio.

Pa hasi bon uso di ripitishon, bo por kuminsá ku menshoná e puntonan prinsipal den bo introdukshon. Hasi esei usando frasenan kòrtiku ku ta duna un idea general di loke bo ta bai trata, òf usa pregunta- òf ehèmpelnan kòrtiku ku ta plantia e problemanan ku lo ser solushoná. Bo por asta menshoná kuantu punto prinsipal tin i despues desaroyá nan den transkurso di e diskurso. Den e kurpa di bo diskurso bo por bolbe enfatisá e puntonan prinsipal dor di menshoná kada un di nan promé ku bo pasa pa e siguiente òf bo por inkluí un ehèmpel ku ta mustra kon e punto ta apliká. Por último, bo por pone mas énfasis riba bo puntonan prinsipal den bo konklushon, sea dor di ripití nan òf dor di usa kontrastenan ku ta pone nan resaltá, òf kontestando e preguntanan ku bo a plantia den e introdukshon òf dor di deskribí brevemente e solushon di e problemanan ku bo a presentá.

Fuera di e kosnan menshoná ariba, oradónan eksperensiá ta opservá nan oyentenan ku atenshon. Nan ta ripará si algun hende no a komprondé un sierto idea bon i, den kaso ku ta un punto importante, nan ta ripitié. Sin embargo, no semper ta basta pa djis ripití e mesun palabranan. Un bon maestro ta hasi mas: e ta fleksibel i kapas pa improvisá si ta nesesario. Kon efikas lo bo ta komo maestro ta dependé prinsipalmente di e grado ku bo siña adaptá na e nesesidatnan di bo ouditorio na e manera aki.