Destaká Puntonan Prinsipal

KUA ta e puntonan prinsipal di un diskurso? Nan ta e ideanan importante ku bo mester konsentrá riba dje pasobra nan ta krusial pa bo por logra bo meta. Nan no ta simplemente e detayenan interesante ku bo ta menshoná aribariba.

Un faktor klave pa laga e puntonan prinsipal destaká ta dor di skohe i organisá e informashon na un manera sabí. Ora bo hasi investigashon pa un diskurso, mayoria bes bo ta haña hopi mas informashon di loke bo por usa. Kon bo por determiná kiko pa usa?

Na promé lugá, pensa riba bo ouditorio. E tópiko ta deskonosí pa mayoria di nan, òf nan konos’é bon? Kasi nan tur ta bai di akuerdo ku loke Beibel ta bisa di e asuntu, òf tin algun di nan ta duda un tiki? Kua ta e retonan ku nan ta konfrontá den nan bida diario pa motibu ku nan kier pone na práktika loke Beibel ta bisa di e tópiko? Na di dos lugá, tene bon kla na mente e meta ku bo kier logra ora bo ta papia ku e ouditorio riba e tema en kuestion. Ku e dos puntonan aki komo guia, evaluá e informashon i keda ku solamente loke ta al kaso.

Si bo a haña un boskeho básiko ku e tema i puntonan prinsipal, bo mester pega na dje. Sin embargo, bo presentashon lo bira hopi mas balioso si bo tene na mente e faktornan menshoná ariba ora bo ta desaroyá kada punto prinsipal. Ora bo no haña un boskeho, bo mes tin ku skohe e puntonan prinsipal.

Si bo tin e puntonan prinsipal bon kla na mente i bo a organisá e detayenan ku ta apoyá kada un di nan, lo ta mas fásil pa bo duna e diskurso i bo ouditorio probablemente lo saka mas probecho di dje.

Maneranan pa Organisá Bo Informashon. Tin vários manera ku bo por organisá e kurpa di bo diskurso. Unabes bo konosé nan, lo bo ripará ku vários di nan por ta efikas, dependiendo di ki meta bo kier logra.

Un manera fleksibel pa organisá bo informashon ta di dividié a base di tópiko òf ideanan. (Kada punto prinsipal ta nesesario, sea pasobra e ta yuda bo oyentenan komprondé e tema òf pasobra e ta yuda bo logra e meta di bo diskurso.) Un otro manera pa hasi esaki ta dor di usa órden kronológiko, es desir, segun e órden di tempu. (Por ehèmpel, bo ta menshoná susesonan promé ku Diluvio, despues loke a pasa promé ku Yerúsalèm a wòrdu destruí na aña 70 di nos era, anto kaba loke ta pasa den nos tempu.) Un di tres manera ta, kousa i efekto. (Bo por desaroyá e parti den ámbos direkshon. Por ehèmpel, bo por kuminsá ku un situashon aktual, e efekto, i despues mustra e kousa.) Un di kuater posibilidat ta konsistí di kompará kosnan kontrali di otro. (Bo por mustra e kontraste entre bon i malu òf entre positivo i negativo.) Tin biaha bo por usa mas ku un manera den un diskurso.

Ora nan a akusá Esteban falsamente dilanti di e korte supremo hudiu (e Sanedrin), el a duna un diskurso potente siguiendo e método kronológiko. Ora bo lesa Echonan 7:2-53, tuma nota ku el a skohe e puntonan ku un propósito na mente. Promé Esteban a klarifiká ku e tabata referí na datonan históriko ku su ouditorio no por a nenga. Kaba el a mustra ku Dios a usa Yosef pa trese liberashon maske su rumannan a rechas’é. Despues el a mustra ku e hudiunan a desobedesé Moises, e kanal ku Dios tabata usa. Anto el a konkluí enfatisando e echo ku e hudiunan ku a mata Hesukristu a desplegá e mesun spiritu ku e hudiunan di generashonnan anterior.

No Usa Demasiado Punto Prinsipal. Kualkier tema ta konsistí di solamente un par di aspekto esensial. Mayoria bes bo por konta nan riba un man, sea bo ta bai papia pa 5 minüt, 10 minüt, 30 minüt òf mas. No purba destaká demasiado punto prinsipal, pasobra tòg bo ouditorio lo por kapta solamente un par di idea for di un diskurso. I mas largu e diskurso ta, mas e puntonan klave mester destaká.

Sin importá kuantu punto prinsipal bo usa, sòru splika nan tur bon. Duna e ouditorio sufisiente tempu pa analisá kada punto prinsipal ya asina nan por graba nan den nan mente.

Bo diskurso mester duna e impreshon di ta simpel, i esaki no ta dependé semper di e kantidat di informashon ku bo ta presentá. Si bo pensamentunan ta klaramente agrupá bou di djis un par di enkabesamentu prinsipal i bo desaroyá nan un pa un, e diskurso lo ta fásil pa sigui i fásil pa kòrda.

Laga Bo Puntonan Prinsipal Destaká. Si bo informashon ta bon organisá lo no ta difísil pa resaltá e ideanan klave.

E manera prinsipal pa destaká nan ta dor di presentá e puntonan ku ta apoyá nan, e tekstonan bíbliko i otro datonan di tal manera ku nan ta dirigí atenshon riba e ideanan prinsipal i ta amplia nan. Tur punto sekundario mester splika, proba òf amplia e idea prinsipal, p’esei no agregá ideanan ku no ta al kaso djis pasobra nan ta interesante. Mustra bon kla kiko ta e relashon entre e puntonan sekundario i e punto prinsipal ku nan ta apoyá. No laga pa e ouditorio mes averiguá esei. Bo por logra mustra e relashon ei dor di ripití e palabranan klave ku ta ekspresá e pensamentu sentral òf menshoná e esensia di e punto mes de bes en kuando.

Algun oradó ta destaká e puntonan prinsipal dor di numerá nan. Ounke esei ta un manera pa hasié, tòg bo tin ku skohe e informashon kuidadosamente i desaroy’é na un manera lógiko.

Un otro kos ku bo por hasi ta djis menshoná e punto prinsipal promé ku bo presentá e argumentunan ku ta apoy’é. Esaki lo yuda bo ouditorio apresiá e balor di loke ta sigui, i alabes e ta destaká e idea klave. Lo bo por resaltá e punto mas ainda dor di duna un resúmen despues ku bo a analis’é a fondo.

Den Sirbishi di Vèlt. E prinsipionan menshoná aki ta apliká no solamente na diskursonan formal, sino tambe na nos kòmbersashonnan den sirbishi di vèlt. Ora bo ta prepará pa nan, tene na mente un problema serio ku ta preokupá e hendenan den bo teritorio i skohe un tema ku ta permití bo mustra nan e speransa ku Beibel ta ofresé pa solushoná e situashon ei. Podisé bo por skohe dos punto prinsipal pa desaroyá e tema ei. Disidí kua tekstonan bíbliko lo bo usa pa apoyá e puntonan aki, anto pensa kon lo bo kuminsá e kòmbersashon. E preparashon ei lo duna bo e fleksibilidat nesesario i lo yuda bo bisa algu ku e doñonan di kas lo no lubidá fásilmente.