Bon di Taim i Bon Repartí

OUNKE e kos prinsipal ta e kalidat di bo siñansa, e durashon di bo diskursonan tambe ta meresé atenshon. Nos reunionnan ta programá pa kuminsá i kaba na sierto ora spesífiko, i pa logra esei tur hende ku tin parti den e programa mester koperá.

Den tempu bíbliko, hende su punto di bista di bida tabata otro for di loke e ta den hopi parti di mundu awe. Nan tabata ekspresá ora ku palabranan aproksimá manera “banda di nueb’or di mainta” òf “mas o ménos kuat’or di atardi.” (Mat. 20:3-6; Huan 1:39) Masha poko bes nan tabata fiha un ora presis pa hasi nan aktividatnan di tur dia, i den algun parti di mundu awe ainda esei ta e kaso.

Sin embargo, ounke kustumber lokal òf preferensia personal ta pone ku hopi hende no ta puntual, nos por benefisiá si nos siña duna e asuntu aki e debido importansia. Ora vários ruman tin parti riba programa, kada un di nan tin ku sòru pega na e tempu asigná. Den e asuntu aki di taim nos partinan den reunion, ta bon pa apliká e prinsipio: “Laga tur kos sosodé korektamente i na un manera ordená.”—1 Kor. 14:40.

Kon pa Keda den e Tempu Asigná. E klave ta preparashon. Oradónan ku tin problema pa keda den e tempu asigná generalmente no a prepará nan parti sufisiente; kisas nan tin muchu konfiansa den nan mes òf nan ta posponé nan preparashon te na último momentu. Apresio pa bo asignashon i e deseo pa prepará bon ta e promé pasonan pa bo parti ta bon di taim.

Bo a haña un parti di lesamentu? Promé, repasá Lès 4 pa 7 di e buki aki, ku ta trata fluides, pousa, i énfasis, sea di palabranan klave òf di ideanan prinsipal. Kaba apliká e konseho ei ora ku bo ta lesa e informashon na bos haltu. Taim bo mes. Bo tin ku lesa mas lihé pa bo por kaba den e tempu asigná? Lesa mas lihé ora ta trata di e partinan ménos importante, pero sigui usa pousa i un ritmo mas slo pa enfatisá e ideanan prinsipal. Praktiká bes tras bes, i lo bo ripará ku segun ku bo ta lesa mas vlòt, lo ta mas fásil pa bo kontrolá bo tempu.

Bo tin ku duna un diskurso for di un boskeho? Pa bo ta sigur ku lo bo kaba na tempu no ta nesesario pa usa notanan hopi detayá, ku kasi ta forma henter e diskurso palabra pa palabra. Ora bo a studia Lès 25 bo a siña un mihó manera. Tene e sinku puntonan aki na mente: (1) Prepará bon informashon, pero no muchu hopi. (2) Tene e ideanan prinsipal bon kla na mente, pero no siña frasenan kompletu for di kabes. (3) Marka riba bo boskeho kuantu tempu lo bo dediká na kada parti di e diskurso òf kuantu tempu mester a pasa ora bo yega na sierto puntonan. (4) Ora bo ta prepará, disidí kua ta e detayenan ku lo bo por laga afó si tempu ta kaba laga bo. (5) Train bo presentashon.

Ta importante pa bo train bo parti. Ora bo ta train, taim kada sekshon di bo diskurso. Keda repasá bo diskurso te ora ku bo logra ku e no ta bai overtaim. No purba hinka demasiado informashon aden. Mas bien, wak pa bo sobra un tiki tempu, pasobra ora bo ta presentá bo diskurso den públiko por sosodé ku e ta un tiki mas largu ku ora bo a praktik’é den privá.

Kon pa Repartí Bo Tempu Bon. Tin un relashon direkto entre keda den e tempu asigná i repartí bo tempu adekuadamente entre e sekshonnan di e diskurso. E sekshon mas grandi mester ta e kurpa di e diskurso, pasobra ta e kurpa tin e puntonan prinsipal di instrukshon. E introdukshon mester ta sufisiente largu pa kumpli ku e tres metanan ku a ser tratá den Lès 38 di e buki aki. Di otro banda, e kurpa no mester ta asina largu ku no ta sobra tempu pa un konklushon efikas, na armonia ku Lès 39.

Bo esfuerso pa keda den e tempu asigná lo resultá den un mihó diskurso i lo mustra bo rèspèt pa e otro rumannan ku tin parti riba programa i tambe pa henter e kongregashon.