Kaha di Pregunta

◼ Kon nos por hasi sigur ku e reunionnan di kongregashon ta kaba na ora?

Tempu ta pasa masha lihé ora nos ta kompartiendo un kos bon ku nos amigunan. P’esei, lo por ta un desafio pa kaba e partinan di e reunionnan den e tempu asigná. Kiko por yuda nos?

Kuminsá na tempu. Ora ku ta un reunion di henter kongregashon, lo ta bon pa invitá e ouditorio pa tuma asiento ún òf dos minüt di antemano pa asina e reunion por kuminsá na ora i na un manera ordená. (Ekl. 3:⁠1) No mester tarda pa kuminsá reunionnan ku ta enserá grupo mas chikitu, manera e reunion pa sirbishi di vèlt, pa warda riba esnan ku lo por yega lat.

Prepará bon. Un klave pa kaba na tempu ta preparashon di antemano. Tene e propósito di bo asignashon bon kla na mente. Identifiká e puntonan prinsipal i enfatisá nan. No laga detayenan di ménos importansia desviá bo. Mantené bo presentashon simpel. Si tin demostrashon òf entrevista den e parti, train nan di antemano. Te asina leu ku ta posibel, chèk bo tempu ora bo ta entrená bo parti na bos haltu.

Dividí bo informashon den sekshon. Sea ku ta un diskurso bo tin òf un konsiderashon ku ouditorio, lo bo ripará ku ta útil pa bo dividí bo informashon den sekshon. Disidí kuantu tempu bo ta dediká na kada sekshon, i indiká esaki den márgen di bo notanan. Anto vigilá bo tempu ora bo ta presentá bo parti. Durante un konsiderashon ku ouditorio, evitá e trampa di laga asina tantu hende duna komentario na prinsipio ku despues bo tin ku kore pasa dor di e informashon di mas peso ku ta bini despues. Konduktornan di Studio di Toren di Vigilansia mester permití sufisiente tempu pa nan por hasi e repaso na final. Tambe nan tin ku tene kuidou pa nan no kita for dje tempu asigná pa kantika i orashon.

Kaba na tempu. Si un reunion ta konsistí di vários parti, manera ta e kaso ku e Reunion di Sirbishi, kada oradó mester ta konsiente ki ora su parti lo mester kuminsá i kaba. Kiko por hasi si e reunion ta kore riesgo di bai overtaim? Un òf mas ruman por kompensá esaki dor di enfoká riba puntonan prinsipal i eliminá algun detaye for di nan parti. E abilidat pa hasi esaki ta un karakterístika di un maestro ábil.

Komo ouditorio nos por yuda e ruman ku ta kondusí dor di tene nos komentarionan breve i al kaso. Pues anto, nos tur por kontribuí pa e reunionnan tuma lugá “korektamente i na un manera ordená.”​—⁠1 Kor. 14:⁠40.