Instrukshon pa Esnan Ku Ta Duna Parti den Reunion di Sirbishi

Kuminsando ku e edishon akí di Nos Ministerio di Reino, lo simplifiká términonan di e programa di Reunion di Sirbishi. E siguiente instrukshon- i rekordatorionan lo ahustá i klarifiká loke a sali den e artíkulo “Kon pa Prepará pa e Reunion di Sirbishi” di Nos Ministerio di Reino di mei 2009.

◼ Diskurso: Esaki ta un diskurso basá riba e informashon asigná i no tin partisipashon di e presentenan. E oradó mester enfoká riba loke ta mas benefisioso pa e kongregashon.

◼ Pregunta i Kontesta: Meskos ku e Estudio di Toren di Vigilansia, e parti akí tin un introdukshon i konklushon breve, i mester hasi tur e preguntanan. Esun ku ta dirigí mester evitá di duna muchu komentario. Por lesa tekstonan prinsipal si tin tempu. No mester lesa e paragrafnan a ménos ku e instrukshon ta indiká esei.

◼ Diskurso ku Partisipashon: Esaki ta un diskurso den kua e oradó lo hasi algun pregunta. E no ta un diskurso so, ni tampoko e no ta konsistí di pregunta i kontesta so.

◼ Demostrashon i Entrevista: Ora tin instrukshon pa tene demostrashon, esei ta nifiká ku e ruman ku tin e parti akí ta responsabel pa inkluí un demostrashon; e mes no tin ku hasi e demostrashon. Esnan ku e skohe pa yud’é mester ta kapasitá i ehemplar, i e mester regla esaki sufisiente tempu di antemano si ta posibel. Ta mas mihó pa no usa publikadónan nobo i sin eksperensia pa demostrá kon mester hasi e trabou djis pa duna nan e oportunidat di bai riba plataforma. Ta posibel sí pa usa nan komo doño di kas. Ora publikadónan ta tene un demostrashon, nan mester hasi esei ku kara pa ouditorio. Esnan ku haña un entrevista mester duna nan komentarionan riba plataforma i no sintá den ouditorio. Mester train demostrashon i entrevista. Si un ruman mester kòrta su parti pa e reunion no bai overtaim, e no mester laga e demostrashon- òf entrevistanan afó. Sirbidónan ministerial tin ku konsultá ku e koordinadó di e kuerpo di ansiano òf un otro ansiano promé ku nan skohe partisipante.

Si tin un otro tipo di parti ku tin instrukshon spesial, mester sigui e instrukshonnan ei kuidadosamente. Ora e ruman hòmbernan sigui e instrukshonnan menshoná aki riba durante Reunion di Sirbishi, nos ta sigur ku tur kos lo “sosodé korektamente i na un manera ordená.”—1 Kor. 14:⁠40.