Kaha di Pregunta

◼ Kon mester introdusí e kantika di apertura di e Skol di Ministerio Teokrátiko, e Reunion di Sirbishi, e Reunion Públiko i e Estudio di Toren di Vigilansia, i ken mester hasié?

E suplemento di Nos Ministerio di Reino di òktober ku tin e programa pa e Skol di Ministerio Teokrátiko ta menshoná e kantikanan selektá pa kada siman di e Skol di Ministerio Teokrátiko. Página 2 di Nos Ministerio di Reino ta indiká e kantikanan di apertura i di konklushon pa e Reunion di Sirbishi di kada siman. Di mes manera, por haña e number di e kantikanan pa e Estudio di Toren di Vigilansia semanal na página 2 di kada edishon di E Toren di Vigilansia. E kantikanan asigná ta forma parti di e reunion na kua nan ta pertenesé. Pues ta e ruman ku ta dirigí e reunion mester introdusí e kantika i no e presidente di e reunion anterior.

Por ehèmpel, e superintendente di e Skol di Ministerio Teokrátiko ta yama esnan presente bonbiní, introdusí e kantika di apertura i dirigí e skol. Ora e kaba, e ta invitá e promé oradó di e Reunion di Sirbishi riba plataforma. E ruman hòmber ku tin e promé parti den e Reunion di Sirbishi ta esun ku mester introdusí e kantika ku ta habri e Reunion di Sirbishi.

Meskos tambe, pa loke ta e Reunion Públiko, un presidente ta habri e reunion. E ta duna un kaluroso bonbiní na tur esnan presente i invitá nan pa kanta e kantika di apertura ku e oradó a skohe. E presidente (òf kisas un otro ruman hòmber kualifiká ku a ser asigná di antemano) ta kuminsá e reunion ku un orashon. E ta introdusí e oradó i menshoná e tema di su diskurso. Despues di e diskurso, e presidente brevemente ta ekspresá apresio pa e instrukshon; e no tin nodi resumí loke e oradó a kaba di bisa. E ta anunsiá e tema di e diskurso pa e siguiente siman, i despues e ta invitá esnan presente pa keda pa e Estudio di Toren di Vigilansia. No ta nesesario pa e oradó puntra esnan presente si nan ke manda nan amor i kumindamentu pa e kongregashon di e oradó. Siguientemente, e presidente ta invitá e konduktor di Estudio di Toren di Vigilansia riba plataforma.

E konduktor di Estudio di Toren di Vigilansia ta introdusí e promé kantika ku ta pertenesé na e estudio. Despues ku e kondusí e estudio na armonia ku e instrukshonnan publiká, e ta anunsiá e kantika di konklushon. Por lo general e konduktor di Estudio di Toren di Vigilansia ta invitá e ruman ku a duna e diskurso públiko pa hasi e orashon di konklushon.

Ora nos ta sigui e guia general aki, lo e yuda nos garantisá ku tur nos reunionnan di kongregashon ta ser kondusí na un manera uniforme.