Un Programa Nobo di Reunion di Kongregashon
1 Durante e siman di 21 pa 27 di aprel 2008, e hermandat mundial a tende un anunsio emoshonante. “Entrante 1 di yanüari 2009, lo tene e Estudio di Buki di Kongregashon huntu ku e Skol di Ministerio Teokrátiko i e Reunion di Sirbishi. Lo kambia nòmber di e Estudio di Buki di Kongregashon pa Estudio di Beibel di Kongregashon.”
2 Programa pa e Reunion Semanal Akí: E reunion akí lo dura 1 ora i 45 minüt, inkluyendo kantika i orashon. E reunion lo kuminsá ku kantika i orashon (5 min.), i ta sigui ku e Estudio di Beibel di Kongregashon (25 min.). E Skol di Ministerio Teokrátiko (30 min.) lo sigui mesora despues di esei. Kaba, lo kanta un kantika (5 min.) pa introdusí e Reunion di Sirbishi (35 min.). Lo konkluí e reunion ku kantika i orashon (5 min.). Pa yuda bo prepará pa e reunionnan akí, tur luna e programa pa e Estudio di Beibel di Kongregashon, e Skol di Ministerio Teokrátiko i e Reunion di Sirbishi lo sali den Nos Ministerio di Reino.
3 Estudio di Beibel di Kongregashon: Lo dirigí e reunion akí meskos ku ta dirigí e Estudio di Toren di Vigilansia. No tin nodi kuminsá ku un repaso di e informashon di e siman anterior. Mas bien, mester kuminsá e reunion ku un introdukshon masha breve. Di e manera akí lo tin sufisiente tempu pa tur e presentenan duna komentario breve. E superintendente presidente lo perkurá pa kada siman un otro ansiano dirigí e reunion akí.
4 Reunion di Sirbishi: E úniko kambio den e Reunion di Sirbishi ta ku e partinan lo bira mas kòrtiku. Por lo general anunsio lo dura sinku minüt, i esaki lo ta sufisiente pa hasi anunsionan importante, i pa lesa sierto kartanan di sukursal. No ta nesesario pa hasi sierto anunsio for di plataforma manera entre otro orario pa sirbishi di vèlt, programa di limpiesa i informe di kuenta, ni lesa kartanan ku sukursal ta manda regularmente. Lo pone esakinan riba bòrchi pa e rumannan lesa. Esnan ku tin parti mester prepará bon, perkurá pa no bai overtaim i pega na e instrukshonnan.
5 Bishita di Superintendente di Sirkuito: Lo no ahustá e programa semanal di e superintendente di sirkuito. Riba djamars lo tene e Skol di Ministerio Teokrátiko i Reunion di Sirbishi ku lo sigui ku un kantika. Despues e superintendente di sirkuito lo duna un diskurso di 30 minüt. I manera kustumber durante e siman di su bishita, lo tene e Estudio di Beibel di Kongregashon riba un otro dia; despues di e estudio lo introdusí e diskurso di sirbishi di e superintendente di sirkuito ku un kantika. E reunion lo terminá ku kantika i orashon.
6 Reunion pa Sirbishi di Vèlt: E kuerpo di ansiano lo asigná superintendentenan di grupo pa perkurá pa gruponan di sirbishi di vèlt i pa pastoriá esnan den nan grupo. Ora un sirbidó ministerial haña e enkargo ei, lo e ser yamá “sirbidó di grupo.”
7 Manera nos por komprondé, nos ta bai haña oportunidat pa disfrutá di un bankete spiritual instruktivo i edifikante. Esaki lo yuda nos pa ta predikadónan i maestronan efikas, entrená pa un sirbishi mas produktivo.—Efe. 4:13, 14; 2 Tim. 3:17.
8 Si nos studia di antemano pa e reunionnan akí, nos lo por enfoká bon riba puntonan prinsipal ku ta ser enfatisá durante kada reunion. Nos tur lo tin oportunidat pa duna komentario i animá otro. (Rom. 1:11, 12; Heb. 10:24) Nos mester tin e meta pa laga nos ‘progreso ta bisto’ dor di ‘kompartí e palabra di bèrdat na un manera korekto.’—1 Tim. 4:15; 2 Tim. 2:15.
9 Nos ta masha kontentu ku e kambio signifikativo akí di nos reunionnan di kongregashon. Laga nos tur sigui hasi bon uso di e guia ku “e esklabo fiel i prudente” ta proveé i keda serka di nos Gran Wardadó ku ta yuda nos prepará pa e gran “tribulashon” ku ta serka.—Mat. 24:21, 45; Heb. 13:20, 21; Rev. 7:14.
[Study Questions]
1, 2. Ki kambionan lo bai tin den e reunionnan entrante yanüari 2009?
3. Kon lo dirigí e Estudio di Beibel di Kongregashon?
4. Ki ahuste lo tin pa e Reunion di Sirbishi?
5. Kon e programa di reunion di kongregashon lo ta durante e siman di bishita di e superintendente di sirkuito?
6. Kiko e superintendente di grupo tin ku hasi?
7. Kiko nos por spera di nos programa nobo di reunion kongregashon?
8. Kon preparashon di antemano lo benefisiá tantu nos mes komo otro hende?
9. Kiko ta nos determinashon, i dikon?