Kon Nos Por Yuda Mantené Nos Salòn di Reino?

Tur Salòn di Reino di Testigunan di Yehova ta karga e nòmber santu di Dios. P’esei, ta un onor pa nos yuda mantené e edifisio limpi, presentabel i den bon kondishon. Esei ta un parti importante di nos sirbishi sagrado, i nos tur por yuda den esaki.

Ofresé pa hasi limpiesa despues di reunion. Despues di kada reunion, tantu ruman hòmber komo ruman muhé ta kla pa yuda limpia e Salòn di Reino. Un bes pa siman ta tene un limpiesa mas amplio. Un ansiano òf sirbidó ministerial ta koordiná e trabou, usando un lista ku ta indiká e kosnan ku mester hasi. Dependiendo di e nesesidat, rumannan ta ofresé pa bari, mòp òf stòfzùig e flur, kita stòf, drecha stul, limpia i desinfektá baño, laba bentana, limpia spil, hasi ko’i sushi bashí, limpia parti pafó di Salòn di Reino i tene e kurá limpi. Por lo ménos un biaha pa aña ta skohe un dia pa hasi un limpiesa profundo. Ora nos ta animá nos yunan pa yuda ku sierto trabou, nos ta siña nan haña rèspèt pa nos lugá di adorashon.—Eklesiástes 5:1.

Duna un man den e trabounan di mantenshon. Tur aña ta inspekshoná e Salòn di Reino tantu paden komo pafó. A base di e inspekshon akí por mira ki programa di mantenshon tin ku implementá pa e edifisio keda den bon kondishon i asina yuda evitá gastunan innesesario. (2 Krónikanan 24:13; 34:10) Un Salòn di Reino limpi i bon mantené ta un lugá digno pa adorá nos Dios. Ora nos duna un man den e trabou akí, nos ta demostrá kuantu nos ta stima Yehova i balorá nos lugá di adorashon. (Salmo 122:1) Ademas, esaki ta duna un bon impreshon den komunidat.—2 Korintionan 6:3.

• Dikon nos no mester neglishá nos lugá di adorashon?

• Ki areglo tin pa mantené nos Salòn di Reino limpi?