Laga Nos Mantené Nos Lugá di Adorashon den Bon Kondishon
1 Mundialmente tin mas ku 94.000 kongregashon di Testigunan di Yehova. Mayoria kongregashon ta reuní na un Salòn di Reino pa studia Beibel i pa asosiá ku nan rumannan kristian, i e lugá ei ta funshoná komo un sentro lokal di adorashon puru.
2 Limpiesa Programá Regularmente: Mantenshon di Salòn di Reino ta un parti vital di nos sirbishi sagrado. E buki Nos Ministerio ta deklará na página 61: “E rumannan mester konsider’é un privilegio no solamente pa sostené e Salòn di Reino finansieramente sino tambe pa ofresé nan servisionan boluntariamente pa manten’é limpi, presentabel i den bon kondishon. Tantu paden komo pafó, e Salòn di Reino mester ta un representashon apropiado dje organisashon di Yehova.” Siendo ku e Salòn di Reino ta wòrdu usá vários biaha pa siman, ta nesesario pa limpi’é i manten’é riba un base regular. Por lo general ta boluntarionan di e kongregashon(nan) ku ta reuní den e Salòn di Reino ta atendé e asuntunan aki. Meskos ku den tempu bíbliko, Yehova su sirbidónan djawe mester ta diligente den “restorá i drecha” nos lugá di adorashon.—2 Kró. 34:10.
3 Riba e bòrchi di informashon mester tin un programa pa limpiesa semanal di e Salòn di Reino. Tur studio di buki mester partisipá den esei i kada siman ta bùrt pa un di nan limpia salòn, segun un lista di kos ku nan tin ku hasi. Tur hende ku por, mester partisipá den e privilegio semanal aki di mantené e Salòn di Reino limpi i representabel. Bou di supervishon di nan mayornan por inkluí e muchanan tambe, i asina ta siña nan mustra apresio pa e privilegio di sirbi otro hende. Foral ora mas ku un kongregashon ta usa un Salòn di Reino, ta esensial pa tin bon koperashon ya asina e aspekto importante aki di nos adorashon no ta keda riba lomba di djis un par di hende.
4 Mester tin un lista di kosnan pa hasi, i si ta posibel peg’é kaminda ta warda e artíkulonan di limpiesa. E lista aki mester splika e trabou ku mester hasi tur siman, lokual ta inkluí pasa basora òf stòfzùiger, limpia bentana i bali, saka sushi, pasa mòp i limpia spil. Tin sierto kos ku mester hasi ménos regular, manera pòlish muebelnan di palu i limpia stul-, kortina- i lusnan kabalmente. Tur produkto kímiko ku ta wòrdu usá den limpiesa mester ta fuera di alkanse di mucha i mester tin etikèt ku ta indiká bon kla ta kiko nan ta. Tambe mester tin un splikashon breve kon ta usa kada produkto kímiko.
5 Siguridat na Salòn di Reino ta di sumo importansia. (Deu. 22:8) Relashoná ku esaki, e kuadro na página 4 ta menshoná algun kos ku mester kontrolá periódikamente pa asina prevení aksidente.
6 Mantenshon di e Salòn di Reino: E kuerpo di ansiano tin e responsabilidat di supervisá mantenshon di e Salòn di Reino. Por lo general, nan ta nombra un ansiano òf un sirbidó ministerial pa kordiná e trabou. E ta organisá e funshonamentu diario di e Salòn di Reino, hasiendo sigur ku e lugá ta ser mantené limpi i den bon kondishon i ku tin sufisiente produkto di limpiesa na stòk. Ta importante pa no tin situashonnan peligroso den salòn òf den kurá di salòn. Ora dos òf mas kongregashon ta usa e mesun salòn, e kuerponan di ansiano ta nombra un komité di mantenimentu pa organisá e areglonan pa kuida e edifisio i e tereno. E komité aki ta traha bou di direkshon di e kuerponan di ansiano.
7 Tur aña ta hasi un kontròl detayá di e Salòn di Reino. E ansianonan ta responsabel pa hasi areglo pa atendé kabalmente kualkier asuntu ku mester di atenshon. Nan por invitá e publikadónan pa yuda ku e trabou di reparashon i mantenshon. Tur hende mester ta alerta pa atendé asta e detayenan chikí i perkurá rápidamente pa e kosnan ku mester di atenshon.
8 Si e ansianonan tin mester di konseho òf yudansa pa mantenshon di e Salòn di Reino, nan por tuma kontakto ku e Komité Regional di Konstrukshon. Esei por ta pa asuntunan relashoná ku kuido di tapeit, kon pa service e èrkonan i kon pa remediá problemanan di humedat den e edifisio, manera ‘lekkage,’ beskein i demasiado humedat.
9 Usa e Fondonan di Kongregashon na un Manera Sabí: Mayoria trabou riba e Salòn di Reino òf den kurá ta ser hasí dor di boluntarionan. Nan esfuerso, ku ta reflehá sakrifisio propio, ta un bunita ekspreshon di amor i ta kontribuí hopi na baha gastu. Si bira nesesario pa buska un kontratista òf un hende pafó di e kongregashon pa hasi sierto trabounan, manera pèst kontròl òf otro trabou kompliká òf ku mester di mashin spesial, e ansianonan ta buska e oferta mas ekonómiko pa hasi e trabou ei. Nan ta hasi esei dor di prepará promé un deskripshon detayá por eskrito di e trabou ku mester hasi i di e material nesesario. Anto nan ta duna e lista aki na diferente suministradó di manera ku nan tur por duna un oferta basá riba e mesun rekisitonan. Despues ku e ansianonan risibí e ofertanan por eskrito di vários prospektivo suministradó, nan por skohe e mihó oferta. Mester sigui e prosedura aki asta si un ruman a ofresé pa hasi e trabou òf pa suministrá e material nesesario na un preis spesífiko.
10 Ora ku mas ku un kongregashon ta usa e Salòn di Reino, e komité di mantenimentu ta tene un kuenta koriente separá i mensualmente ta duna kada kuerpo di ansiano un rapòrt finansiero por eskrito, ya asina e ansianonan ta keda informá di e manera ku ta usando e fondonan. E ansianonan ta esnan responsabel pa wak ku e fondonan di kongregashon ta ser usá debidamente.
11 Mantenshon i Renobashon Ekstenso: Ora ku e komité di mantenimentu opservá ku mester hasi un trabou grandi en konekshon ku mantenshon di e Salòn di Reino, e komité tin ku pidi guia di e kuerponan di ansiano. Si e ansianonan determiná ku mantenshon òf renobashon ekstenso ta nesesario òf ku nan lo tin mester di yudansa pafó di e kongregashon(nan) ku ta reuní na e Salòn di Reino, e ora ei nan ta tuma kontakto ku e Komité Regional di Konstrukshon. E rumannan kualifiká i eksperensiá di e komité aki ta perkurá sugerensianan práktiko i supervishon pa dirigí e trabou. Si esaki ta enserá un gastu grandi, lo ta nesesario pa hasi un kalkulashon eksakto di e kosto i prepará un resolushon pa haña aprobashon di e kongregashon.—Wak e Kaha di Pregunta den Nos Ministerio di Reino di febrüari 1994.
12 Nos ta apresiá mashá e privilegio ku nos tin di reuní huntu na e Salòn di Reino. Nunka nos lo kier neglishá nos reunionnan ni konsiderá nan di poko balor. Nos tur por kontribuí na e éksito di e perkurashon aki ku t’ei pa nos animashon, dor di partisipá plenamente den e kuido di nos Salòn di Reino. Esaki ta engrandesé adorashon puru i ta onra e nòmber di Yehova. Pues, laga nos ta determiná pa mantené nos lugá di adorashon den bon kondishon.
[Study Questions]
1. Kiko ta e propósito di e Salòn di Reino?
2. Dikon ta importante pa mantené e Salòn di Reino limpi i representabel?
3. Kon mester organisá limpiesa di Salòn di Reino, i ken por partisipá den e privilegio aki?
4. Kiko mester tin pa asina e kongregashon por sa loke nan mester hasi ora di limpia Salòn di Reino?
5. Kon importante siguridat ta, i kiko ta e kosnan ku mester kontrolá periódikamente? (Wak e kuadro na página 4.)
6. Kon e trabou di mantené e Salòn di Reino ta ser kordiná?
7. (a) Kiko ta tuma lugá tur aña pa garantisá ku e Salòn di Reino ta keda den bon kondishon? (b) Kiko ta e kosnan ku mester di atenshon periódikamente? (Wak e kuadro na página 5.)
8. Ki ora e ansianonan por tuma kontakto ku e Komité Regional di Konstrukshon relashoná ku asuntunan di mantenshon?
9. Ki prosedura mester sigui si ta nesesario pa buska un kontratista?
10. Kiko ta wòrdu hasí pa garantisá ku ta usa fondonan di kongregashon debidamente?
11. Kiko mester hasi si mantenshon òf renobashon ekstenso ta nesesario?
12. Kon nos por demostrá nos apresio pa e privilegio di por asistí na e reunionnan na Salòn di Reino?
[Box on page 5]
Kuido di e Edifisio i di Kurá
◻ Pafó: E dak, murayanan, fèrf, bentananan i bòrchi di Salòn di Reino ta den bon kondishon?
◻ Kurá: E kurá ta bon mantené? E asera, waya òf muraya di kurá i lugá di parker ta den bon kondishon?
◻ Paden: E tapeit, kortinanan, stulnan, lusnan, murayanan i kashinan di buki ta representabel?
◻ Ekipo: E lusnan, e ekipo di zonidu, ventilashon i èrko ta funshoná bon?
◻ Tualèt: Nan ta limpi i ta funshoná bon?
◻ Dokumentonan di kongregashon: E dokumentonan legal òf di e fundashon ta al dia i eksakto?
[Picture on page 4]
Lista di Kontròl di Siguridat
◻ Aparatonan di paga kandela mester ta fásil pa yega na dje i mester wòrdu di service tur aña.
◻ Salidanan mester ta klaramente marká, bon iluminá i fásil pa yega na dje, i si tin man na trapi nan mester ta bon pegá.
◻ Lugánan di warda kos i tualèt mester ta limpi i ordená. Den nan no mester tin produktonan altamente flamabel ni artíkulonan personal ni sushi.
◻ Dak i ‘goot’ (het) mester wòrdu kontrolá i limpiá regularmente.
◻ Asera i lugá di parker mester ta bon iluminá i sin opstákulo ku por pone hende slep òf kai.
◻ Mester kontrolá i service sistemanan eléktriko i di ventilashon debidamente.
c◻ Mester drecha kualkier ‘lekkage’ rápidamente pa prevení problemanan serio ku humedat.
c◻ Mester sera e edifisio na yabi ora no tin niun hende den dje.