Caha Di Pregunta

◼ Ken ta responsabel pa limpiesa di Salon di Reino?

Un Salon di Reino cu ta limpi i atractivo ta duna un refleho positivo riba e mensahe cu nos ta predicá. (Compará cu 1 Pedro 2:12.) Ta esencial pa tene salon limpi i na ordu, i tur hende por yuda den manten’é. Nos no mester verwagt pa un par di hende so hiba henter e carga di responsabilidad. Por lo general, ta haci areglo pa limpiesa segun gruponan di Studio di Buki di Congregacion, i e conductor dje studio of su asistent ta hiba e delantera. Den salonnan cu tin mas cu un congregacion ta reuní, e ancianonan lo organisá cos di tal manera cu tur e congregacionnan ta participá den e mantencion.

Cua ta e mihó manera pa nos atendé e responsabilidad aki? Mester limpia Salon di Reino segun un programa regular. Mester tin ekipo i artículonan di limpiesa na man. Mester tin un lista dje cosnan cu tin cu haci, na un caminda cu e trahadónan por consult’é pa haña instruccion. Por tin dos diferente lista, unu pa limpiesa liviano despues di cada reunion i un otro pa un limpiesa mas cabal un bes pa siman. E conductor di studio di buki mester programá e limpiesa cabal riba un dia i ora cu ta cumbiniente pa tur esnan di su grupo. Mester duna atencion regular tambe na yerba den curá, e mata i flornan. No mag di tin sushi riba acera ni riba parkeerplaats. Tur aña mester haci un ‘grote beurt,’ kisas djis promé cu Memorial. E por incluí laba bentana i muraya, laba e tapijt i e cortinanan.

Claro cu nos tur por aliviá e carga dor di no benta bals ni sushi abou sea paden of pafó di salon. Cada bes cu nos usa baño nos por lagu’e limpi pa e siguiente persona. Tene cuidou pa no kibra ekipo ni daña e mobilario. Tuma nota di mancha riba tapijt, stulnan kibrá, problema cu pipanan di awa, lusnan kimá, etcétera, i informá e ruman encargá cu mantencion di Salon di Reino mesora.

Laga nos tur ta dispuesto pa haci nos parti. Esaki ta contribuí na un cas di adoracion agradabel i ta distinguí nos como un pueblo limpi cu ta onra Jehova Dios.—1 Ped. 1:16.