Kon Bo Por Sa Kua Ta e Religion Berdadero?

1. Ta ún religion berdadero so tin?

Hesus a siña su siguidónan kon nan tin ku adorá Dios; e forma di adorá Dios ei ta e religion berdadero. E ta manera un kaminda ku ta hiba na bida eterno. Hesus a bisa: “Poko ta esnan ku ta hañ’é.” (Mateo 7:14) Dios ta aseptá solamente adorashon basá riba e bèrdat ku nos por haña den su Palabra. Hende ku ta adorá Dios asina ta uní den un solo fe.—Lesa Huan 4:23, 24; 14:6; Efesionan 4:4, 5.

Wak e vidio Dios Ta Aseptá Tur Forma di Adorashon?

2. Kiko Hesus a bisa di hende ku ta pretendé di ta kristian?

Hesus a spièrta ku lo bini profeta falsu ku lo purba korumpí siñansa kristian. Nan ta duna e impreshon di ta adorá Dios, i nan iglesianan ta pretendé di ta kristian. Pero bo por ripará ku nan no ta kristian. Dikon? Pasobra ta e religion berdadero so ta produsí kristian ku ta manifestá bon kualidat i obra ku ta kuadra ku e kaminda kristian.—Lesa Mateo 7:13-23.

3. Kon bo por sa ken ta adorá Dios na e manera korekto?

Laga nos wak sinku aspekto ku ta yuda bo identifiká nan:

• Hende ku di bèrdat ta adorá Dios tin rèspèt pa su Palabra. Nan ta hasi esfuerso pa biba segun prinsipionan di Beibel. Pues, e religion berdadero ta distinto for di religion ku ta basá riba idea di hende. (Mateo 15:7-9) Hende ku di bèrdat ta adorá Dios no ta prediká un kos i hasi otro.—Lesa Huan 17:17; 2 Timoteo 3:16, 17.

• 

  Hesus su berdadero siguidónan ta onra e nòmber di Dios, esta, Yehova. Hesus a duna hende di konosé e nòmber di su Tata i den e manera ei el a onra e nòmber di Dios. El a yuda hende konosé Dios i a siña nan pidi pa e nòmber di Dios ser santifiká. (Mateo 6:9) Kaminda bo ta biba, kua religion ta hasi Dios su nòmber konosí?—Lesa Huan 17:26; Romanonan 10:13, 14.

• Kristiannan berdadero ta prediká tokante e Reino di Dios. Dios a manda Hesus pa prediká e bon notisia di e Reino. E Reino di Dios ta e úniko speransa pa humanidat. Hesus a papia di dje te na su morto. (Lukas 4:43; 8:1; 23:42, 43) El a bisa ku su siguidónan lo a prediká tokante e Reino akí. Si un hende aserká bo pa papia ku bo tokante e Reino di Dios, na kua religion bo ta kere ku e ta pertenesé?—Lesa Mateo 24:14.

• Hesus su siguidónan no ta parti di e mundu malbado akí. Bo por rekonosé nan pasobra nan no ta enbolbé nan mes den polítika ni den manifestashonnan di protesta. (Huan 17:16; 18:36) Tampoko nan no ta imitá e kustumber- i aktitutnan perhudisial di mundu.—Lesa Santiago 4:4.

• Kristiannan berdadero ta demostrá un amor eksepshonal pa otro. E Palabra di Dios ta siña nan respetá hende di tur rasa i nashonalidat. Aunke religion falsu hopi bes a apoyá guera di e nashonnan abiertamente, kristiannan berdadero ta nenga di hasi esei. (Mikéas 4:1-3) Mas bien, di buena gana nan ta usa nan tempu i rekursonan pa yuda i animá otro hende.—Lesa Huan 13:34, 35; 1 Huan 4:20.

4. Bo por sa kua ta e religion berdadero?

Kua religion ta basa tur su siñansanan riba e Palabra di Dios, ta onra e nòmber di Dios i ta proklamá e Reino di Dios komo e úniko speransa pa humanidat? Kua grupo religioso ta mustra amor pa otro i no ta apoyá guera? Kiko abo ta pensa?—Lesa 1 Huan 3:10-12.