Lès 13

Con Bo Por Haña e Religion Berdadero?

Tur religion ta agradá Dios, of ta un so? (1)

Pakico tin asina tantu religion cu ta afirmá di ta cristian? (2)

Con bo por identificá cristiannan berdadero? (3-7)

1. Jesus a funda un solo religion cristian berdadero. Pues awe mester tin solamente un solo cuerpo, of grupo, di adoradornan berdadero di Jehova Dios. (Juan 4:23, 24; Efesionan 4:4, 5) Bijbel ta siña cu solamente un poco hende ta riba e caminda smal cu ta hiba na bida.—Mateo 7:13, 14.

2. Bijbel a pronosticá cu despues di morto dje apostelnan, siñansanan robes i prácticanan no-cristian lo a drenta e congregacion cristian gradualmente. Hombernan lo a atraé creyentenan pa sigui nan en bes di Cristo. (Mateo 7:15, 21-23; Echonan 20:29, 30) Ta p’esei nos ta mira asina tantu diferente religion cu ta afirmá di ta cristian. Con nos por identificá e cristiannan berdadero?

3. E marca di mas sobresaliente di cristiannan berdadero ta cu nan tin berdadero amor entre nan. (Juan 13:34, 35) Nan no ta ser siñá pa pensa cu nan ta mihó cu hende di otro rasa of color di cueru. Tampoco nan no ta ser siñá pa odia hende di otro pais. (Echonan 10:34, 35) Pues nan no ta participá den guera. Cristiannan berdadero ta trata otro manera ruman.—1 Juan 4:20, 21.

4. Un otro característica dje religion berdadero ta cu su miembronan tin un respet profundo pa e Bijbel. Nan ta acept’é como e Palabra di Dios i ta kere loke e ta bisa. (Juan 17:17; 2 Timoteo 3:16, 17) Nan ta trata e Palabra di Dios como mas importante cu ideanan of custumbernan di hende. (Mateo 15:1-3, 7-9) Nan ta purba biba di acuerdo cu e Bijbel den nan bida diario. Pues nan no ta predicá un cos i despues ta practicá otro cos.—Tito 1:15, 16.

5. Tambe e religion berdadero mester onra e nomber di Dios. (Mateo 6:9) Jesus a haci e nomber di Dios, Jehova, conocí na otronan. Cristiannan berdadero mester haci mescos. (Juan 17:6, 26; Romanonan 10:13, 14) Ken ta e hendenan den bo comunidad cu ta papia cu otronan tocante e nomber di Dios?

6. Cristiannan berdadero mester predicá tocante e Reino di Dios. Jesus a haci esaki. Semper el a papia tocante e Reino. (Lucas 8:1) El a manda su disipelnan pa predicá e mésun mensahe aki den tur e tera. (Mateo 24:14; 28:19, 20) Cristiannan berdadero ta kere cu solamente e Reino di Dios lo trece berdadero pas i siguridad na e tera aki.—Salmo 146:3-5.

7. Jesus su disipelnan no mag ta parti dje mundu malbado aki. (Juan 17:16) Nan no ta enbolbé nan mes den asuntunan político i controversianan social dje mundu. Nan ta evitá conducta, prácticanan i actitudnan perhudicial cu ta comun den e mundu. (Santiago 1:27; 4:4) Abo por identificá un grupo religioso den bo comunidad cu tin e marcanan aki di berdadero cristianismo?

[Plachi na página 26, 27]

Cristiannan berdadero ta stima otro, ta respetá e Bijbel i ta predicá tocante e Reino di Dios