Siña Konosé e Palabra di Dios
Kon Bo Por Identifiká e Adorashon Berdadero?
E artíkulo akí ta trata algun pregunta ku kisas bo tin i e ta mustra bo unda pa haña e kontestanan den bo Beibel. Si bo ta deseá, Testigunan di Yehova gustosamente lo trata e preguntanan akí ku bo.
1. Ta ún religion berdadero so tin?
Hesus a siña su siguidónan solamente un religion, esun berdadero. E religion berdadero ta manera un kaminda ku ta hiba na bida. Tokante e kaminda ei, Hesus a bisa: “Poko ta esnan ku ta hañ’é.” (Mateo 7:14) E úniko forma di adorashon ku Dios ta aseptá, ta esun basá riba e bèrdat di su Palabra. Tur adoradó berdadero ta uní den un solo fe.—Lesa Juan 4:23 i 24; 14:6; Efesionan 4:4 i 5.
2. Dikon tin asina tantu religion ku ta yama nan mes kristian?
Maestronan falsu a korumpí e siñansanan di kristianismo i a usa religion pa promové nan mes interesnan. Manera Hesus a profetisá, nan ta presentá nan mes komo su ‘karnénan’ pero nan ta aktua manera lobonan hambrá. (Mateo 7:13-15, 21, 23) Kristianismo falsu a desaroyá spesialmente despues ku Hesus su apòstelnan a muri.—Lesa Echonan 20:29 i 30.
3. Kua ta algun karakterístika ku ta distinguí adorashon berdadero?
Adoradónan berdadero ta respetá Beibel komo e Palabra di Dios. Nan ta hasi esfuerso pa biba di akuerdo ku prinsipionan bíbliko. Pues e religion berdadero ta diferente for di religion ku ta basá riba ideanan humano. (Mateo 15:7-9) Adoradónan berdadero no ta prediká un kos i ta praktiká otro.—Lesa Juan 17:17; 2 Timoteo 3:16 i 17.
E religion berdadero ta onra e nòmber di Dios, Yehova. Hesus a hasi e nòmber di Dios konosí. El a yuda hende konosé Dios i a siña nan pidi den orashon pa e nòmber di Dios sea santifiká. (Mateo 6:9) Kaminda bo ta biba, kua religion ta animá hende pa usa e nòmber di Dios?—Lesa Juan 17:26; Romanonan 10:13 i 14.
4. Kon bo por rekonosé adoradónan berdadero?
Kristiannan berdadero ta prediká tokante e Reino di Dios. Dios a manda Hesus pa prediká tokante e Reino. E Reino di Dios ta e úniko speransa pa humanidat. Hesus a papia di e Reino te na último momento di su bida. (Lukas 4:43; 8:1; 23:42, 43) El a bisa su siguidónan pa prediká tokante e Reino di Dios. Si un hende aserka bo pa papia di e Reino di Dios, na kua religion probablemente e ta pertenesé?—Lesa Mateo 10:7 i 24:14.
Hesus su siguidónan no ta parti di e mundu malbado akí. Nan no ta partisipá den asuntunan polítiko ni den konfliktonan sosial. (Juan 17:16) Tampoko nan no ta imitá mundu su práktikanan i aktitutnan perhudisial.—Lesa Santiago 1:27 i 4:4.
5. Kua ta e marka prinsipal di kristianismo berdadero?
Kristiannan berdadero ta mustra amor genuino entre nan. Nan ta siña for di e Palabra di Dios pa respetá miembronan di tur nashon. Aunke religion falsu hopi bes a apoyá guera entre nashonnan, adoradónan berdadero ta nenga di hasi esaki. (Mikeas 4:1-4) Mas bien, miembronan di e religion berdadero boluntariamente ta usa nan tempu i rekursonan pa yuda i animá otro hende.—Lesa Juan 13:34 i 35; 1 Juan 4:20 i 21.
Kua grupo ta basa tur su siñansanan riba e Palabra di Dios, ta onra Dios su nòmber i ta proklamá e Reino di Dios komo e úniko speransa pa humanidat? Kua grupo ta mustra amor i no ta apoyá guera? Tur prueba ta indiká ku ta Testigunan di Yehova.—1 Juan 3:10-12.
Pa mas informashon, wak kapítulo 15 di e buki akí, Kiko Beibel Ta Siña Realmente?, publiká pa Testigunan di Yehova.
[Plachi na página 28]
“Nan ta profesá ku nan konosé Dios, ma ku nan echonan nan ta neng’é.”—Tito 1:16