Jesus A Nace den Tempu di Sneu?

“SNEU Pisá Ta Paralisá Jerusalem” i “Caída Abundante di Sneu Ta Asombrá Hende di Nort.” Tal titular den The Jerusalem Post a bira un cos comun pa lectornan israelí na 1992, den loke a resultá di ta un dje winternan mas severo dje siglo na Israel.

Pa januari e top dje Ceru di Hermon tabata cubrí cu 7 pa 12 meter di sneu, i winter tabata leu di terminá. For di Altura Golano i Galilea Ariba pasa Jerusalem bai abou i cerca Betlehem (bisto riba e kaft), asta pa sur den Negeb, bes tras bes e bida i rutina diario israelí a ser paralisá pa un bishitante placentero i delicado, pero potente. Un artículo di Jerusalem Post a declará: “Caída pisá di sneu a logra haci ayera loke un yobida di raket Katyusha no a logra di haci siman pasá, cerando establecimentunan i teniendo habitantenan firmemente trincherá den nan cas.”

No ta n’e habitantenan di stad so e winter pisá a causa ruina. A drenta informe di cientos di baca i bisé, i tambe miles di galiña, cu a vries muri ora temperatura di anochi a cai bou di punto di congelacion. Como si fuera e sneu no tabata suficiente, yobida pisá i friu tambe a exigí su víctimanan. Riba un dia, dos wardador hóben, aparentemente tratando desesperadamente pa salba un cantidad di nan carnénan cu a ser hibá pa un inundacion, nan mes a ser lastrá i a hoga den e coriente.

Aunke esaki no tabata un winter típico pa Medio Oriente, e revista israelí Eretz a informá: “E datonan meteorológico cu a ser colectá i registrá den e pais di Israel p’e último 130 añanan ta revelá cu sneu den Jerusalem ta un fenómeno mas comun cu bo por spera . . . Entre 1949 i 1980, e stad di Jerusalem tabatin binticuater winter cu sneu.” Pero esaki tin solamente un balor meteorológico i interes humano, of e tin nificacion particular pa studiantenan di Bijbel?

Ki Importancia pa Studiantenan di Bijbel?

Pensando riba e nacimentu di Jesus, hopi hende ta imaginá nan mes e esena di pesebre emocionalmente atractivo cu ta ser exhibí hopi bes den tempu di pascu. Ata e niño Jesus, lorá den paña pa ten’é cayente i protehá pa su mama, cu un tapijt fini di sneu cubriendo e paisahe rondó. E bista popular aki ta cuadra cu e descripcion di Bijbel dje evento histórico aki?

E escritor bíblico Lucas ta conta un relato cuidadosamente documentá tocante nacimentu di Jesus: “Tambe tabatin n’e mesun tera ei wardador di carné bibando den campo pafó i teniendo warda anochi riba nan tounan. I di ripiente e angel di Jehova a para cerca nan, i e gloria di Jehova a lusa rond di nan, i nan a haña masha miedu. Pero e angel a bisa nan: ‘No tene miedu, pasobra, mira! mi ta declará na boso bon nobo di un gran goso cu tur pueblo lo haña, pasobra a nace na boso awe un Salbador, cu ta Cristo e Señor, den e stad di David [Betlehem]. I esaki ta un siñal pa boso: boso lo haña un criatura lorá den repi di tela i drumí den un pesebre.’ I di ripiente a bini huntu cu e angel un multitud dje ehército celestial, alabando Dios i bisando: ‘Gloria na Dios den haltura ariba, i na tera pas entre hende di bon boluntad.’”—Lucas 2:8-14.

Si bo lesa e relato aki n’e israelí comun awe i puntr’é ki tempu di aña esaki lo por tabata, probablemente lo e contestá, “Cualkier tempu entre april i october.” Pakico? E contesta ta simpel. E temporada friu i yubioso na Israel ta for di november pa mart i 25 di december ta siguramente den tempu di winter. E wardadornan lo no ta bibando pafó di cas i teniendo warda anochi riba nan tounan den campo. Considerando e informenan na cuminsamentu dje artículo aki, bo por comprendé bon e motibu p’esei. Betlehem, caminda Jesus a nace, ta situá den e elevacionnan mas haltu i ta djis algun kilometer for di Jerusalem. Asta den añanan ora e weer ta ménos extremo, ei ta basta friu anochi den winter.—Miqueas 5:2; Lucas 2:15.

Un bistaso den historia n’e tempu dje nacimentu di Jesus ta tira lus rib’e echo cu e no a nace durante tempu di sneu di december. Jesus su mama, Maria, aunke e tabata den un estado avansá di embaraso, tabatin cu biaha for di su cas den Nazaret pa Betlehem. E cu José a haci esei pa cumpli cu e rekisito dje censo cu e gobernante romano, César Augusto, a decretá. (Lucas 2:1-7) E poblacion hudiu, cu a carga rencor contra e gobiernu romano i su impuesto haltu, ya tabata na punto di rebelá. Pakico Roma lo a iritá nan innecesariamente dor di exigí hopi di nan biaha pa bai registrá nan mes durante e tempu di winter di mas difícil i asta traicionero? No ta hopi mas razonabel cu esaki lo a ser decretá pa un temporada den cua tabata fácil pa biaha, manera durante lente of herfst?

Calculacionnan Basá Riba Bijbel

E evidencia histórico i físico ta descualificá december, of cualkier otro luna di winter, pa cuadra cu relato dje nacimentu di Jesus. Ademas, Bijbel ta revelá mediante profecia e tempu di aña cu Jesus a nace. Unda e ta haci esaki?

Den e buki di Daniel, capítulo 9, nos ta haña un dje profecianan di mas impresionante tocante e Mesías. E ta describí tantu su binimentu como su cortamentu den morto, cua a percurá un sacrificio di rescate pa compensá picá i establecé un base pa humanidad obediente gana “husticia pa tempu indefiní.” (Daniel 9:24-27; compará cu Mateo 20:28.) Segun e profecia aki, tur esaki lo a ser cumplí den un periodo di 70 siman di aña, cuminsando na aña 455 P.E.C., ora e mandamentu a sali pa reedificá Jerusalem.a (Nehemías 2:1-11) For dje division di tempu den e profecia aki, bo por dicerní cu e Mesías lo a aparecé na cuminsamentu dje di setenta siman di aña. Esaki a sosodé ora Jesus a presentá su mes pa bautismo na aña 29 E.C., cuminsando oficialmente su papel mesiánico. “Na mitar dje siman,” of despues di tres aña i mei, e Mesías lo a ser cortá den morto, treciendo asina un fin n’e balor di tur sacrificio bou dje pacto di Ley di Moises.—Hebreo 9:11-15; 10:1-10.

E profecia aki ta revelá cu e largura dje ministerio di Jesus tabata tres aña i mei. Jesus a muri dia di Pascu hudiu, 14 di Nisan (segun e calender hudiu), den lente di aña 33 E.C. E fecha ekivalente p’e aña ei lo ta 1 di april. (Mateo 26:2) Contando bai bek tres aña i mei ta pone su bautismo na aña 29 E.C. den cuminsamentu di october. Lucas ta informá nos cu Jesus tabatin rond di 30 aña di edad na su bautismo. (Lucas 3:21-23) Esaki lo a nificá cu Jesus su nacimentu tambe lo tabata cerca di principio di october. Na armonia cu Lucas su relato, e wardadornan n’e tempu di aña ei lo tabata ainda “den campo pafó i teniendo warda anochi riba nan tounan.”—Lucas 2:8.

Di Ki Fuente?

Siendo cu e evidencia ta señalá na principio di october como e tempu dje nacimentu di Jesus, pakico e ta ser celebrá dia 25 di december? The New Encyclopædia Britannica ta mustra cu e celebracion aki a ser adoptá siglonan despues dje nacimentu di Jesus: “Durante siglo 4 e celebracion dje nacimentu di Cristo riba 25 di december a ser adoptá gradualmente pa mayoria iglesia europeo. Na Jerusalem, oposicion contra Pascu a dura mas largu, pero despues el a ser aceptá.”

Pakico e custumber a ser aceptá asina fácilmente dor di esnan cu ta yama nan mes cristian hopi siglo despues di Cristo? The New Encyclopædia Britannica ta tira mas lus rib’e tópico: “E custumbernan tradicional conectá cu Pascu a desaroyá for di varios fuente como resultado dje coincidencia dje celebracion di nacimentu di Cristo cu e custumbernan pagano di agricultura i solo meimei di winter. Den e mundu romano e Saturnalia (17 di december) tabata un tempu di alegria i intercambio di regalo. Binticincu di december a ser considerá tambe como e fecha di nacimentu di Mitra, e dios di misterio iraní, Solo di Husticia.”

Tur esaki tabata realmente un “coincidencia”? Di ningun manera! Ta un echo di historia cu den siglo cuater E.C., bou di Emperador Constantino, e Imperio Romano a cambia significativamente for di persiguidor di cristianismo pa promotor di “cristianismo” como un religion aceptá. Segun cu mas hende dje poblacion en general, cu no a comprendé e berdadero nificacion di cristianismo, a adoptá e fe nobo aki, nan a cuminsá celebrá nan festivalnan pagano conocí cu títulonan “cristian” nobo. Cua fecha lo por tabata mas apropiado p’e celebracion dje nacimentu di Cristo cu 25 di december, cua tabata marcá caba como e fecha di nacimentu dje “Solo di Husticia”?

E Ta Importá?

Tin poco duda pa kere cu e promé siguidornan di Jesus, cu tabata di antecedencia hudiu, a celebrá su cumpliaña. Segun e Encyclopaedia Judaica, “e celebracion di cumpliaña ta desconocí den ritonan hudiu tradicional.” E promé cristiannan siguramente lo no a adoptá un celebracion asina. En bes di celebrá su nacimentu, nan lo a respetá Jesus su mandamentu pa conmemorá su morto, pa cua nan tabatin un fecha indiscutibel, esta, 14 di Nisan.—Lucas 22:7, 15, 19, 20; 1 Corintio 11:23-26.

Siglonan promé cu Cristo, e pueblo hudiu, cu tabata n’e tempu ei e nacion scogí di Dios, a ser spiertá proféticamente tocante e fin di nan futuro exilio na Babilonia: “Apartá boso, apartá boso, sali for di einan, no mishi cu nada impuru; sali for di meimei di dje, mantené boso mes limpi, boso cu ta cargando e hermentnan di Jehova.” (Isaías 52:11) Nan mester a regresá na nan patria pa reestablecé Jehova su adoracion puru. Lo tabata impensabel pa nan adoptá e custumbernan pagano i formanan di adoracion impuru cu nan a observá na Babilonia.

No ta un sorpresa cu e mesun mandamentu aki ta ser ripití pa cristiannan na 2 Corintio 6:14-18. Na lugá dje nacion hudiu cu a rechasá Cristo, su siguidornan a bira e representantenan di adoracion puru. Nan tabatin e responsabilidad pa yuda otronan sali for di scuridad spiritual pa drenta e lus di berdad. (1 Pedro 2:9, 10) Con nan posiblemente por a haci esaki si nan a mescla siñansa di Cristo cu custumber i fiesta di orígen pagano?

Maske cuantu hende ta gusta esei, celebracion di “White Christmas” [Pascu den Tempu di Sneu] ta igual cu “mishi cu e cos impuru.” (2 Corintio 6:17) Un persona cu berdaderamente ta stima Dios i Cristo mester evit’é.

Apart dje echo cu su orígen ta den celebracion pagano, nos a mira tambe cu Pascu no ta representá e berdad, siendo cu Jesus a nace den october. Sí, sin importá ki esena un persona ta imaginá su mes, Jesus simplemente no a nace den tempu di sneu.

[Footnotes]

[Picture on page 4, 5]

Jerusalem cubrí cu sneu, mirá for di parti oost

[Credit Line]

Garo Nalbandian

[Picture on page 6]

Sneu banda dje murayanan di Jerusalem

[Picture on page 7]

Solamente den e temporada calor e wardadornan por keda cu nan tounan anochi rib’e cerunan di baranca, manera nos por mira aki bou

[Credit Line]

Garo Nalbandian