HOVENAN cu ta ‘confia den Jehova’

HOVENAN no tin un monopolio riba boniteza, ni hende di edad so ta domina sabiduría. (Compara cu Proverbio 11:22; Eclesiastés 10:1.) Mas bien, hende cu tin un boniteza permanente i berdadero sabiduría ta hende cu ta confia den Jehova Dios i cu ta bisa sinceramente di dje: “Bo ta mi Dios.”—Salmo 31:14; Proverbio 9:10; 16:31.

Rond di mundo tin un multitud aumentante di hende bonita, tanto hoven como bieu, cu ta manifesta nan sabiduría sirbiendo Dios i predicando e bon nobo dje Reino di Dios. Por ehempel, considera Sabrina di ocho aña di edad.

Sabrina ta biba den Alemania i ta den tweede klas. E ta e promé Testigo di Jehova pa bai ne scol ei. Lamentablemente, e tabata e punto di atake di insulto di compañé di scol te cu un dia jufrow a pidi alumno trece nan buki favorito na klas. Sabrina a decidi di hiba Mi buki di relato bíblico. Anochi promé cu esei, aunque e tabata nervioso, el a prepará bon pe klas. Siendo cu tabatin 26 alumno den e klas, e tabata sa cu probablemente lo e no tin mucho tempo. Pero el a keda determiná di no laga ningun hende interrumpi su presentacion i a keda sigur cu Jehova Dios lo yudé. Riba e dia poní, jufrow a puntra ken a trece nan buki i kier ser promé den nan presentacion. Sorprendiblemente, Sabrina so a trece su buki. El a para dilanti dje klas i a cuminza papia, leza i mustra plachi dje buki i splica cu tur cos ta fundá ariba e Bijbel. Den su conclusion el a puntra: “Ken ta interesá pa haya e buki aki?” El a duna un copia ne jufrow, i durante e sigiente dianan, el a duna diez buki mas na algun compañé di scol. E único comentario dje jufrow tocante su presentacion tabata: “Mi nunca a mira un cos manera esei.” El a duna Sabrina diez pa su presentacion.

Realmente, hopi Testigo di Jehova hoven ta publicador feliz dje bon nobo na scol. Un otro ehempel ta Erika, un publicador di 11 aña den México. El a ser siñá for di infancia pa stima Jehova Dios. Su trabao di scol ta sobresaliente. Un asignacion di dje tabata pa prepara informacion tocante AIDS i adiccion na tabaco i alcohol. El a prepara bon, usando e revista Despertad!, i a recibi e marca di mas halto. Su jufrow a puntra unda el a haya e informacion i a recibi revista cu a contene artículo tocante e asunto. Despues, jufrow a usa e revistanan pa considera e asunto cu tur e klas. Debí na conducta di Erika, su respet pa jufrow, i su marca halto, el a cumpli cu requisito pa recibi regalo, diploma, i pagamento parcial di beca. No obstante, Erika ta kere cu su logramento mayor tabata cu el a identifica su mes como un Testigo di Jehova, i por a parti literatura bíblica, i halza e nomber di Dios.

També, tin Shannon, un mucha homber di diez aña cu ta biba na Nueva Zelandia. E tin un banda di wowo so; el a perde e otro debí na cáncer ora e tabata chikito. Ora Shannon tabatin siete aña di edad, su mama a cuminza studia e Bijbel cu Testigo di Jehova. Pero, un poco tempo despues cu el a cuminza Bijbel les, el a cuminza biba compañá cu un homber sin e beneficio di matrimonio i a decidi di no studia mas. Shannon a pidi pa su estudio bíblico sigi. Nan a cumpli cu su deseo. Testigo di Jehova a sigi bishitánan, i cu tempo tur tres miembro dje famía a studia e Bijbel i a haci progreso spiritual. Despues di a casa legalmente, e mama i tata di crianza di Shannon a bautiza.

Un dia Shannon i esposa dje superintendente di circuito tabata den e sirbishi di feld hunto. Un doño di cas a puntra Shannon: “Kico a pasa bo wowo?” El a contestá: “Mi a haya cáncer den dje, i nan tabatin cu saqué. Pronto Jehova Dios lo dunámi un wowo nobo den Paradijs i nos ta aki pa bisábo tocante dje.”