Adorando Dios cu Berdad

Pa Dios aceptá nos adoracion, e mester ta basá riba e berdad. (Juan 4:23) Bijbel ta identificá adoradónan berdadero como hende cu ta pertenecé na “e congregacion di e Dios bibu, un pilar i apoyo dje berdad.” (1 Timoteo 3:15) Esnan cu ta forma e congregacion di Dios no solamente ta kere e berdad dje Palabra di Dios, sino tambe ta biba na armonia cuné, ta defend’é i ta hacié conocí rond mundu.—Mateo 24:14; Romanonan 10:9-15.

TESTIGONAN DI JEHOVA ta bon conocí pa nan trabou educacional di Bijbel cu awor ta ser hací den mas cu 200 pais. Nan ta studia Bijbel i ta siñ’é na otro hende como e berdad, sin incorporá e influencia debilitador di filosofia humano. Bo conocé nan siñansanan basá riba Bijbel? Hopi hende ta vacilá pa scucha Testigonan di Jehova pa motibu dje informacion negativo cu ta circulá contra nan. Pero hende di curason onrado ta ser invitá pa dicidí pa nan mes si loke e Testigonan ta predicá ta e berdad of no. Un decision vital asina no mester ta basá riba loke bo a tende otro hende bisa. Hopi hende cu a investigá e siñansanan di Testigonan di Jehova personalmente, a saca hopi beneficio di esaki.

Conocimentu dje Berdad Ta Core cu Miedu

Tuma por ehempel, e caso di Eugenia. El a lanta den un famia masha católico. Su tata tabata un dje organisadónan dje bishita papal na México na 1979. Un dia cu Eugenia tabata di bishita cerca algun amigu, el a bin den contacto cu Testigonan di Jehova. Cu nan yudansa el a cuminsá analisá mas cuidadosamente loke Bijbel ta bisa. E ta corda: “Na principio, miedu a cuminsá lanta den mi. Mi a haña e berdad! Pero esaki a nificá cu mayoria di mi creencianan anterior tabata robes. Mi famia, mi amigunan, hende cu mi a stima—nan tur tabata robes. Mi tabata den un ansha. Cada bes mi tabata puntra mi mes con mi famia lo reaccioná riba loke mi a caba di descubrí. Segun cu tempu a pasa i cu yudansa di Jehova, mi a cuminsá custumbrá cu e experencia aplastante aki. Un dia mi a dicidí di confia un amigu di cas, un profesor di teologia. Mi a cont’é tocante mi deseo pa haña e berdad. Anto el a comentá: ‘Si bo kier conocé e berdad, busca e Testigonan di Jehova.’”

Manera Eugenia a teme, su famia a sak’é for di cas. Sin embargo, e Testigonan a sigui dun’é yudansa spiritual. E ta comentá: “Mi a ser fortalecí pa tuma un posicion na fabor dje berdad. Mi a realisá cu e tabata algu bale la pena lucha p’e. E bon biní cu mi a ricibí cerca Testigonan di Jehova tabata masha importante. Mi a sinti cu den e congregacion cristian nan tabata stimá mi. Dor di cera cu e organisacion di Dios, mi a vence e temor di tin cu para mi so.”

Considerá un otro ehempel. Sabrina a lanta den un ambiente di cas caminda su famia tabatin consideracionnan regular tocante Bijbel. De facto, nan a desaroyá un forma di ‘religion di famia.’ Sabrina a hacié un custumber pa asociá cu miembronan di vários religion pa exponé nan erornan. Ora un Testigo di Jehova a ofrec’é un studio di Bijbel, el a acept’é mesora cu e intencion di proba cu nan creencianan tabata falsu. E ta conta: “Despues di a studia pa mas cu un aña, mi a haña miedu di perde ‘mi berdad.’ Mi a haña cu tabata fácil pa desenmascará e engaño di hopi religion cu mi tabata enbolbí cuné, pero e biaha aki sí no tabata fácil.”

Sabrina su temor a pon’é stop cu su studio di Bijbel cu Testigonan di Jehova. Pero e ora ei el a sinti un bashí spiritual. El a dicidí na reanudá e studio i cu tempu a bin aceptá e berdad nobo aki. Sabrina a progresá te n’e punto di kier compartí cu otronan loke e tabata siña. Asta el a pidi pa compañá e Testigonan den nan ministerio di cas-pa-cas. Sabrina ta splica: “Promé cu mi a ricibí aprobacion pa predicá cu Testigonan di Jehova, nan a puntrá mi: ‘Realmente bo kier bira un Testigo di Jehova?’ Mi a contestá: ‘No!’ Miedu a bolbe lanta den mi.” Finalmente, despues di a sigui asistí na tur reunion i observá e pueblo di Dios i con nan ta aplicá principionan di Bijbel, Sabrina a yega n’e conclusion cu esei tabata realmente e berdad. El a bautisá i awor e ta un evangelisadó di tempu completo.

Pakico Asina Diferente?

Un hende lo por puntra: ‘Pakico e siñansanan di Testigonan di Jehova ta asina diferente for di otro religionnan?’ Un consideracion breve di loke e Testigonan ta kere lo yudá bo mira cu nan ta cristiannan sincero, studiantenan di Bijbel conciensudo. E cuadro ariba ta contené un resúmen di nan siñansanan básico. Nos ta animá bo pa busca e textonan citá den bo mes Bijbel.

Dor di analisá mas djacerca loke Testigonan di Jehova ta kere i con nan ta pega na loke Bijbel ta siña, bo por ser bendicioná cu e libertad cu e berdad ta duna. (Juan 17:17) No tin motibu pa tene miedu dje berdad. Corda Jesus su promesa: “Boso lo conocé e berdad, i e berdad lo haci boso liber.”—Juan 8:32.

[Kuadro na página 6]

ALGUN CREENCIA BASICO DI TESTIGONAN DI JEHOVA

◯ Jehova ta e Dios todopoderoso. Su nomber personal ta aparecé mas cu 7.000 biaha den e manuscritonan mas bieu di Bijbel.—Salmo 83:18.

◯ Jesucristo ta e Yu di Dios, cu a bini na tera pa duna su bida na fabor di humanidad. (Juan 3:16, 17) Testigonan di Jehova ta sigui e siñansanan di Jesucristo manera nan ta ser hañá den e Evangelionan.

◯ E nomber Testigonan di Jehova ta basá riba Isaías 43:10, cu ta bisa: “‘Boso ta mi testigonan,’ ta e expresion di Jehova.”

◯ E Reino cu hende ta pidi p’e den e oracion di “Nos Tata” ta un gobiernu celestial cu pronto lo eliminá tur dolor i sufrimentu na mundu pa traha lugá p’e Paradijs cu Bijbel ta primintí.—Isaías 9:6, 7; Daniel 2:44; Mateo 6:9, 10; Revelacion 21:3, 4.

◯ Ken cu ta haci e boluntad di Dios tin e oportunidad pa disfrutá pa semper dje bendicionnan di Reino.—Juan 17:3; 1 Juan 2:17.

◯ Cristiannan tin cu ahustá nan conducta na loke Bijbel ta bisa. Nan tin cu trata na ser onesto, hiba un bida moralmente limpi, i mustra amor na nan próhimo.—Mateo 22:39; Juan 13:35; 1 Corintionan 6:9, 10.

[Plachi na página 5]

Testigonan di Jehova ta haci e berdad di Bijbel conocí na hende den mas cu 200 pais